მედია აპრილის ჟურნალისტს, გიორგი ბასხაჯაურს, რომელსაც 16 აპრილის, რუსული კანონის საწინააღმდეგო აქციაზე სპეცდანიშნულების რაზმი ფიზიკურად გაუსწორდა, დღეს უცხო პირებმა დაურეკეს, მისი საცხოვრებელი მისამართი დაუსახელეს და დაემუქრნენ.
“თავიდან მკითხა, ვიცნობ თუ არა ნიკოლოზ და ალექსანდრე ადამიებს. ვკითხე, ვინ კითხულობს-მეთქი და დამიწყო გინება. ჩემი კორპუსი რომ ახსენა, მივხვდი, რომ რაღაც სხვაში იყო საქმე. მაგინა, მეც ვაგინე. როცა ვინაობის დასახელება მოვთხოვე, მითხრა უჩინმაჩინის ქუდით იარე, ვერც კი გაიგებ, ისე გავჩნდები და იქვე “ჩაგპიზდავო”. უკრაინული ნომერი იყო, თუმცა ქართულად საუბრობდა”, — ამბობს გიორგი ბასხაჯაური.
უცხო ნომრიდან შესული მსგავის შინაარსის ზარების შესახებ სოციალურ ქსელში წერენ რუსული კანონის საწინააღმდეგო აქციების სხვა მონაწილეებიც. მოქალაქეების ინფორმაციით, სხვადასხვა ქვეყნის სატელეფონო კოდით რეგისტრირებული ნომრებიდან ურეკავენ, თავდაპირველად ეკითხებიან, წაკითხული აქვთ თუ არა რუსული კანონი და შემდეგ აგინებენ.
ზოგ შემთხვევაში ნომრები ერთმანეთს ემთხვევა. მაგალითად, აპრილის ჟურნალისტ გიორგი ბასხაჯაურს და სხვა რამდენიმე ადამიანს დაურეკეს ნომრიდან: +380 (0564) 21 07 84, ხოლო ზოგიერთ აქტივისტს ნომრიდან, რომელშიც მხოლოდ ბოლო ორი ციფრია განსხვავებული: +380 (0564) 21 07 65. არსებული ინფორმაციით, შესაძლებელია სხვადასხვა ქვეყნის სატელეფონი კოდის მქონე ნომრის მოპოვება ქვეყნიდან გასვლის გარეშეც, შესაბამისად, არსებობს ვარაუდი, რომ აქციების მონაწილეებს ქვეყნის შიგნიდან ურეკავენ და ამგვარ ნომრებს “კვალის არევის” მიზნით იყენებენ.
აღსანიშნავია, რომ რამდენიმე საათის წინ ხელისუფლების კონტროლის ქვეშ მყოფი პროპაგანდისტული ტელევიზიის, პოსტვ-ის წარმომადგენელმა, ნათია ბერიძემ Facebook-ზე დაწერა:
“შეიქმნა ძალიან კარგი ჯგუფი, ვისაც დამატება გნებავთ მომწერეთ პირადში. ჯგუფი ემსახურება ერთადერთ მიზანს, ყველას თავისი თამაშით ვეთამაშებით! მოგეხსენებათ ლიბერალირმა ფაშიზმმა ამ მავნებლებში ფეხი მოიკიდა, ხოდა ამ ჯგუფის მიზანია გაიშიფროს თითოეული მათგანი და ზუსტად იმ მეთოდით ვუპასუხოთ როგორც თვითონ მოიქცევიან. დააბულინგებენ ვინმეს? აუცილებლად დაბულინგდებიან, გაბედავენ ვინმეს მისამართის გამოქვეყნებას? ჩვენ მათ მისამართებს გავასაჯაროვებთ და რასაც გააკეთებენ იგივეთი ვუპასუხებთ. დადებენ ვინმეს ტელეფონის ნომრებს? ჩვენ მათ ნომრებს გამოვაქვეყნებთ. აქციაზე ვინმეს ცუდად მოექცევიან?! გაიშიფრებიან კონკრეტული პირები და სათითაოდ, პირადად მიიღებენ პასუხებს, იმავე მეთოდებით! შეეხებიან ოჯახებს? ჩვენ მათ ოჯახებთან გვექნება კომუნიკაცია. დიახ, ვითამაშებთ მათი თამაშით, ვისაუბრებთ მათი ენით. არაფერი ახალი, არაფერი უცხო, არაფერი განსხვავებული. ყველა მათი მეთოდი გვექნება გადმოღებული. ეს ჯერ დასაწყისია, ფილმი წინ არის”.
უცნობია, უკავშირდება თუ არა ბერიძის ეს გეგმა და აქციის მონაწილეებთან ზარები და მუქარა ერთმანეთს.
16 აპრილს, მედია აპრილის ჟურნალისტს, გიორგი ბასხაჯაურს, რომელიც პარლამენტთან მიმდინარე პროცესებს აშუქებს, სპეცრაზმი ფიზიკურად გაუსწორდა. მას ცხვირის ხაზოვანი მოტეხილობა ჰქონდა, რის გამოც სამედიცინო ჩარევა დასჭირდა. გარდა ამისა, ექიმის თქმით, გიორგი ბასხაჯაურს აღენიშნებოდა მრავლობითი სისხლჩაქცევები.
მას სამართალდამცავებმა სცემეს და ჰომოფობიური ნიშნით “პიდარასტს” ეძახდნენ.
“მცემეს, პიდარასტს მეძახდნენ, გააჯვი აქედანო, წავიქეცი და ზემოდან მირტყამდა რამდენიმე რობოკოპი. წაქცეული რომ ვიყავი და მირტყამდნენ, ვეუბნებოდი, რომ ჟურნალისტი ვარ. პიდარასტს მეძახდნენ, მეუბნებოდნენ, რომ ჭკუას ვისწავლი და მერე გამომიშვეს”.
გიორგის თქმით, სპეცრაზმმა ძალადობა მაშინ დაიწყო, როცა ტერიტორია დატოვა სატელევიზიო მედიამ და როცა არანაირ დაძაბულობას ან დაპირისპირებას ადგილი არ ჰქონია და ტერიტორიაზე ცოტა ხალხი იყო დარჩენილი.
მას შემდეგ, რაც ქართულმა ოცნებამ მოსახლეობისთვის მიცემული პირობა დაარღვია და რუსული კანონი ხელახლა დააინიცირა, პარლამენტთან აქციები, ფაქტობრივად, უწყვეტად მიმდინარეობს. წინა წლისგან პროექტს მხოლოდ ის განასხვავებს, რომ “უცხოური გავლენის აგენტის” ცნება შეცვლილია “უცხოური ძალის ინტერესების გამტარებელი ორგანიზაციის” ცნებით. მოქალაქეები უკვე ერთი თვეა ითხოვენ ხელისუფლებისგან, გაიწვიოს კანონი, რომელიც აზიანებს ქვეყანას და პროდასავლურ კურსს. ხელისუფლებამ მათ წინააღმდეგ არაერთხელ გამოიყენა ცრემლსადენი გაზი, წიწაკის სპრეი თუ წყლის ჭავლი. ფაქტობრივად, არ დარჩენილა სფერო, რომლის წარმომადგენლებმაც კანონპროექტის საწინააღმდეგო პოზიცია არ გამოთქვეს. კრიტიკულია ქვეყნის სტრატეგიული პარტნიორების განცხადებებიც. მიუხედავად ამისა, ქართული ოცნება აცხადებს, რომ კანონს მაინც ვმიიღებს. სწორედ კანონპროექტთან დაკავშირებით და არამხოლოდ, დეზინფორმაციული, ანტიდასავლური და პროპაგანდისტული ნარატივები გაავრცელა პარტიის საპატიო თავმჯდომარემ, ბიძინა ივანიშვილმა, რომელიც სიტყვით გამოვიდა ხელისუფლების მიერ გამართულ კონტრაქციაზე.
აღსანიშნავია, რომ ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის: