საქართველოს ჟურნალისტური ეთიკის ქარტია შეშფოთებას გამოთქვამს გუშინ გამართულ მშვიდობიან აქციაზე სამართალდამცავების მხრიდან ჟურნალისტებზე ფიზიკური ძალადობის ფაქტზე და მოუწოდებს გენერალურ პროკურატურას და სპეციალურ საგამოძიებო სამსახურს, გამოიძიონ ჟურნალისტების წინააღმდეგ ჩადენილი დანაშაულები.
ორგანიზაცია შეშფოთებულია შსს-ს წარმომადგენლების მიერ ონლაინმედიის ჟურნალისტებზე განხორციელებული ფიზიკური ძალადობის, ჰომოფობიური შინაარსის შემცველი მუქარებისა და პროფესიული საქმიანობის შესრულებაში უკანონოდ ხელის შეშლის გამო.
“ქარტია მიიჩნევს, რომ მედიის წარმომადგენლების წინააღმდეგ განხორციელებული თითოეული ასეთი ქმედება ახალისებს ძალადობას და საგანგაშოდ სახიფათოს ხდის ჟურნალისტების სამუშაო გარემოს.
დამატებით, ონლაინმედიის ჟურნალისტების ისედაც მძიმე უფლებრივ მდგომარეობას მნიშვნელოვნად აუარესებს საქართველოს პარლამენტის თავმჯდომარის, შალვა პაპუაშვილის მიერ ბოლო სამ დღეში მიღებული, სრულიად უკანონო და დისკრიმინაციული გადაწყვეტილებები, რის შედეგადაც ონლაინმედიის რეპორტიორებს რუსული კანონის განხილვაზე პარლამენტის შენობაში არ უშვებენ“, — წერია ქარტიის განცხადებაში.
შეგახსენებთ, რომ რუსული კანონის საწინააღმდეგო აქციაზე სპეციალური დანიშნულების რაზმის წევრები ფიზიკურად გაუსწორდნენ მედია „აპრილის“ ჟურნალისტ გიორგი ბასხაჯაურს, „პუბლიკის“ ჟურნალისტ ალექსანდრე ქეშელაშვილს და „ტაბულას“ ჟურნალისტ გიორგი ბადრიძეს.