ევროპის საბჭოს საპარლამენტო ასამბლეის (PACE) პრეზიდენტმა, თეოდოროს რუსოპულოსმა ვენეციის კომისიას რუსული კანონის შესახებ მოსაზრების დაჩქარებული წესით მომზადება სთხოვა. ამის შესახებ ინფორმაციას ევროპის საბჭოს საქართველოს ოფისი ავრცელებს და აცხადებს, რომ რუსული კანონით დაინტერესების მიზეზი “ადამიანის უფლებებზე შესაძლო ზეგავლენაა” და იმის გარკვევაა, რამდენად მოდის რუსული კანონი ევროპის საბჭოს სტანდარტებთან შესაბამისობაში.
ევროპის საბჭოს საქართველოს ოფისის ინფორმაციით, საქართველოში რუსული კანონის ხელახლა დაინიციირება საპარლამენტო ასამბლეის თანამომხსენებლებმა კლოდ კერნმა (საფრანგეთი, ALDE – ლიბერალებისა და დემოკრატების ალიანსი ევროპისთვის) და ედიტ ესტრელამ (პორტუგალია, SOC – სოციალისტების, დემოკრატებისა და მწვანეების ჯგუფი) გააკრიტიკეს და ღრმა შეშფოთება გამოთქვეს.
“ამ ე.წ. უცხოური აგენტების შესახებ კანონპროექტის ხელახალი წარდგენა, რომლის გაწვევაც ჩვენ დადებითად შევაფასეთ, ღრმა შეშფოთებას იწვევს. ჩვენი განცხადება, რომელიც ამ კანონპროექტის პირველად შემოღებისას გავაკეთეთ, კვლავაც ძალაში რჩება: ეს კანონპროექტი წარმოშობს სერიოზულ კითხვებს ევროპულ დემოკრატიასთან და ადამიანის უფლებათა სტანდარტებსა და ნორმებთან მისი შესაბამისობის თაობაზე. შესაბამისად, ჩვენ მოვუწოდებთ ხელისუფლებას ამოიღონ ეს კანონპროექტი პარლამენტის დღის წესრიგიდან“, — განაცხადეს თანამომხსენებლებმა.
ევროპის საბჭოს ოფისის ცნობით, თეოდოროს რუსოპულოსმა ვენეციის კომისიას ქართული ოცნების მიერ დაანონსებული სიძულვილის კანონის მიღებისა და საქართველოს საარჩევნო კოდექსში გენდერული კვოტების გაუქმების შესახებ ბოლოდროინდელი ცვლილებების შესწავლაც სთხოვა.
არაერთი კრიტიკული განცხადებისა და საზოგადოების პროტესტის ფონზე, დღეს, 16 აპრილს, პარლამენტის პლენარულ სხდომაზე რუსული კანონი პირველი მოსმენით განიხილება. სესიის პარალელურად, პარლამენტის უკან, 12:00-ზე პირველი საპროტესტო აქცია დაიწყება, ხოლო მეორე აქცია 19:00-ზე, პარლამენტის წინ გაიმართება.
დღეს, ისევე როგორც 15 აპრილს, პარლამენტში არ უშვებენ ონლაინ მედიის ჟურნალისტებს. პაპუაშვილმა ეს იმით ახსნა, რომ ისინი საკანონმდებლო ორგანოში პროტესტის გამოსახატად იკრიბებიან. მისივე თქმით, “ეს არ არის სივრცე აქციების ჩასატარებლად”. დღესვე პარლამენტში უსაფრთხოების ყვითელი დონე მოქმედებს, რის შედეგადაც, ვიზიტორებს საკანონმდებლო ორგანოში შესვლა ეზღუდებათ.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
პროექტის შინაარსი იგივე იქნება, ოღონდ სიტყვა „აგენტს“ არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის:
- სიძულვილი, ცენზურა, გამოხატვის თავისუფლების შეზღუდვა — “ოცნების” ინიციატივა პარლამენტშია
- რის “დაცვასაც” წინასაარჩევნოდ ქართული ოცნება ცდილობს, რუსეთმა უკვე “დაიცვა” — ნახეთ როგორ
- რა წერია ხელახლა ინიცირებულ რუსულ კანონში — დეტალურად
