დღეს გერმანიის კანცლერმა ოლაფ შოლცმა ბერლინში საქართველოს პრემიერ-მინისტრ ირაკლი კობახიძესთან შეხვედრის შემდეგ გამართულ ბრიფინგზე ქართული ოცნების მიერ 3 აპრილს ხელახლა ინიციირებულ რუსული კანონზე ისაუბრა. მან აღნიშნა, რომ „ევროკავშრის არ აქვს მსგავსი კანონმდებლობა“ და იმედი გამოთქვა, რომ საქართველო არ მიიღებს რუსულ კანონს.
„ჩვენ, ისევე როგორც მთელი ევროკავშირი, ძალიან კრიტიკულად ვუყურებთ ე.წ. „აგენტების შესახებ“ კანონს და მას შემდეგ, რაც ეს კანონი შეჩერდა, ძალიან დიდი იმედი გვქონდა, რომ ის კიდევ ერთხელ აღარ დადგებოდა დღის წესრიგში. ახალი კანონპროექტი პრაქტიკულად არ შეცვლილა და ის თითქმის იგივეა, რაც შარშან, და ძალიან დიდი იმედი გვაქვს, რომ პარლამენტი გაითვალისწინებს ჩვენს და საქართველოს მოსახლეობის კრიტიკულ პოზიციას და საქართველო არ მიიღებს ამ კანონს“, — განაცხადა გერმანიის კანცლერმა.
შოლცმა ასევე ისაუბრა საქართველოსთვის ევროკავშირის კანდიდატის სტატუსის მინიჭებასა და იმის მნიშვნელობაზე, რომ ამ პროცესის გაგრძელება იყოს კარგად ორგანიზებული და დაკმაყოფილდეს ევროკავშირის წევრობისთვის საჭირო ყველა კრიტერიუმი. მისი თქმით, საქართველოს მოსახლეობის სრული უმრავლესობა უჭერს მხარს ევროკავშირში გაწევრიანებას და ამ პროცესის დაჩქარებას.
კანცლერმა ასევე აღნიშნა, რომ ირაკლი კობახიძესთან შეხვედრისას მან ხაზი გაუსვა სამოქალაქო საზოგადოების მნიშვნელობას და ოპოზიციისა და მთავრობის თანამშრომლობას, რომელიც საზოგადოებრივი განვითარების მნიშვნელოვანი წინაპირობაა, შემდეგ კი შოლცმა ისაუბრა რუსულ აგრესიაზე საქართველოსა და უკრაინის მიმართ.
„ჩვენ ვიცით, რომ რუსეთი აგრძელებს თავის იმპერიალისტურ გეგმებს. ეს ეხება არა მარტო რუსეთის აგრესიას უკრაინის მიმართ, არამედ არ უნდა დაგვავიწყდეს, რომ საქართველო თვითონაც იყო 2008 წელს რუსული აგრესიის მსხვერპლი. საქართველოს ნაწილები რუსეთის უკანონო ოკუპაციის ქვეშაა და სწორედ ამიტომაც არის ძალიან მნიშვნელოვანი, რომ ჩვენ გავუსვათ ამას ხაზი. ჩვენ ვერ და არ შევეგუებით ამას. გერმანია კვლავაც მხარს უჭერს და დაუჭერს საქართველოს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში“, — განაცხადა ოლაფ შოლცმა.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
მდინარაძეს არ დაუმალავს, რომ პროექტის შინაარსი იგივე იქნება, ოღონდ სიტყვა “აგენტს” არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის:
- სიძულვილი, ცენზურა, გამოხატვის თავისუფლების შეზღუდვა — “ოცნების” ინიციატივა პარლამენტშია
- რის “დაცვასაც” წინასაარჩევნოდ ქართული ოცნება ცდილობს, რუსეთმა უკვე “დაიცვა” — ნახეთ როგორ
- რა წერია ხელახლა ინიცირებულ რუსულ კანონში — დეტალურად
