ბევრს ბავშვობიდან ესმის, რომ პირველი ვაგინალური სექსის დროს სისხლდენა აუცილებლად უნდა დაიწყოს. ზოგ ოჯახსა და თემში სისხლს ე.წ. „ქალიშვილობის“ მტკიცებულებადაც კი მიიჩნევენ — თითქოს მისი არსებობა ადასტურებდეს, რომ ადამიანს მანამდე სექსი არ ჰქონია. ამ მავნე სტერეოტიპმა შეიძლება სექსამდე შიში, ხოლო სექსის შემდეგ სირცხვილი, ეჭვი ან ზეწოლა გამოიწვიოს — განსაკუთრებით მაშინ, როცა სხეული საზოგადოებაში დამკვიდრებული მცდარი მოლოდინის შესაბამისად არ იქცევა.
ასევე, მნიშვნელოვანია სიზუსტე: სექსი მხოლოდ ვაგინალურ პენეტრაციას („შეღწევას“) არ ნიშნავს — ის შეიძლება მრავალ განსხვავებულ აქტივობას მოიცავდეს, მათ შორის ორალურ სექსს, ანალურ სექსს, პარტნიორებს შორის სასქესო ორგანოების შეხებას ან ხახუნს. ეს სტატია კონკრეტულად პირველი ვაგინალური პენეტრაციის გამოცდილებას ეხება.
- იხილეთ აგრეთვე პირველი სექსი — საზღვრები, მოლოდინები და მზადყოფნა
► მოკლე პასუხი: მითია მოსაზრება, რომ პირველი ვაგინალური სექსის დროს სისხლდენა აუცილებელია. ზოგ ადამიანს შეიძლება მსუბუქი სისხლდენა ჰქონდეს, ბევრს კი — საერთოდ არა. სისხლდენა არ მეტყველებს ე.წ. „ქალიშვილობაზე“, ხოლო მისი არარსებობა არ ადასტურებს, რომ ადამიანს წარსულში უკვე ჰქონია სექსი. არცერთი შედეგი თავისთავად არ ნიშნავს, რომ სექსი სწორად ან არასწორად წარიმართა.
რა არის ე.წ. „საქალწულე აპკი“?
ე.წ. „საქალწულე აპკი“ საშოს შესასვლელთან არსებული თხელი და ელასტიკური ქსოვილია. ის საშოს მთლიანად არ ფარავს და პენეტრაციისას აუცილებლად არ „იხევა“. ხშირად ქსოვილი, უბრალოდ, იწელება და ამას შეიძლება არც ტკივილი, არც სისხლდენა და არც შესამჩნევი ცვლილება არ მოჰყვეს.
მეან-გინეკოლოგთა ამერიკული კოლეჯის (ACOG) მიხედვით, აპკის ფორმა, სისქე და ელასტიკურობა სხვადასხვა ადამიანში ბუნებრივად განსხვავდება. ზოგს ეს ქსოვილი მეტად აქვს გამოხატული, სხვებს კი — თითქმის შეუმჩნევლად.
აპკის გარეგნული იერით ვერ განვსაზღვრავთ, ჰქონდა თუ არა ადამიანს ვაგინალური სექსი. ამიტომ წარმოდგენა, რომ პირველი პენეტრაციისას აპკი აუცილებლად უნდა „გაიხეს“ და სისხლდენა დაიწყოს, მცდარია.
რატომ შეიძლება დაიწყოს სისხლდენა?
პირველი ვაგინალური პენეტრაციის დროს ზოგ ადამიანს შეიძლება მსუბუქი სისხლდენა ჰქონდეს. ეს თავისთავად არ ნიშნავს, რომ სექსი არასწორად წარიმართა ან ადამიანს სერიოზული დაზიანება მიადგა.
პენეტრაციამ ზოგჯერ შეიძლება გააღიზიანოს საშოს შესასვლელის გარშემო ან საშოს შიგნით არსებული მგრძნობიარე ქსოვილი. ამის ალბათობა იზრდება, როცა აღგზნება ან ლუბრიკაცია (სისველე) არასაკმარისია, პენეტრაცია ზედმეტად სწრაფად ან უხეშად ხდება, ან შიში და დაძაბულობა მენჯის ფსკერის კუნთების შეკუმშვას იწვევს. ხახუნმა შეიძლება მცირე ნახეთქი და მსუბუქი სისხლდენა გამოიწვიოს.
ზოგჯერ მცირე სისხლდენა შეიძლება ე.წ. „საქალწულე აპკის“ ქსოვილის გაწელვასაც უკავშირდებოდეს. თუმცა, სისხლდენა ყოველთვის აპკიდან არ მოდის და მისი არსებობა არ ნიშნავს, რომ აპკი აუცილებლად „გაიხა“. ანალოგიურად, სისხლდენის არარსებობა არ ნიშნავს, რომ ადამიანს მანამდე ვაგინალური სექსი ჰქონდა.
სისხლდენა ე.წ. „ქალიშვილობის“ მტკიცებულება არ არის
მარტივად რომ ვთქვათ, სისხლდენით ადამიანის სექსუალურ ისტორიას ვერ გავიგებთ. პირველი ვაგინალური სექსის დროს ადამიანს შეიძლება ჰქონდეს სისხლდენა ან საერთოდ არ ჰქონდეს — არცერთი შემთხვევა არ ამტკიცებს ე.წ. „ქალიშვილობას“. განურჩევლად ამისა, როცა ქალებსა და გოგოებს ე.წ. „ქალიშვილობის“ „დამტკიცებას“ სთხოვენ, მათ სხეულსა და სექსუალურ ცხოვრებას სხვისი განსჯის საგნად აქცევენ. ეს დისკრიმინაციული მოლოდინია: თითქოს ქალის ღირსება იმაზე იყოს დამოკიდებული, ჰქონდა თუ არა მას სექსი.
სექსუალური ისტორიის განსაზღვრა არც ე.წ. „საქალწულე აპკის“ გარეგნობით შეიძლება. ვერცერთი ფიზიკური გამოკვლევა ვერ განსაზღვრავს სანდოდ, ჰქონდა თუ არა ადამიანს მანამდე ვაგინალური სექსი.
ჯანმრთელობის მსოფლიო ორგანიზაცია „ქალიშვილობას“ სოციალურ, კულტურულ და რელიგიურ კონსტრუქტად მიიჩნევს და არა — სამედიცინო ან სამეცნიერო დიაგნოზად. ე.წ. „ქალიშვილობის შემოწმებას“ მეცნიერული საფუძველი არ აქვს და მან შეიძლება ფიზიკური, ფსიქოლოგიური და სოციალური ზიანი გამოიწვიოს.
► სისხლდენა „ქალიშვილობის ტესტი“ არ არის. არავის უნდა მოეთხოვებოდეს იმის „დამტკიცება“, ჰქონდა თუ არა მანამდე სექსი — არც სისხლდენით, არც გამოკვლევით და არც სხვა გზით.
როგორ გავხადოთ ვაგინალური პენეტრაცია უფრო კომფორტული?
პირველი ვაგინალური სექსი მტკივნეული არ უნდა იყოს. მსუბუქი დისკომფორტი შესაძლებელია, თუმცა ძლიერი ტკივილი არც მოსალოდნელად უნდა მივიჩნიოთ, არც ავიტანოთ და არც მისი „გადალახვა“ ვცადოთ. მკაფიო თანხმობა, აღგზნებისთვის საკმარისი დრო, ღია კომუნიკაცია და ნელი ტემპი პენეტრაციას უფრო კომფორტულს ხდის. ლუბრიკანტი ამცირებს ხახუნსა და მცირე დაზიანებების ალბათობას. თუ რამე გტკივათ, შეანელეთ ან შეჩერდით.
- იხილეთ აგრეთვე ინტიმური ლუბრიკანტი — ტიპები, გამოყენება და უსაფრთხოება
პრეზერვატივი და შესაბამისი კონტრაცეფცია კვლავ მნიშვნელოვანია, რადგან პირველი ვაგინალური სექსი ორსულობისა თუ სქესობრივი გზით გადამდები ინფექციების რისკს არ ამცირებს.
როდის უნდა მივმართოთ ექიმს?
ბრიტანეთის ჯანდაცვის ეროვნული სამსახურის (NHS) რეკომენდაციით, სექსის შემდეგ მოულოდნელი სისხლდენის შემთხვევაში საჭიროა ჯანდაცვის სპეციალისტთან კონსულტაცია. მცირე და ხანმოკლე სისხლიანი გამონადენი შესაძლებელია, თუმცა ძლიერი, ხანგრძლივი ან განმეორებითი სისხლდენა პირველი ვაგინალური სექსის ჩვეულებრივ შედეგად არ უნდა მივიჩნიოთ.
სამედიცინო დახმარებას მიმართეთ, თუ სისხლდენა გაწუხებთ, არ წყდება, სექსის შემდეგ კვლავ მეორდება ან თან ახლავს ძლიერი ტკივილი, თავბრუსხვევა, გონების დაკარგვა, ცხელება, უჩვეულო გამონადენი ან მენჯის არეში ტკივილი. სექსის შემდეგ სისხლდენას შეიძლება სხვა მიზეზებიც ჰქონდეს, მათ შორის, სიმშრალე, ინფექცია, გაღიზიანება ან საშვილოსნოს ყელთან დაკავშირებული ცვლილებები.
მთავარი დასკვნა
პირველი ვაგინალური სექსის დროს სისხლდენა აუცილებელი არ არის და ის არასდროს უნდა მივიჩნიოთ ადამიანის სექსუალური ისტორიის „მტკიცებულებად“ ზოგ ადამიანს შეიძლება ჰქონდეს სისხლდენა, ზოგს კი — არა. მნიშვნელოვანია თანხმობა, კომფორტი, დაცვა, პატივისცემა და არა ის, არის თუ არა სისხლი პროცესში.
წყაროები: