საქართველოს ჟურნალისტური ეთიკის ქარტია მოუწოდებს პარლამენტს, უარი თქვას დისკრიმინაციულ პრაქტიკაზე ონლაინმედია საშუალებების მიმართ და მისცეს მათ საშუალება, პარლამენტში 15 აპრილს დაგეგმილ საკომიტეტო განხილვას დაესწრონ.
“5 აპრილს პარლამენტის იურიდიულ კომიტეტში ჩანიშნული რუსული კანონის განხილვის მიმართ საჯარო ინტერესი გამორჩეულად მაღალია. ამ დროს კი, პარლამენტის თავმჯდომარის, შალვა პაპუაშვილის, 14 აპრილის გადაწყვეტილებით, სხდომას ვერ ესწრებიან ონლაინმედიის პარლამენტში აკრედიტებული ჟურნალისტები, რომელთაც უფლებები პარლამენტის შენობაში უსაფრთხოების დაცვის მოტივით შეეზღუდათ.
პარლამენტის თავმჯდომარის მიერ გამოცხადებული უსაფრთხოების ე.წ “ყვითელი დონის“ პირობებში პარლამენტის შენობაში მიმდინარე ღონისძიებებზე წვდომას მხოლოდ ტელემედიაში მომუშავე აკრედიტებული ჟურნალისტები ინარჩუნებენ”, — აღნიშნულია განცხადებაში.
ქარტია მოუწოდებს საქართველოს პარლამენტს, პატივი სცეს საზოგადოების უფლებას, ინფორმირებული იყოს მისთვის სასიცოცხლოდ მნიშვნელოვანი საკითხების თაობაზე პარლამენტში მიმდინარე დისკუსიაზე; უარი თქვას დისკრიმინაციულ პრაქტიკაზე ონლაინ მედია საშუალებების მიმართ და მისცეს მათ საშუალება, პარლამენტში 15 აპრილს დაგეგმილ საკომიტეტო განხილვას დაესწრონ; ასევე, პარლამენტის შენობაში შექმნას ჟურნალისტებისთვის ხელშემწყობი სამუშაო პირობები, რათა მათ თავიანთი პროფესიული მოვალეობის სრულფასოვნად განხორციელება შეძლონ.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
მდინარაძეს არ დაუმალავს, რომ პროექტის შინაარსი იგივე იქნება, ოღონდ სიტყვა “აგენტს” არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის:
- სიძულვილი, ცენზურა, გამოხატვის თავისუფლების შეზღუდვა — “ოცნების” ინიციატივა პარლამენტშია
- რის “დაცვასაც” წინასაარჩევნოდ ქართული ოცნება ცდილობს, რუსეთმა უკვე “დაიცვა” — ნახეთ როგორ
- რა წერია ხელახლა ინიცირებულ რუსულ კანონში — დეტალურად
