შინაგან საქმეთა სამინისტროს განცხადების მიხედვით, რუსული კანონის საწინააღმდეგო მშვიდობიან აქციაზე ადმინისტრაციული წესით 14 ადამიანი დააკავეს. უწყების მტკიცებით, გაფრთხილების მიუხედავად, მათ “არ გაითვალისწინეს კანონიერი მოთხოვნა, დაარღვიეს საზოგადოებრივი წესრიგი, სამართალდამცველებს გაუწიეს წინააღმდეგობა და მიაყენეს სიტყვიერი შეურაცხყოფა”.
დემონსტრანტები ადმინისტრაციულ სამართალდარღვევათა კოდექსის 166-ე და 173-ე მუხლებით დააკავეს, რაც წვრილმან ხულიგნობას და პოლიციისადმი წინააღმდეგობას გულისხმობს.
შსს ამბობს, რომ შესაბამისი დანაყოფების საზოგადოებრივი წესრიგის დაცვის მიზნით არიან მობილიზებული. მათივე მტკიცებით, აქციის მონაწილეების ძალადობრივი ქმედებების შედეგად დაშავდა მათი ერთი თანამშრომელი.
რუსული კანონის საპროტესტო აქციაზე პარლამენტთან, სადაც ათიათასობით მოქალაქე რუსულ კანონს ამ წუთებშიც აპროტესტებს, სპეცრაზმი და წყლის ჭავლის მანქანაც გამოჩნდა.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
პროექტის შინაარსი იგივე იქნება, ოღონდ სიტყვა „აგენტს“ არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის:
- სიძულვილი, ცენზურა, გამოხატვის თავისუფლების შეზღუდვა — “ოცნების” ინიციატივა პარლამენტშია
- რის “დაცვასაც” წინასაარჩევნოდ ქართული ოცნება ცდილობს, რუსეთმა უკვე “დაიცვა” — ნახეთ როგორ
- რა წერია ხელახლა ინიცირებულ რუსულ კანონში — დეტალურად
