სახალხო დამცველი ლევან იოსელიანი გამოეხმაურა იმ ფაქტს, რომ დღეს პარლამენტში რუსული კანონის საკომიტეტო განხილვაზე ონლაინ და ბეჭდური მედიების აკრედიტირებულ ჟურნალისტებს არ უშვებენ.
„მიმაჩნია, რომ ყველა აკრედიტირებულ მედიას უნდა მიეცეს საშუალება, იყოს პარლამენტში და გააშუქოს დღევანდელი დღე იმ პერსპექტივიდან, როგორც მას მიაჩნია სწორად, დასვას კითხვები და მიიღოს პასუხები“ — განაცხადა ლევან იოსელიანმა.
შეგახსენებთ, რომ საქართველოს თავმჯდომარის ბრძანებით, დღის განმავლობაში პარლამენტის სასახლეში იმოქმედებს უსაფრთხოების ყვითელი დონე, რომლის მიხედვითაც პარლამენტის სასახლეში დაიშვებიან ტელემაუწყებლის/ტელემედია საშუალებების აკრედიტირებული ჟურნალისტები, თუმცა ონლაინ და ბეჭდური მედიის — არა.
აღსანიშნავია, რომ ონლაინმედიის ჟურნალისტების პარლამენტში არშეშვების ფაქტს კომიტეტის თავმჯდომარე ანრი ოხანაშვილმა „დეზინფორმაცია“ უწოდა.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
მდინარაძეს არ დაუმალავს, რომ პროექტის შინაარსი იგივე იქნება, ოღონდ სიტყვა “აგენტს” არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის:
- სიძულვილი, ცენზურა, გამოხატვის თავისუფლების შეზღუდვა — “ოცნების” ინიციატივა პარლამენტშია
- რის “დაცვასაც” წინასაარჩევნოდ ქართული ოცნება ცდილობს, რუსეთმა უკვე “დაიცვა” — ნახეთ როგორ
- რა წერია ხელახლა ინიცირებულ რუსულ კანონში — დეტალურად
