იურიდიულ საკითხთა კომიტეტმა რუსულ კანონს პირველი მოსმენით მხარი დაუჭირა. კანონპროექტის განხილვის გაგრძელება მომდევნო დღეებში იგეგმება.
კომიტეტი რუსულ კანონს დღეს დილის 10:00 საათიდან განიხილავდა. 8 აპრილის მსგავსად, დღესაც პარლამენტში აკრედიტირებული ონლაინმედიების ჟურნალისტები არ შეუშვეს.
პარალელურად ამ დრომდე მიმდინარეობს მოქალაქეების საპროტესტო აქცია პარლამენტის წინ „კი ევროპას! არა რუსულ კანონს!“.
აქციაზე უკვე მობილიზებულია სპეცდანიშნულების რაზმები, შსს-მ კი აქციის ორგანიზატორებსა და მონაწილეებს მოუწოდა, არ გასცდნენ გამოხატვის თავისუფლებისა და მშვიდობიანი შეკრების კანონით დადგენილ ნორმებს, წინააღმდეგ შემთხვევაში „სამართალდარღვევის ნებისმიერი ფაქტი პოლიციის მხრიდან, კანონის ფარგლებში, დაუყოვნებლივ იქნება აღკვეთილი“.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
პროექტის შინაარსი იგივე იქნება, ოღონდ სიტყვა „აგენტს“ არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის:
- სიძულვილი, ცენზურა, გამოხატვის თავისუფლების შეზღუდვა — “ოცნების” ინიციატივა პარლამენტშია
- რის “დაცვასაც” წინასაარჩევნოდ ქართული ოცნება ცდილობს, რუსეთმა უკვე “დაიცვა” — ნახეთ როგორ
- რა წერია ხელახლა ინიცირებულ რუსულ კანონში — დეტალურად
