დღეს დილით შეზღუდული შესაძლებლობის მქონე პირებმა და მათმა წარმომადგენლებმა რუსული კანონის წინააღმდეგ პრესკონფერენცია გამართეს. შშმ პირთა უფლებებზე მომუშავე ორგანიზაცია „პლატფორმა ახალი შესაძლებლობებისთვის“ თავმჯდომარემ, ესმა გუმბერიძემ აღნიშნა, რომ ტყუილი და დეზინფორმაციაა ის, თითქოს ამ კანონის მიღება შშმ პირებს არ შეეხებათ.
„მინდა ერთი-ორ ტყუილზე გავამახვილო ყურადღება და დეზინფორმაციაზე, თითქოს ეს კანონი შშმ პირებს არ ეხებათ. თანამდებობის პირების განცხადებებიც ვნახეთ ამასთან დაკავშირებით. ამ ტიპის ორგანიზაციების გამორიცხვა ტექნიკური და იურიდიული თვალსაზრისითაც იქნებოდა შეუძლებელი“, — განაცხადა ესმა გუმბერიძემ.
პრესკონფერენციაზე სიტყვით გამოვიდა შშმ აქტივისტი ანა სიხაშვილიც, რომელმაც დაგმო რუსული კანონი და აღნიშნა, რომ შშმ პირებს სჭირდებათ ის მხარდაჭერა, რომელიც საქართველოს უცხოელი პარტნიორების მხრიდან მოდის.
„რუსეთს უნდა ქართული საზოგადოება განუვითარებელი, დაბეჩავებული და გატეხილი. და თუ შიგნით არსებული სეგმენტებიც დაბეჩავდებიან ცალ-ცალკე, ბევრად გაუმარტივდებათ მათ ჩვენი სახელმწიფოს სატელიტად ქცევა. შესაბამისად, ჩვენ, შეზღუდული შესაძლებლობის მქონე პირთა ნაწილს, არ გვსურს ნამდვილად ისეთ სახელმწიფოში ცხოვრება, სადაც ისევ ინვალიდებს დაგვიძახებენ. ჩვენ არ გვინდა, ვიყოთ ინვალიდები, არ გვინდა, გავხდეთ ინვალიდები, რადგან გვინდა, ვიყოთ ადამიანები, რომლებსაც შეუძლიათ, სახელმწიფოსთვის რაღაცები ვაკეთოთ და ამ შესაძლებლობისთვის ჩვენ გვჭირდება ის მხარდაჭერა, რომელსაც ჩვენი უცხოელი პარტნიორები გვაძლევენ. არა რუსულ კანონს და არა პრორუსულ ქმედებებს!“ — განაცხადა ანა სიხაშვილმა.
აღსანიშნავია, რომ 5 აპრილს შეზღუდული შესაძლებლობის მქონე პირებმა და მათმა წარმომადგენლებმა გაავრცელეს ერთობლივი განცხადება, რომელშიც აღნიშნეს, რომ რუსული კანონი დააზიანებს არა მხოლოდ არასამთავრო ორგანიზაციებს, მედიასა და სამოქალაქო საზოგადოებას, არამედ მთლიანად მოსახლეობას, მათ შორის შშმ პირებს.
განცხადებაში ნათქვამია, რომ შშმ თემის დასაქმება, ინფორმირება და მხარდაჭერა ძირითადად სწორედ არასამთავრობო ორგანიზაციების მიერ ხდება და რუსული კანონის დამტკიცების შემთხვევაში საქართველოში მცხოვრები შშმ პირები ვეღარ მიიღებენ მათთვის სასიცოცხლოდ მნიშვნელოვან სერვისებს.
„ამ კანონპროექტის დამტკიცების შემთხვევაში, ჩვენ ვერ მივიღებთ ჩვენთვის სასიცოცხლოდ მნიშვნელოვან მხარდამჭერ სერვისებს, შეფერხდება შეზღუდული შესაძლებლობის მქონე პირთა უფლებრივი მდგომარეობა, ხელი შეეშლება ჩვენს საზოგადოებრივ ინტეგრაციასა და პოლიტიკურ თანამონაწილეობას, უფრო მეტად შეგვეზღუდება ავტონომია და დამოუკიდებელი ცხოვრების შესაძლებლობა“, — ნათქვამია შშმ პირებისა და მათი წარმომადგენლების განცხადებაში.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
მდინარაძეს არ დაუმალავს, რომ პროექტის შინაარსი იგივე იქნება, ოღონდ სიტყვა “აგენტს” არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის: