ორსულობის დროს და მშობიარობის შემდეგ სექსი ხშირად ისეთ კითხვებს აჩენს, რომელთა დასმაც ბევრს უხერხულად ეჩვენება: შეიძლება თუ არა? ხომ არ ავნებს ნაყოფს? რატომ არ მინდა სექსი? რატომ მტკივა? უკვე მზად უნდა ვიყო? იმის გამო, რომ ეს კითხვები ძალიან პირადულია, ბევრი ადამიანი შიშს, დანაშაულის გრძნობას ან ზეწოლას თავისთვის, ჩუმად ატარებს.

პასუხი ამ კითხვებზე, როგორც წესი, იმაზე ნაკლებად შემაშინებელი და უფრო ინდივიდუალურია, ვიდრე მითები გვაჯერებს. ბევრ ორსულობაში სექსი შეიძლება უსაფრთხო იყოს, ხოლო მშობიარობის შემდეგ ინტიმურობა შეიძლება სხვადასხვა გზით დაბრუნდეს. მაგრამ უსაფრთხოება, კომფორტი, თანხმობა, კონტრაცეფცია, ტკივილი, განწყობა და აღდგენა — ყველა დეტალი მნიშვნელოვანია.

ეს სტატია არ არის წესების კრებული იმის შესახებ, როდის შეიძლება ან არ შეიძლება სექსი. ეს არის რჩევების კრებული, რომელიც დაგეხმარებათ, გაიგოთ, რა არის ხშირი, როდის არის საჭირო დახმარება და რატომ არ არის აუცილებელი, თქვენი სხეული სხვის გრაფიკს მიჰყვებოდეს.

სექსი ორსულობის დროს: რა არის უსაფრთხო?

გართულებების გარეშე მიმდინარე ორსულობისას სექსი ადამიანების უმეტესობისთვის უსაფრთხოა. ნაყოფს იცავს ამნიონური სითხე, სანაყოფე პარკი და საშვილოსნოს ძლიერი კუნთები. ვაგინალური პენეტრაცია, თითები, სექს-სათამაშოები და ორგაზმი ნაყოფამდე არ აღწევს და მას არ აზიანებს — ჯანმრთელი ორსულობის დროს სექსი მუცლის მოშლის მიზეზად არ მიიჩნევა.

რაც ორსულობისას ხშირად იცვლება არის არა უსაფრთხოება, არამედ კომფორტი და სურვილი. გულისრევამ, დაღლილობამ, მკერდის მგრძნობელობამ, მენჯის არეში ზეწოლამ, ზურგის ტკივილმა, გულძმარვამ, შფოთვამ ან მზარდმა მუცელმა შეიძლება სექსი ნაკლებად სასურველი გახადოს ან ახალი პოზების საჭიროება გააჩინოს. სურვილი შეიძლება გაიზარდოს, შემცირდეს, დროებით გაქრეს ან კვირიდან კვირამდე შეიცვალოს. ეს ყველაფერი შეიძლება ნორმალური იყოს.

სექსის შემდეგ შეიძლება მსუბუქი სპაზმური ტკივილი ან მცირე ლაქოვანი სისხლდენა შენიშნოთ, რადგან ორსულობის დროს საშვილოსნოს ყელი და საშვილოსნო უფრო მგრძნობიარეა. თუ სისხლდენა ძლიერია, სპაზმი მძიმეა ან არ გადის, ტკივილი არ მცირდება, იწყება შეკუმშვები, გაქვთ მაღალი ტემპერატურა ან საშოდან სითხე ჟონავს — აუცილებლად მიმართეთ ექიმს.

