აშშ-ის სავაჭრო პალატამ წერილით მიმართა საქართველოს პრემიერ-მინისტრ ირაკლი კობახიძეს და კიდევ ერთხელ აღნიშნა, რომ შეშფოთებულები არიან ქართული ოცნების მიერ რუსული კანონის ხელახლა დაინიციირებით და დაჩქარებულ ვადებში გახმობისკენ მოუწოდა.
პალატის განცხადებაში ნათქვამია, რომ „აღნიშნული კანონი დააზარალებს უცხოური დახმარებით განხორციელებულ პროგრამებს და ამ პროგრამებში ჩართულ სამოქალაქო საზოგადოების ორგანიზაციებს, დააბრკოლებს საქართველოს მისწრაფებას ევროკავშირის წევრობისკენ და დააზიანებს ქვეყნის რეპუტაციას და, ზოგადად, საინვესტიციო გარემოს“.
წერილში ასევე ნათქვამია, რომ საქართველოს ძლიერი სამოქალაქო საზოგადოება და აქტიური ორგანიზაციები ცალსახად კარგია დემოკრატიისთვის, ხოლო ევროკავშირისა და აშშ-ის მიერ დაფინანსებული პროექტები მნიშვნელოვნად უწყობს ხელს ქვეყნის განვითარებას ეკონომიკურად, განათლების, ჯანდაცვის, საჯარო მმართველობისა და სხვა მხრივ.
„ეს პროექტები ემსახურება საქართველოს განვითარების საჭიროებებს და დაფინანსებულია საქართველოს მოკავშირეების მიერ. მათთვის „უცხო ძალის ინტერესების გამტარებლის“ იარლიყის მიკუთვნება აკნინებს ამ პროექტების სანდოობას. ბევრი ორგანიზაცია უარს იტყვის ასეთ იარლიყზე და დაიხურება, ეს კი ცალსახად საზიანო იქნება საქართველოსთვის“, — წერია განცხადებაში.
აშშ-ის სავაჭრო პალატის წერილში ციტირებულია ევროკავშირის ელჩის, პაველ ჰერჩინსკის, სიტყვები, რომ რუსული კანონი „შეუთავსებელია ევროპულ ნორმებსა და ევროპულ ღირებულებებთან“ და ხაზგასმულია, რომ „[ეს] კანონი მნიშვნელოვნად გაართულებს საქართველოს გაწევრიანებას ევროკავშირში“.
სავაჭრო პალატის განცხადებაში ასევე ნათქვამია, რომ რუსული კანონი არ შეესაბამება გამჭვირვალობის საერთაშორისო სტანდარტებს და „ბუნდოვანია, რატომ არის სამიზნე კონკრეტულად სამოქალაქო საზოგადოების ორგანიზაციები“.
„უცხოური დახმარების „უცხო გავლენად“ გამოცხადებას არაფერი აქვს საერთო გამჭვირვალობასთან. თუ მართლაც გამჭვირვალობაა ზრუნვის საგანი, უფრო შესაფერი ზომა შეიძლება ყოფილიყო ცვლილების შეტანა მართვისა და ფინანსური ანგარიშგების არსებულ წესებში.
კანონი ასევე არ არის თავსებადი გამჭვირვალობის საერთაშორისო სტანდარტებთან. თანამედროვე დემოკრატიებში, როგორებიცაა აშშ და ევროკავშირი, უცხოელ ლობისტებს ხშირად მოეთხოვებათ რეგისტრაცია, მაგრამ ამ კანონების სამიზნე არ არის სამოქალაქო საზოგადოება და ეს კანონები არ ეხება ყველა ორგანიზაციას, რომელიც უცხოეთიდან ფინანსდება. ამერიკის „უცხოელი აგენტების რეგისტრაციის აქტი“ (FARA) შეეხება ლობისტებს, საზოგადოებრივი ურთიერთობებით დაკავებულ კომპანიებსა და იურიდიულ ფირმებს, რომლებიც დაქირავებულნი არიან უცხოური ძალის მიერ მათივე ინტერესების წარმოსადგენად. სამოქალაქო საზოგადოების ორგანიზაციები ამ კანონის მოთხოვნით რეგისტრირებული ორგანიზაციების მცირე პროცენტს წარმოადგენს.
უდიდესი უარყოფითი გავლენის გათვალისწინებით, რაც შეიძლება ჰქონდეს ამ კანონს, იმ ფაქტის გათვალისწინებით, რომ იგი ეწინააღმდეგება ევროკავშირის ღირებულებებს და საერთაშორისო, დემოკრატიულ, საუკეთესო პრაქტიკას, გთხოვთ, გაიხმოთ იგი შეძლებისდაგვარად დაჩქარებულ ვადებში“, — წერია განცხადებაში.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
პროექტის შინაარსი იგივე იქნება, ოღონდ სიტყვა „აგენტს“ არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის:
- სიძულვილი, ცენზურა, გამოხატვის თავისუფლების შეზღუდვა — “ოცნების” ინიციატივა პარლამენტშია
- რის “დაცვასაც” წინასაარჩევნოდ ქართული ოცნება ცდილობს, რუსეთმა უკვე “დაიცვა” — ნახეთ როგორ
- რა წერია ხელახლა ინიცირებულ რუსულ კანონში — დეტალურად
