ქვიარ-ასოციაცია „თემიდა“ ქვიარ-აქტივისტური, მემარცხენე ტრანს სათემო ორგანიზაციაა, რომელიც ორგანიზდება, მუშაობს და იბრძვის ტრანს და ქვიარ ადამიანებისთვის უსაფრთხო, თანასწორი და ღირსეული პოლიტიკური, უფლებრივი და სოციალური გარემოს შესაქმნელად.
წარმოგიდგენთ „თემიდას“ 2024 წლის თებერვლის მიმოხილვას:
- 21 თებერვალს ქვიარ ასოციაცია „თემიდას“ ორგანიზებით გაიმართა ორგანიზაციის მიერ 2023 წელს ჩატარებული თვისებრივი კვლევის „ტრანსგენდერი ადამიანების წვდომა სექსუალური, რეპროდუქციული და მენტალური ჯანმრთელობის სერვისებზე და სერვისების მიღების გამოცდილება საქართველოში“ პრეზენტაცია. კვლევა განხორციელდა „ქალთა ფონდი საქართველოში“ მხარდაჭერილი პროექტის „სექსუალური და რეპროდუქციული ჯანმრთელობის საჭიროებები ტრანს* ადამიანებში“ ფარგლებში. „თემიდას“ გუნდთან ერთად კვლევას უძღვებოდა ელენე ქაიხოსროშვილი, სექსუალური და რეპროდუქციული ჯანმრთელობის საკითხების მკვლევარი. კვლევის ანგარიში უახლოეს მომავალში განთავსდება ორგანიზაციის ვებ-გვერდზე და სოციალურ ქსელებში.
- თემიდას მიმდინარე პროექტის, „Rainbow Refugee Project-ის“ ფარგლებში, თებერვლის თვეში სამი სათემო შეხვედრა გაიმართა. 24 თებერვალს ორგანიზაციის ოფისში გამართული სათემო შეხვედრა გენდერული აფირმაციის ჰორმონთერაპიას და მასთან დაკავშირებულ საკითხებს ეხებოდა. შეხვედრას უძღვებოდა მოწვეული სპეციალისტი, ენდოკრინოლოგი. აღნიშნული პროექტის კიდევ ერთი შეხვედრა გაიმართა 29 თებერვალს და შეეხებოდა შფოთვასა და სტრესთან გამკლავების სირთულეებსა და ტექნიკებს. პროექტის ფარგლებში, ორგანიზაცია დახმარებას სთავაზობს რეგიონში მიმდინარე შეიარაღებული კონფლიქტების შედეგად დაზარალებულ და იძულებით გადაადგილებულ ლგბტქ თემის წევრებს. ხელმისაწვდომი სერვისების შესახებ ინფორმაცია შეგიძლიათ მოცემულ ბმულზე.
- 26 თებერვალს გამართულ სამოქალაქო საზოგადოების ფორუმზე „თემიდას“ გამგეობის თავმჯდომარემ ტრანს თემში აივ ინფექციის პრევენციის პროექტი, ასევე „დროებითი საცხოვრისის“ პროექტის შედეგები და საადვოკაციო მიმართულებები წარადგინა. ფორუმზე აივ ინფექცია/შიდსისა და ტუბერკულოზის საკითხებზე მომუშავე ათობით სამოქალაქო ორგანიზაციამ წარადგინა განხორციელებული პროექტების შედეგები, ასევე სხვადასხვა ჯგუფისა და თემის საადვოკაციო საკითხები. დეტალური ინფორმაცია შეგიძლიათ იხილოთ ორგანიზაციის Instagram გვერდზე.
- „თემიდა“ გაეროს განვითარების პროგრამის (UNDP) და ნორვეგიის მხარდაჭერით, ინიციატივის „ლიდერობა, თანასწორობა, ადვოკატირება და დემოკრატია“ (LEAD) ფარგლებში ახორციელებს პროექტს, რომლის მიზანია ქვიარ თემის წევრების გაძლიერება დასაქმებისთვის მნიშვნელოვანი სერვისების მიწოდების გზით, მათ შორის, სასწავლო პროგრამებზე ხელმისაწვდომობისა და დასაქმებისთვის საჭირო უნარების განვითარების თვალსაზრისით. აღნიშნული პროექტის ფარგლებში ხელმისაწვდომი დასაქმების შესახებ დეტალური ინფორმაცია შეგიძლიათ იხილოთ მოცემულ ბმულზე. ამავე პროექტის ფარგლებში, „თემიდა“ აორგანიზებს დასაქმების ვორკშოპებს. მომდევნო ვორკშოპზე ინფორმაციის მისაღებად თვალი ადევნეთ ორგანიზაციის Facebook და Instagram გვერდებს.
გარდა ამისა, შეგახსენებთ, რომ ორგანიზაციის დროებითი საცხოვრისის სერვისი კვლავ ფუნქციონირებს და ლგბტქ+ თემის წევრებს, ძალადობრივ გარემოში მცხოვრებ ან/და სხვა კრიზისულ მდგომარეობაში მყოფ პირებს სთავაზობს დროებით საცხოვრისს. სერვისის საჭიროების შემთხვევაში ნებისმიერ დროს შეგიძლიათ დარეკოთ ნომერზე +995 800 000 180 ან მიწეროთ ორგანიზაციას ელ. ფოსტაზე: [email protected]. სერვისთან დაკავშირებული დეტალური ინფორმაცია შეგიძლიათ იხილოთ მოცემულ ბმულზე.