აშშ-ის ელჩი საქართველოში, რობინ დანიგანი, ქართული ოცნების მიერ 3 აპრილს ხელახლა დაინიციირებულ რუსულ კანონს აკრიტიკებს და ამბობს, რომ აშშ-მ საქართველოს ხელისუფლების წარმომადგენლებთან საჯაროდ და პირად საუბრებშიც გამოხატა სერიოზული შეშფოთება ამ კანონპროექტთან დაკავშირებით.
„ჩვენ გვაშფოთებს, რომ ეს კანონპროექტი გადაიყვანს საქართველოს ევროპული გზიდან და გვაშფოთებს ასევე, რომ ნეგატიურ გავლენას მოახდენს ადგილობრივი სამოქალაქო ორგანიზაციების შესაძლებლობებზე, გააკეთონ მნიშვნელოვანი საქმე, რომ დაეხმარონ ქართველ ხალხს ყოველდღიურად“ — აცხადებს დანიგანი.
ელჩმა ასევე ხაზი გაუსვა, რომ რუსულ კანონს აკრიტიკებს არა მხოლოდ ამერიკის შეერთებული შტატები, არამედ რიგი საერთაშორისო ორგანიზაციები და ცალკეული ქვეყნები. მისი თქმით, ქართული ოცნების მიერ ინიციირებული რუსული კანონი არ ჰგავს აშშ-ში მოქმედ FARA-ს.
- იხილეთ აგრეთვე: ეუთო/ოდირი განმარტავს, რატომ არ ჰგავს საქართველოში ინიცირებული რუსული კანონი ამერიკულსა და ავსტრალიურს
„ეს არ არის შეშფოთება მხოლოდ ამერიკის შეერთებული შტატებიდან. ევროკავშირმა, ნატომ, ევროსაბჭომ, ევროპარლამენტმა, ბევრმა ქვეყანამ ინდივიდუალურად, მათმა პარლამენტებმა, გაერომ, ასევე გამოხატეს სერიოზული შეშფოთება და ხაზი გაუსვეს, რომ კანონი უარყოფითად აისახება საქართველოს ევროკავშირის წევრობისკენ მიმავალ გზაზე.
როდესაც გაქვს კანონპროექტი და როდესაც შენს დასავლელ მეგობრებს აქვთ სერიოზული შეშფოთება, მაგრამ ოკუპანტები ესალმებიან მას, უნდა ჰკითხოთ საკუთარ თავს, არის თუ არა ის კარგი თქვენი ქვეყნისთვის. ეს არ არის ამერიკის შეერთებულ შტატებში მოქმედი კანონის მსგავსი. შეერთებული შტატები მიესალმება საკუთარი სამოქალაქო ორგანიზაციების როლს და მათი მხრიდან ხელშეწყობას. ჩვენი კანონი სპეციფიკურად მოითხოვს, რომ ორგანიზაციები და ინდივიდუალური პირები, რომლებიც ლობირებენ, რომლებსაც ფულს უხდიან ამისთვის, უცხოური მთავრობის სახელით და უცხოური მთავრობის ინტერესებისთვის, უნდა დარეგისტრირდნენ. ეს სრულიად განსხვავებული კანონია“ — განაცხადა აშშ-ის ელჩმა საქართველოში.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
მდინარაძეს არ დაუმალავს, რომ პროექტის შინაარსი იგივე იქნება, ოღონდ სიტყვა “აგენტს” არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის:
- სიძულვილი, ცენზურა, გამოხატვის თავისუფლების შეზღუდვა — “ოცნების” ინიციატივა პარლამენტშია
- რის “დაცვასაც” წინასაარჩევნოდ ქართული ოცნება ცდილობს, რუსეთმა უკვე “დაიცვა” — ნახეთ როგორ
- რა წერია ხელახლა ინიცირებულ რუსულ კანონში — დეტალურად
