განახლება: თავდაპირველად რუსული კანონის განხილვა 12 აპრილს იყო ჩანიშნული, თუმცა ბიურომ სხდომა 15 აპრილს გადაიტანა.
დღეს პარლამენტის ბიუროს სხდომაზე განიხილეს 3 აპრილს ქართული ოცნების მიერ ხელახლა ინიციირებული რუსული კანონი.
ბიურომ მსვლელობა მისცა რუსულ კანონს და მასზე მსჯელობა იურიდიულ საკითხთა კომიტეტის სხდომაზე გაგრძელდება ორშაბათს, 15 აპრილს.
ბიუროს სხდომაზე ქართული ოცნების დეპუტატმა ანრი ოხანაშვილმა განაცხადა, რომ ქართული ოცნება არ აპირებს რუსული კანონის კანონპროექტის ვენეციის კომისიაში გაგზავნას, ვინაიდან შარშან ვენეციის კომისიამ უარყოფითად შეაფასა ტერმინი „აგენტი“, რომელიც კანონპროექტიდან ახლა ამოღებულია. ცნობისთვის, ეს ერთადერთი ცვლილებაა, რომელიც კანონპროექტში შევიდა, სხვა მხრივ კი ხელახლა ინიციირებული რუსული კანონი შარშანდელის იდენტურია.
ბიუროს სხდომაზე ასევე ფრაქცია „საქართველოსთვის“ მიერ დაინიციირდა უცხოური გავლენის გამჭვირვალობის შესახებ კანონპროექტის ალტერნატიული პროექტები, რომლებიც ითვალისწინებს გრანტების, ბუღალტრული აღრიცხვის, ანგარიშგებისა და აუდიტის შესახებ საქართველოს კანონებში ცვლილებას.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
მდინარაძეს არ დაუმალავს, რომ პროექტის შინაარსი იგივე იქნება, ოღონდ სიტყვა “აგენტს” არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის: