წინასწარი მოთავსების იზოლატორში შესულ ადვოკატები ამბობენ, რომ რუსული კანონის წინააღმდეგ საპროტესტო აქციაზე დაკავებული პირები სასტიკად ნაცემი დახვდათ. მათი თქმით, დაკავებულებს დაზიანებები ყელზე, ხელებზე, ფეხებზე და მთელს სხეულზე აღენიშნებათ, რაც ციხის ექიმმა ოქმშიც ასახა.
ადვოკატების განცხადებით, 9 პირი ერთსა და იმავეს ჰყვება და ამბობს, რომ შინაგან საქმეთა სამინისტროს წარმომადგენლები მათზე ძალადობდნენ. კერძოდ, დაკავების დროს პოლიციამ ცემითა და გინებით ჯერ ერთი კორდონი გაატარეს, შემდეგ კი სპეცრაზმის გავლით იზოლატორში გადაიყვანეს.
“უჩა ქენოშვილს აღენიშნება მრავლობითი დაზიანებები კისრის მიდამოებში, ასევე, მან მითხრა, რომ წელის მიდამოებში ურტყამდნენ ხელებს და ფეხებს და ასევე ტანსაცმელი აქვს შემოხეული. ის პირდაპირ ამბობს, რომ მასზე შსს-ს თანამშრომლები ძალადობდნენ. ერთგვარი კორიდორი გაუკეთეს, როცა გაჰყავდათ, ურტყამდნენ პოლიციის თანამშრომლები და ასეთი ხმაც კი შემოესმა, “ზემოთ არის ჟურნალისტები დრონი და აღარ დაარტყათო”. ამის შემდეგ მათ აღარ დაარტყეს ხელი.
ყველა დაკავებული აღნიშნავს, რომ მათზე მოხდა ძალადობა. ზოგი ამბობს, რომ დაკავების დროს განხორციელდა მათზე ძალადობა, ზოგი კი ამბობს, რომ როდესაც ე.წ. კორიდორში შეიყვანეს, იქ ურტყამდნენ”, — განაცხადა ადვოკატმა, ლაშა ტშეშელაძემ TV პირველთან საუბრისას.
დაკავებულებზე ფიზიკურ ძალადობას საქართველოს ახალგაზრდა იურისტთა ასოციაციაც საუბრობს. გარდა ამისა, 15 აპრილს რუსული კანონის საწინააღმდეგო აქციაზე დაკავებულის ნაწილის ადგილსამყოფელი ადვოკატებმა ამ დრომდე არ იციან.
“გასული ღამის განმავლობაში არასამთავრობო ორგანიზაციების ადვოკატები უშედეგოდ ცდილობდნენ დაკავებულთა ადგილსამყოფლისა და ჯანმრთელობის მდგომარეობის შესახებ ინფორმაციის მოძიებას. დაკავებულები იმყოფებიან თბილისის სხვადასხვა დროებითი მოთავსების იზოლატორში. ადვოკატებთან აღნიშნავენ, რომ დაკავების დროს სამართალდამცავებმა დაკავებულებს ფიზიკური და სიტყვიერი შეურაცხყოფა მიაყენეს”, — აცხადებენ ორგანიზაციაში.
ორგანიზაცია მოუწოდებს:
შინაგან საქმეთა სამინისტროს
- ყველა დაკავებულს მიეცეს ოჯახის წევრებთან დაკავშირების შესაძლებლობა;
- დაკავებულთა ადვოკატებს დროულად მიეწოდოთ ინფორმაცია, რომელ იზოლატორებში არიან გადაყვანილნი მათი დაცვის ქვეშ მყოფი პირები და შეუფერხებლად შეძლონ მათთან შეხვედრა;
- დაუყოვნებლივ მოხდეს დაკავებული პირების გადაყვანა სასამართლოში და დაკავების ვადა 48 საათამდე გაუმართლებლად არ გახანგრძლივდეს.
