მედიის ადვოკატირების კოალიცია მოუწოდებს სპეციალურ საგამოძიებო სამსახურს, დაუყოვნებლივ გამოიძიოს 16 აპრილს სპეცრაზმის მიერ ჟურნალისტებზე ფიზიკური თავდასხმა და დაისაჯოს დამნაშავეები კანონის სრული სიმკაცრით.
კოალიცია ასევე აღნიშნავს, რომ „ქართული ოცნების მმართველობის პირობებში, ჟურნალისტების მიმართ ძალადობა ხშირ მოვლენად იქცა, რაც სისხლის სამართლის კოდექსის 154-ე მუხლის დარღვევაა“.
„ჟურნალისტური საქმიანობის ხელშეშლით, ხელისუფლება ქმნის ბარიერს საზოგადოების ინფორმირებისთვის.
მოვუწოდებთ სპეციალურ საგამოძიებო უწყებას, დაუყოვნებლივ და სრულად გამოიძიონ ეს შემთხვევა, დაადგინონ დამნაშავეები და დაისაჯონ ისინი კანონის სრული სიმკაცრით.
ხელისუფლებამ გაატაროს ყველა საჭირო ზომა მსგავსი ფაქტების აღსაკვეთად მომავალში, რათა დაცული იყოს ჟურნალისტთა უფლებები და უსაფრთხოება“, — წერია მედიის ადვოკატირების კოალიციის განცხადებაში.
შეგახსენებთ, რომ რუსული კანონის საწინააღმდეგო აქციაზე სპეციალური დანიშნულების რაზმის წევრები ფიზიკურად გაუსწორდნენ მედია „აპრილის“ ჟურნალისტ გიორგი ბასხაჯაურს, „პუბლიკის“ ჟურნალისტ ალექსანდრე ქეშელაშვილს და „ტაბულას“ ჟურნალისტ გიორგი ბადრიძეს.