„ქალთა ფონდი საქართველოში“ არასამთავრობო ორგანიზაციაა, რომლის მიზანიცაა ქალებისა და ქალთა ორგანიზაციების, საინიციატივო ჯგუფებისა და აქტივისტების გაძლიერება საქართველოში ქალთა უფლებების განხორციელების, საზოგადოებრივ ცხოვრებაში მათი სრულფასოვანი მონაწილეობისა და თვითრეალიზაციისათვის, ფინანსური და ტექნიკური დახმარების, უნარების განვითარებისა და ფემინისტური ფილანთროპიის ჩამოყალიბების გზით.
წარმოგიდგენთ ქალთა ფონდის 2023 წლის ნოემბრის მიმოხილვას:
- „ქალთა ფონდის“ კატო მიქელაძის პრემია ერთწლიანი პაუზის შემდეგ დაბრუნდა. როგორც ორგანიზაციაში ამბობენ, 2022 წელს მოწვეულ მრჩეველებთან ერთად დაჯილდოებასთან დაკავშირებულ გამოწვევებსა და პრობლემებზე იმსჯელეს და ეს პაუზა ცვლილებებისა და რებრენდინგის მიზნით აიღეს. რებრენდინგის შემდეგ შეიცვალა კანდიდატების წარდგენის გზა, გაიმიჯნა კანდიდატების საქმიანობის სფეროები, შეიცვალა პრემიის ვიზუალი, ჯილდო და ბანერი, გაიზარდა ფულადი ჯილდოს ოდენობაც და სხვა. ნოემბერში დასრულდა 2023 წლის კატოს პრემიაზე კანდიდატების წარდგენის ვადა და ორგანიზაცია ემზადება დაჯილდოებისთვის.
► კატო მიქელაძის პრემიის დაწესების უმთავრესი მიზანი ქალი უფლებადამცველების აღიარებაა და დაფასებაა. ასევე, მათი მნიშვნელოვანი საქმიანობის შესახებ საზოგადოების ცნობიერების ამაღლება, ქალთა უფლებების დამცველთათვის უსაფრთხო სამუშაო გარემოს შექმნა და ქალთა უფლებების დაცვის სფეროში ახალი სახეების წახალისებაა.
- დაიწყო მზადება ქალთა ფონდის პროექტის, ფემინისტური პოდკასტი „ფემინსტრიმის“, ახალი სეზონისთვის. ნოემბერში დასრულდა ავტორების შერჩევა საქართველოს რეგიონებიდან, რომლებიც ისაუბრებენ ფემინისტურ მოძრაობაზე საქართველოში, ადგილობრივ გამოწვევებსა და მობილიზაციის სტრატეგიებზე. ასევე გამოქვეყნდა „ფემინსტრიმის“ მერვე სეზონის პირველი პოდკასტი.
► პოდკასტების ტექსტური ვერსია განთავსდება საზოგადოებრივ-პოლიტიკური ონლაინგამოცემა პუბლიკას, მედია აპრილისა და ქალთა ფონდის ვებგვერდებზე. პოდკასტები გამოქვეყნდება „ფემინსტრიმის“ Facebook-სა და YouTube გვერდებზე, ასევე Soundcloud-ზე, Spotify-სა და სხვა პლატფორმებზე.