ექიმმა ან ბებიაქალმა შეიძლება გირჩიოთ, თავი შეიკავოთ ვაგინალური პენეტრაციისგან, ორგაზმისგან ან სექსუალური აქტივობისგან, თუკი გაქვთ:

• აუხსნელი ვაგინალური სისხლდენა;
• ამნიონური სითხის დენა ან სანაყოფე გარსების დაზიანება;
• პლაცენტის წინმდებარეობა — როცა პლაცენტა ნაწილობრივ ან მთლიანად ფარავს საშვილოსნოს ყელს;
• საშვილოსნოს ყელის უკმარისობა ან ყელის ნაადრევი გახსნა;
• ნაადრევი მშობიარობის მაღალი რისკი ან სხვა გართულება, რომლის დროსაც რეკომენდებულია მენჯის არის დასვენება.

ორსულობის დროს სქესობრივი გზით გადამდები ინფექციებისგან (სგგი) დაცვაც მნიშვნელოვანია. პრეზერვატივი საჭიროა, თუ გყავთ ახალი პარტნიორი, სხვა პარტნიორები ან პარტნიორის სგგი-ების სტატუსი გაურკვეველია. თუკი პარტნიორს შეიძლება ჰქონდეს სქესობრივი გზით გადამდები ინფექცია, სამედიცინო რეკომენდაციის მიღებამდე მოერიდეთ ვაგინალურ, ორალურ და ანალურ სექსს.

► თუ გითხრეს, რომ სექსისგან თავი უნდა შეიკავოთ ან მენჯის არის დასვენება გჭირდებათ, ჰკითხეთ, რას ნიშნავს ეს კონკრეტულად თქვენს შემთხვევაში. ერთი ადამიანისთვის ეს შეიძლება ნიშნავდეს მხოლოდ პენეტრაციისგან თავის შეკავებას; სხვასთან კი შეიძლება მოიცავდეს ორგაზმის ან ისეთი აქტივობების თავიდან არიდებასაც, რომლებიც შეკუმშვებს იწვევს.

სექსი მშობიარობის შემდეგ: არის თუ არა ექვსი კვირა სავალდებულო ვადა?

გავრცელებული აზრია, თითქოს მშობიარობის შემდეგ სექსის განახლება ექვსი კვირის შემდეგ უკვე შეიძლება. სინამდვილეში, ექვსი კვირა ხშირად შემოწმების დროა და არა — სექსის დაწყების ვადა. მშობიარობისშემდგომი ვიზიტი შეიძლება დაგეხმაროთ შეხორცების, სისხლდენის, ჭრილობების, განწყობის, კონტრაცეფციისა და ტკივილის შეფასებაში, მაგრამ ეს არ ნიშნავს, რომ ამ დროისთვის სექსისთვის აუცილებლად მზად უნდა იყოთ.

მშობიარობის შემდეგ პირველ კვირებში სხეული კვლავ აღდგენის პროცესშია. მშობიარობის შემდგომი სისხლნარევი გამონადენი შეიძლება რამდენიმე კვირა გაგრძელდეს. ნახეთქებს, ნაკერებს, შეშუპებას, ბუასილს, მენჯის არეში ტკივილს და საკეისრო კვეთის ჭრილობას შეიძლება დრო და მოვლა დასჭირდეს. უძილობამ, ძუძუთი კვებამ, ჰორმონულმა ცვლილებებმა, შფოთვამ, სევდამ და ახალშობილის მუდმივმა საჭიროებებმაც შეიძლება სექსი დღის წესრიგიდან ამოაგდოს.

სექსისთვის მზადყოფნა უნდა გულისხმობდეს შეხორცებას, კომფორტს, ენერგიას, ემოციურ უსაფრთხოებას, სურვილსა და თანხმობას. ზოგი ადამიანი მშობიარობისშემდგომი ვიზიტის დროისთვის უკვე მზად გრძნობს თავს. სხვებს თვეები სჭირდებათ, განსაკუთრებით რთული მშობიარობის, ეპიზიოტომიის (მცირე ქირურგიული ჭრილობა შორისზე — ანუსსა და საშოს შორის მდებარე ქსოვილზე — რომელიც კეთდება ნაყოფის გამოსასვლელი ადგილის გასაფართოებლად), საკეისრო კვეთის შემდეგ აღდგენის, ძუძუთი კვებასთან დაკავშირებული სიმშრალის, მენჯის ფსკერის სიმპტომების, მშობიარობისშემდგომი დეპრესიის ან შფოთვის, ან მშობიარობის ტრავმის შემდეგ.

