სოციალური სამართლიანობის ცენტრი 15 აპრილს, რუსული კანონის საწინააღმდეგო აქციაზე პოლიციის მხრიდან დაშლისკენ მოწოდებას და “საპროტესტო მუხტის” ადმინისტრაციული დაკავებებით დასუსტების მცდელობას უსაფუძვლოდ მიიჩნევს.
“სამართალდამცავთა მსგავსი ქმედებები წარმოადგენს მშვიდობიანი შეკრების უფლებაში უსაფუძვლო ჩარევას და ჭარბი საპოლიციო ძალის გამოყენება ზრდის ვითარების ესკალაციისა და ფიზიკური დაპირისპირების რისკებს… მიუხედავად იმისა, რომ პროტესტი მთელი დღის განმავლობაში არ გაცდენია კანონის ფარგლებს, პოლიციამ საღამოს პერიოდში (21:43-დან) რამდენჯერმე გააფრთხილა მონაწილეები აქციის დაშლის თაობაზე, წინააღმდეგ შემთხვევაში დააანონსდა შესაბამისი იძულების ღონისძიებების გამოყენება მანიფესტანტების წინააღმდეგ”, – აღნიშნულია განცხადებაში.
განცხადებაში ასევე საუბარია დაკავებულების ცემის შესახებ გავრცელებულ ინფორმაციაზეც.
“აგრეთვე, როგორც სამინისტრო აცხადებს, ჯამში 14 პირი დააკავეს ადმინისტრაციული წესით. ადვოკატების განცხადებით, დაკავებულთა ნაწილს ფიზიკური დაზიანებები აღენიშნებათ, რაც პოლიციის მიერ დაკავებისას ძალის გამოყენების შედეგად მიიღეს. გუშინდელი დღე სახიფათო ტენდენციის კიდევ ერთი გამოვლინებაა, როდესაც სამართალდამცავი ორგანოები არსებითად მშვიდობიანი შეკრებების დროს იყენებენ ჭარბ შემზღუდავ ძალას და ხდება მონაწილეთა მასობრივი დაკავება. ამ გზით ხელისუფლება ცდილობს საპოლიციო კონტროლს დაუქვემდებაროს მშვიდობიანი შეკრების მონაწილეები და ორგანიზატორები, რაც მოქალაქეების თვითორგანიზების დასუსტებას, საზოგადოების დაშინებასა და აქტივისტების შევიწროებას ისახავს მიზნად”, — ვკითხულობთ განცხადებაში.
სოციალური სამართლიანობის ცენტრი სხვადასხვა უწყების მისამართით მოწოდებებსაც ავრცელებს:
- შინაგან საქმეთა სამინისტროს: შეწყვიტოს შეკრებების და მანიფესტაციების დროს მოქალაქეების მასობრივი დაკავების პრაქტიკა და უსაფუძვლო მოწოდებები. ამავდროულად, სავალდებულო გახდეს სამართალდამცავებისთვის მოქალაქესთან კომუნიკაციის დროს სამხრე ვიდეო-კამერების ჩართვა; ამასთანავე, დაუყოვნებლივ მოხდეს დაკავებული პირების გადაყვანა სასამართლოში და დაკავების ვადა 48 საათამდე დაუსაბუთებლად არ გახანგრძლივდეს.
- საქართველოს პარლამენტს: გაიწვიოს ინიცირებული კანონპროექტი და მის ნაცვლად, რეალურად განახორციელოს ევროინტეგრაციის გზაზე განსაზღვრული პრიორიტეტული მიმართულებებით რეფორმები;
- სპეციალურ საგამოძიებო სამსახურს: უზრუნველყოს სამართალდამცავების მხრიდან არაპროპორციული ძალის გამოყენების შემთხვევების დროული და ეფექტიანი გამოძიება.
- საქართველოს სახალხო დამცველს: განახორციელოს საპროტესტო აქციების მონიტორინგი უშუალოდ პარლამენტის მიმდებარე ტერიტორიაზე და საზოგადოებას პროაქტიულად მიაწოდოს ინფორმაცია პოლიციის მიერ ძალის გამოყენების აუცილებლობისა და პროპორციულობის შესახებ, ასევე, გააძლიეროს ძალისხმევა დაკავებულ პირთა რაოდენობის დადგენისა და მათი ადგილსამყოფელის მოძიების პროცესში.
შშს-ს ცნობით, რუსული კანონის საწინააღმდეგო მშვიდობიან აქციაზე 14 ადამიანი დააკავეს. უწყების მტკიცებით, გაფრთხილების მიუხედავად, მათ “არ გაითვალისწინეს კანონიერი მოთხოვნა, დაარღვიეს საზოგადოებრივი წესრიგი, სამართალდამცველებს გაუწიეს წინააღმდეგობა და მიაყენეს სიტყვიერი შეურაცხყოფა”.
შეგახსენებთ, რომ იურიდიულ საკითხთა კომიტეტმა რუსულ კანონს პირველი მოსმენით მხარი გუშინ, 15 აპრილს დაუჭირა. სწორედ ამ განხილვის პარალელურად მიმდინარეობდა მოქალაქეების საპროტესტო აქცია „კი ევროპას! არა რუსულ კანონს!“.
მშვიდობიანი პროტესტისას აქციაზე მობილიზებულნი იყვნენ სპეცდანიშნულების რაზმები, შსს-მ კი ორგანიზატორებსა და მონაწილეებს მოუწოდა, არ გამცდარიყვნენ გამოხატვის თავისუფლებისა და მშვიდობიანი შეკრების კანონით დადგენილ ნორმებს, წინააღმდეგ შემთხვევაში „სამართალდარღვევის ნებისმიერი ფაქტი პოლიციის მხრიდან, კანონის ფარგლებში, დაუყოვნებლივ იქნება აღკვეთილი“.
საპროტესტო აქციაზე სპეცრაზმის გამოჩენის შემდეგ, ომბუდსმენმა განცხადება გაავრცელა, რომელშიც მან აღნიშნა, რომ “არ იკვეთება შეკრების კანონსაწინააღმდეგო ხასიათი, შესაბამისად არ არსებობს შეკრების მონაწილეთა კონსტიტუციურ უფლებაში ჩარევის საფუძველი”.
არაერთი კრიტიკული განცხადებისა და საზოგადოების პროტესტის ფონზე, დღეს, 16 აპრილს, პარლამენტის პლენარულ სხდომაზე რუსული კანონი პირველი მოსმენით განიხილება. სესიის პარალელურად, პარლამენტის უკან, 12:00-ზე პირველი საპროტესტო აქცია დაიწყება, ხოლო მეორე აქცია 19:00-ზე, პარლამენტის წინ გაიმართება.
დღეს, ისევე როგორც 15 აპრილს, პარლამენტში არ უშვებენ ონლაინ მედიის ჟურნალისტებს. პაპუაშვილმა ეს იმით ახსნა, რომ ისინი საკანონმდებლო ორგანოში პროტესტის გამოსახატად იკრიბებიან. მისივე თქმით, “ეს არ არის სივრცე აქციების ჩასატარებლად”. დღესვე პარლამენტში უსაფრთხოების ყვითელი დონე მოქმედებს, რის შედეგადაც, ვიზიტორებს საკანონმდებლო ორგანოში შესვლა ეზღუდებათ.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
პროექტის შინაარსი იგივე იქნება, ოღონდ სიტყვა „აგენტს“ არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის:
- სიძულვილი, ცენზურა, გამოხატვის თავისუფლების შეზღუდვა — “ოცნების” ინიციატივა პარლამენტშია
- რის “დაცვასაც” წინასაარჩევნოდ ქართული ოცნება ცდილობს, რუსეთმა უკვე “დაიცვა” — ნახეთ როგორ
- რა წერია ხელახლა ინიცირებულ რუსულ კანონში — დეტალურად