სპეციალურ საგამოძიებო სამსახურს:
- უზრუნველყოს სამართალდამცავების მხრიდან არაპროპორციული ძალის გამოყენების, სავარაუდო თვითნებური დაკავებების, დაკავებულთა მიმართ ფიზიკური ძალადობის და სხვა მოვლენების სრულყოფილი და ობიექტური გამოძიება.
შშს-ს ცნობით, რუსული კანონის საწინააღმდეგო მშვიდობიან აქციაზე 14 ადამიანი დააკავეს. უწყების მტკიცებით, გაფრთხილების მიუხედავად, მათ “არ გაითვალისწინეს კანონიერი მოთხოვნა, დაარღვიეს საზოგადოებრივი წესრიგი, სამართალდამცველებს გაუწიეს წინააღმდეგობა და მიაყენეს სიტყვიერი შეურაცხყოფა”.
შეგახსენებთ, რომ იურიდიულ საკითხთა კომიტეტმა რუსულ კანონს პირველი მოსმენით მხარი გუშინ, 15 აპრილს დაუჭირა. სწორედ ამ განხილვის პარალელურად მიმდინარეობდა მოქალაქეების საპროტესტო აქცია „კი ევროპას! არა რუსულ კანონს!“.
მშვიდობიანი პროტესტისას აქციაზე მობილიზებულნი იყვნენ სპეცდანიშნულების რაზმები, შსს-მ კი ორგანიზატორებსა და მონაწილეებს მოუწოდა, არ გამცდარიყვნენ გამოხატვის თავისუფლებისა და მშვიდობიანი შეკრების კანონით დადგენილ ნორმებს, წინააღმდეგ შემთხვევაში „სამართალდარღვევის ნებისმიერი ფაქტი პოლიციის მხრიდან, კანონის ფარგლებში, დაუყოვნებლივ იქნება აღკვეთილი“.
საპროტესტო აქციაზე სპეცრაზმის გამოჩენის შემდეგ, ომბუდსმენმა განცხადება გაავრცელა, რომელშიც მან აღნიშნა, რომ “არ იკვეთება შეკრების კანონსაწინააღმდეგო ხასიათი, შესაბამისად არ არსებობს შეკრების მონაწილეთა კონსტიტუციურ უფლებაში ჩარევის საფუძველი”.
არაერთი კრიტიკული განცხადებისა და საზოგადოების პროტესტის ფონზე, დღეს, 16 აპრილს, პარლამენტის პლენარულ სხდომაზე რუსული კანონი პირველი მოსმენით განიხილება. სესიის პარალელურად, პარლამენტის უკან, 12:00-ზე პირველი საპროტესტო აქცია დაიწყება, ხოლო მეორე აქცია 19:00-ზე, პარლამენტის წინ გაიმართება.
დღეს, ისევე როგორც 15 აპრილს, პარლამენტში არ უშვებენ ონლაინ მედიის ჟურნალისტებს. პაპუაშვილმა ეს იმით ახსნა, რომ ისინი საკანონმდებლო ორგანოში პროტესტის გამოსახატად იკრიბებიან. მისივე თქმით, “ეს არ არის სივრცე აქციების ჩასატარებლად”. დღესვე პარლამენტში უსაფრთხოების ყვითელი დონე მოქმედებს, რის შედეგადაც, ვიზიტორებს საკანონმდებლო ორგანოში შესვლა ეზღუდებათ.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
პროექტის შინაარსი იგივე იქნება, ოღონდ სიტყვა „აგენტს“ არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის:
- სიძულვილი, ცენზურა, გამოხატვის თავისუფლების შეზღუდვა — “ოცნების” ინიციატივა პარლამენტშია
- რის “დაცვასაც” წინასაარჩევნოდ ქართული ოცნება ცდილობს, რუსეთმა უკვე “დაიცვა” — ნახეთ როგორ
- რა წერია ხელახლა ინიცირებულ რუსულ კანონში — დეტალურად