► ექვსი კვირა სექსზე საუბრის დაწყების დრო უნდა იყოს და არა — მისი დასრულების. თუ სექსი მტკივნეულია, უკავშირდება შიშს ან სხეულის დაძაბულობას, შეგიძლიათ, შეჩერდეთ და მოგვიანებით სცადოთ ისევ, უფრო მეტი მხარდაჭერისა და კომფორტის პირობებში.

ხშირი პრობლემები მშობიარობის შემდეგ

მშობიარობისშემდგომი სექსუალური პრობლემები ხშირია და მათ იშვიათად აქვს მხოლოდ ერთი გამომწვევი მიზეზი. ტკივილი, სიმშრალე, დაბალი სქესობრივი ლტოლვა, სისხლდენის შიში, მენჯის ფსკერის ცვლილებები, სხეულის აღქმასთან დაკავშირებული შფოთვა და დაღლილობა შეიძლება ერთმანეთს დაემატოს. ეს სიმპტომები რეალურია და მათი ჩუმად ატანა არ გევალებათ.

სექსის დროს ტკივილი შეიძლება უკავშირდებოდეს ჩახევებს, ნაკერებს, ნაწიბუროვან ქსოვილს, ეპიზიოტომიას, მენჯის ფსკერის დაძაბულობას, ვაგინალურ სიმშრალეს, ბუასილს, საკეისრო კვეთის შემდეგ შეხორცებას ან შიშს მტკივნეული პირველი მცდელობის შემდეგ. საწყის პერიოდში ბუნებრივია მცირე მგრძნობელობა ტკივილისადმი, მაგრამ მწვავე, მუდმივი, გაუარესებული ან შემაშფოთებელი ტკივილი ყურადღებას საჭიროებს.

ვაგინალური სიმშრალე განსაკუთრებით ხშირია ძუძუთი კვების პერიოდში, რადგან ჰორმონულმა ცვლილებებმა შეიძლება საშოს ქსოვილი უფრო მშრალი, თხელი ან ადვილად გაღიზიანებადი გახადოს. პროცესი შეიძლება გაამარტივოს უფრო მეტი დროის დათმობამ, უფრო ნაზმა შეხებამ და ლუბრიკანტმა. თუ სიმშრალე ან ტკივილი გრძელდება, ექიმმა შეიძლება სხვა ვარიანტებიც შემოგთავაზოთ.

მშობიარობის შემდეგ ხშირია დაბალი ლიბიდოც. ლტოლვაზე შეიძლება იმოქმედოს ჰორმონებმა, გამოფიტვამ, ძუძუთი კვებამ, ტკივილმა, სტრესმა, შფოთვამ, დეპრესიამ, სხეულის აღქმამ, ურთიერთობის დაძაბულობამ ან მზრუნველობის მიზნით მუდმივი შეხებისგან გადაღლილობამ.

► ნაკლები ლტოლვა არ ნიშნავს, რომ პარტნიორი არ გიყვართ, და არც იმას ნიშნავს, რომ თქვენი სექსუალობა გაქრა. მეტი ინფორმაციისთვის იხილეთ ჩვენი სტატია დაბალი ლიბიდო — მნიშვნელობა, გამომწვევი მიზეზები და მკურნალობა

მნიშვნელოვანია საკუთარი სხეულის აღქმა და დაღლილობაც. ნაწიბურებმა, სტრიებმა, რძის გამოჟონვამ, წონის ცვლილებებმა ან სხეულში უცხოდ ყოფნის განცდამ შეიძლება, სექსი ემოციურად რთული გახადოს. ძილის ნაკლებობამაც შეიძლება შეამციროს სურვილი, აღგზნება, მოთმინება და სიახლოვის განცდა, სიყვარულით სავსე ურთიერთობაშიც კი.

მშობიარობის შემდეგ სექსზე შეიძლება იმოქმედოს მენჯის ფსკერის მდგომარეობამაც. ორსულობამ და მშობიარობამ შეიძლება დაძაბოს კუნთები და ქსოვილები, რომლებიც შარდის ბუშტს, საშვილოსნოს, საშოსა და სწორ ნაწლავს უკავშირდება. თუკი შარდის უნებლიე გამოყოფა, მენჯის სიმძიმე, პენეტრაციის დროს ტკივილი, მოდუნების სირთულე, შეგრძნების შემცირება ან ორგაზმის ცვლილება გაწუხებთ, შესაძლოა, კარგი აზრი იყოს პროფესიონალთან მენჯის ფსკერის ფიზიოთერაპიაზე საუბრის დაწყება.

► ტკივილი, სიმშრალე, შარდის უნებლიე გამოყოფა, მენჯის სიმძიმე, ძლიერი შიში ან ლტოლვასთან დაკავშირებული დისკომფორტი დახმარების თხოვნისთვის სრულიად საკმარისი მიზეზებია — მშობიარობისშემდგომ სექსუალურ ჯანმრთელობაზე ზრუნვა მნიშვნელოვანია.

მითები და ფაქტები ორსულობისა და მშობიარობისშემდგომი სექსის შესახებ

მითები ხშირად მარტივად ჟღერს, რის გამოც ისინი მარტივად გავრცელებადი და დაჯერებადია. თუმცა, ხშირად რეალობას არ ასახავს და ფაქტები, როგორც წესი, უფრო დამამშვიდებელია. მაგალითად:

• მითი: ორსულობის დროს სექსი ნაყოფს აზიანებს. ფაქტი: გართულებების გარეშე მიმდინარე ორსულობაში ნაყოფი კარგად არის დაცული და პენეტრაცია მასზე ზეგავლენას არ ახდენს.
• მითი: ორსულობის დროს სექსი მუცლის მოშლას იწვევს. ფაქტი: ჯანმრთელ ორსულობაში სექსი მუცლის მოშლის მიზეზად არ მიიჩნევა. მუცლის მოშლის შემთხვევების უმეტესობა ხდება იმიტომ, რომ ორსულობა მოსალოდნელად არ ვითარდება.
• მითი: მშობიარობიდან ექვსი კვირა ნიშნავს, რომ უკვე მზად უნდა იყო სექსისთვის. ფაქტი: ექვსი კვირა შემოწმების დროა და არა — სექსის დაწყების ვადა. სექსისთვის მზადყოფნა მოიცავს კომფორტს, სურვილს, ენერგიას, განწყობასა და თანხმობას.
• მითი: მშობიარობის შემდეგ სექსი აუცილებლად მტკივნეული უნდა იყოს. ფაქტი: დისკომფორტი შეიძლება იყოს, მაგრამ მუდმივი, ძლიერი ან შემაშინებელი ტკივილი ყურადღებას საჭიროებს.
• მითი: ძუძუთი კვების დროს დაორსულება შეუძლებელია. ფაქტი: ოვულაცია შეიძლება პირველ მენსტრუაციამდეც დაბრუნდეს, ხოლო ძუძუთი კვება იცავს მხოლოდ კონკრეტული პირობების არსებობისას. თუკი დაორსულებას არ გეგმავთ, მშობიარობისშემდგომი სექსის დროს გამოიყენეთ პრეზერვატივი ან სხვა კონტრაცეფცია, მათ შორის ძუძუთი კვების დროსაც.
• მითი: “ნამდვილი” სექსი აუცილებლად მოიცავს პენეტრაციას. ფაქტი: ინტიმურობა შეიძლება მოიცავდეს შეხებას, კოცნას, მასაჟს, ორალურ სექსს, მასტურბაციას, ემოციურ სიახლოვეს ან, უბრალოდ, ერთმანეთთან ახლოს ყოფნას ყოველგვარი ზეწოლის გარეშე. მეტი ინფორმაციისთვის იხილეთ ჩვენი სტატია: სექსი პენეტრაციის გარეშე — მნიშვნელობა, ტიპები და დადებითი მხარეები

კონტრაცეფცია მშობიარობის შემდეგ: შეიძლება თუ არა დაორსულება პირველ მენსტრუაციამდე?

დიახ. როგორც უკვე აღვნიშნეთ, მშობიარობის შემდეგ ორსულობა შეიძლება პირველ მენსტრუაციამდეც კი დადგეს, რადგან ოვულაცია, როგორც წესი, სისხლდენის დაწყებამდე ხდება. თუ კვერცხუჯრედი გამოიყოფა და სპერმა ადგილზეა, ორსულობა შესაძლებელია მაშინაც, თუ მენსტრუალური ციკლი თვალსაჩინოდ ჯერ არ დაბრუნებულა.

ნაყოფიერება სხვადასხვა დროს ბრუნდება. თუ ადამიანი ძუძუთი არ კვებავს, ოვულაცია შეიძლება რამდენიმე კვირაშიც დაბრუნდეს. ძუძუთი კვებამ შეიძლება ოვულაცია გადაავადოს, მაგრამ ის ნაყოფიერებას ყველასთვის არ აჩერებს. თუ დაორსულება შესაძლებელია და კიდევ ერთი ორსულობა არ გსურთ, სექსის განახლებამდე თქვენს პარტნიორთან კონტრაცეფციაზე ისაუბრეთ.

ძუძუთი კვება კონტრაცეფციად შეიძლება გამოყენებულ იქნას მხოლოდ ლაქტაციური ამენორეის — ძუძუთი კვების დროს მენსტრუაციის არქონის — მეთოდის სახით და მხოლოდ მაშინ, როცა ყველა ეს პირობა სრულდება:

• მენსტრუაცია ჯერ არ დაბრუნებულა;
• თქვენი ბავშვი ექვს თვეზე ნაკლები ასაკისაა;
• ბავშვს სრულად ან თითქმის სრულად კვებავთ ძუძუთი, ხოლო კვებებს შორის ინტერვალი არ აღემატება დაახლოებით 4 საათს დღისით ან 6 საათს ღამით.

თუ რომელიმე პირობა არ სრულდება, ორსულობის თავიდან ასაცილებლად მხოლოდ ძუძუთი კვებაზე დაყრდნობა არ შეიძლება. ლაქტაცია ასევე არ გიცავთ სქესობრივი გზით გადამდები ინფექციებისგან.

• მეტი ინფორმაციისთვის იხილეთ ჩვენი სტატია: სქესობრივი გზით გადამდები ინფექციები — ტიპები, გავრცელების გზები და ტესტირება

პრეზერვატივები, მხოლოდ პროგესტინზე დაფუძნებული მეთოდები, იმპლანტები, ინექციები, საშვილოსნოსშიდა სპირალი და კონტრაცეფციის სხვა ვარიანტები შეიძლება ხელმისაწვდომი იყოს დროის, ძუძუთი კვების, სამედიცინო ისტორიისა და პირადი არჩევანის მიხედვით. ესტროგენის შემცველი მეთოდები შეიძლება არ იყოს რეკომენდებული მშობიარობის შემდეგ პირველ კვირებში, განსაკუთრებით ძუძუთი კვებისას ან როცა თრომბის რისკი უფრო მაღალია, ამიტომ კონტრაცეფციის საუკეთესო ვარიანტი ექიმთან ერთად უნდა შეარჩიოთ.

► კონტრაცეფცია მხოლოდ ორსულობის თავიდან აცილებას არ ეხება. მას შეუძლია სექსთან დაკავშირებული შფოთვა შეამციროს და დაგეხმაროთ, ორსულობებს შორის ისეთი ინტერვალი აირჩიოთ, რომელიც თქვენს ჯანმრთელობასა და ცხოვრებას შეესაბამება. მეტი ინფორმაციისთვის იხილეთ ჩვენი სტატია: ჰორმონალური კონტრაცეფცია — მნიშვნელობა, ტიპები და გავრცელებული მითები

კომუნიკაცია და თანხმობა: სექსი ზეწოლის გამო არ უნდა განახლდეს

ორსულობის ან მშობიარობის შემდეგ სექსი უნდა განახლდეს იმიტომ, რომ ეს ორივე ადამიანს უნდა, და არა იმიტომ, რომ საკმარისი დრო გავიდა, პარტნიორი თქვენგან ამას ელოდება ან ვინმე თავს დამნაშავედ გაგრძნობინებთ. ჭრილობების შეხორცება, მშობიარობისშემდგომი შემოწმება ან სისხლდენის დასრულება შეიძლება სექსს სამედიცინო თვალსაზრისით შესაძლებელს ხდიდეს, მაგრამ არცერთი მათგანი არ ქმნის სექსით დაკავების ვალდებულებას.

თანხმობა უნდა იყოს მკაფიო, ნებაყოფლობითი და მიმდინარე. შეიძლება, გინდოდეთ კოცნა, მაგრამ არა — პენეტრაცია; შეიძლება, სცადოთ სექსის დაწყება და რამდენიმე წუთში გაჩერდეთ; შეიძლება, ერთ დღეს თქვათ “კი”, მეორე დღეს კი — “არა”; ან აირჩიოთ ინტიმური სიახლოვე სექსის გარეშე. აზრის შეცვლა “უსამართლობა” არ არის — ეს საკუთარი სხეულის მოსმენის ბუნებრივი ნაწილია.

გაითვალისწინეთ, რომ პარტნიორის მხრიდან ზეწოლა შეიძლება შეუმჩნეველიც იყოს: ხუმრობა, თითქოს მას უყურადღებოდ ტოვებთ; გაბუტვა; უარის შემდეგ განმეორებით თხოვნა; სხვა წყვილებთან შედარება; ან ისეთი დანაშაულის გრძნობის გაჩენა, თითქოს მეტი დრო არ უნდა გჭირდებოდეთ. როცა სექსი ვალდებულებად ან სიმშვიდის შესანარჩუნებელ გზად იქცევა, ეს უკვე ჯანსაღი ინტიმურობა აღარ არის.

მზრუნველი პარტნიორი მოგისმენთ, მიიღებს პაუზებსა და უარს, და დაინტერესდება, არის თუ არა სექსი თქვენთვის სასურველი, უსაფრთხო და სასიამოვნო. თუ “არას” თქმა სახიფათოდ გეჩვენებათ, თუ პარტნიორი უგულებელყოფს თქვენს ტკივილს, უარს ამბობს პრეზერვატივზე ან კონტრაცეფციაზე, განზრახ აზიანებს კონტრაცეფციას, გემუქრებათ ან გაიძულებთ სექსუალურ კონტაქტს, მიმართეთ სანდო ადამიანს, ექიმს, კონსულტანტს ან ადგილობრივ რესურსს, რომელიც უსაფრთხოებით უზრუნველგყოფთ.

► სექსთან დაბრუნება იმით არ იზომება, რამდენად მალე მოხდება ეს. ის იზომება იმით, რამდენად უსაფრთხო, სასურველი და პატივისცემით სავსეა ეს გამოცდილება, და რამდენად შესაძლებელია ნებისმიერ დროს გაჩერება.

როდის უნდა მიმართოთ ექიმს?

მიმართეთ ექიმს, თუკი სექსი იწვევს მუდმივ ან ძლიერ ტკივილს, სექსის შემდეგ სისხლდენა განმეორებით ხდება, სიმშრალე არ უმჯობესდება, მენჯის სიმძიმე ან შარდის უნებლიე გამოყოფა გრძელდება, ან შიში პენეტრაციას შეუძლებელს ხდის. ამ სიმპტომებს ყურადღება სჭირდება, რადგან მათი გამომწვევი ბევრი მიზეზი მკურნალობას ექვემდებარება.

ზოგი სიმპტომი სწრაფ ან გადაუდებელ დახმარებასაც საჭიროებს. დაურეკეთ ჯანდაცვის სპეციალისტს ან მიმართეთ გადაუდებელ დახმარებას, თუკი სიმპტომები მძიმეა ან მოულოდნელად დაიწყო, ან თუ გაქვთ:

• ძლიერი სისხლდენა, სისხლდენის გაძლიერება, ერთ საათში ერთი ან მეტი საფენის გამოცვლის აუცილებლობა, ან დიდი კოლტები;
• 38°C ან უფრო მაღალი სიცხე, ციება, ან შეუძლოდ ყოფნის შეგრძნება;
• უსიამოვნო სუნის მქონე ვაგინალური გამონადენი;
• ძლიერი ან გაუარესებული ტკივილი მენჯის, მუცლის, შორისის ან ჭრილობის არეში;
• სიწითლე, შეშუპება, ჩირქი, ჭრილობის გახსნა ან გაუარესებული ტკივილი საკეისრო კვეთის ჭრილობის, ჩახევის ან ეპიზიოტომიის გარშემო;
• წვა ან ძლიერი ტკივილი შარდვის დროს, ან ზურგის ან გვერდის ტკივილი სიცხესთან ერთად;
• მტკივნეული სიწითლე მკერდზე, წითელი ზოლები, სიცხე ან გრიპის მსგავსი სიმპტომები ძუძუთი კვების დროს;
• გულმკერდის ტკივილი, სუნთქვის გაძნელება, გონების დაკარგვა, კრუნჩხვა, ძლიერი თავის ტკივილი მხედველობის ცვლილებით, ან დაბნეულობა.

ამ სიმპტომების ჩამოთვლის მიზანი თქვენი შეშინება არ არის — ეს არის შეხსენება, რომ დახმარებას იმსახურებთ, თუ რაღაც არასწორად, უჩვეულოდ ძლიერად ან რთულად ასახსნელად გეჩვენებათ.

მნიშვნელოვან ყურადღებას საჭიროებს გუნება-განწყობასთან დაკავშირებული სიმპტომებიც. მშობიარობისშემდგომი მელანქოლიის შეგრძნება, როგორც წესი, პირველ რამდენიმე კვირაში უმჯობესდება. მაგრამ თუ გაქვთ ძლიერი სევდა, შფოთვა, პანიკა, ბრაზი, უიმედობა, გულგრილობა, აკვიატებული ფიქრები, ძილის შეუძლებლობა მაშინაც კი, როცა ბავშვს სძინავს, ან განცდა, რომ საკუთარ თავს ან ბავშვს ვერ უვლით — ეს ექიმთან დაკავშირების მიზეზია. საკუთარი თავის ან ბავშვის დაზიანებაზე ფიქრების არსებობის შემთხვევაში დაუყოვნებლივ მიმართეთ გადაუდებელ დახმარებას.

• მეტი ინფორმაციისთვის იხილეთ ჩვენი სტატია: მშობიარობის შემდგომი დეპრესია — სიმპტომები და მკურნალობა

სექსზე შეიძლება აისახოს მშობიარობის ტრავმაც. შემაწუხებელი მოგონებები, პანიკა, დისოციაცია, ძლიერი შიში ან განცდა, თითქოს შეხების, სამედიცინო გამოკვლევის ან სექსუალური აქტივობის დროს საკუთარ სხეულს ტოვებთ, შესაძლოა, ტრავმაზე მიუთითებდეს და ამ დროს მნიშვნელოვანია ფსიქოთერაპევტთან გასაუბრება.

წყაროები: ACOG, Mayo Clinic, NHS, CDC