აშშ-ის სახელმწიფო დეპარტამენტის სპიკერმა, მეთიუ მილერმა ბრიფინგზე კიდევ ერთხელ გამოხატა ამერიკის შეერთებული შტატების შეშფოთება ქართული ოცნების მიერ 3 აპრილს ხელახლა დაინიციირებული რუსული კანონის შესახებ.
„ბოლოს, როდესაც ეს კანონპროექტი იყო შემოთავაზებული, ჩვენ ვნახეთ რამდენიმე ნაბიჯი მისი დამტკიცებისთვის, მაგრამ საბოლოოდ ის არ იქცა კანონად. ამიტომ არ ვფიქრობ, რომ ამ მომენტში წინასწარი პროგნოზების გაკეთება შეგვიძლია იმის შესახებ, თუ რა მოხდება. თუმცა, გავიმეორებ, რომ ჩვენ ძლიერ შეშფოთებულები ვართ ამ კანონით“, — განაცხადა მეთიუ მილერმა.
კითხვაზე, როგორი იქნება აშშ-ის სახელმწიფო დეპარტამენტის შესაძლო პასუხი, სპიკერმა აღნიშნა, რომ პოტენციური სანქციებისა თუ სხვა ზომების შესახებ დეპარტამენტი წინასწარ არასდროს არ საუბრობს.
„ჩვენ ძალიან მკაფიოდ განვაცხადეთ, რომ შეშფოთებულები ვართ ამ კანონით და მას ვეწინააღმდეგებით. რაც შეეხება ჩვენს შესაძლო ნაბიჯებს, წინასწარ არაფერს ვიტყვი, თუმცა, აღსანიშნავია, რომ ყოველთვის ასეა — ჩვენ წინასწარ არ ვსაუბრობთ ხოლმე პოტენციურ სანქციებზე ან სხვა ზომებზე, რომლებიც შეიძლება დავაწესოთ“, — თქვა მილერმა.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
პროექტის შინაარსი იგივე იქნება, ოღონდ სიტყვა „აგენტს“ არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის:
- სიძულვილი, ცენზურა, გამოხატვის თავისუფლების შეზღუდვა — “ოცნების” ინიციატივა პარლამენტშია
- რის “დაცვასაც” წინასაარჩევნოდ ქართული ოცნება ცდილობს, რუსეთმა უკვე “დაიცვა” — ნახეთ როგორ
- რა წერია ხელახლა ინიცირებულ რუსულ კანონში — დეტალურად
