საქართველოში გერმანიის საელჩომ გერმანიის კანცლერის, ოლაფ შოლცის განცხადების ქართული თარგმანი გამოაქვეყნა, რომელშიც შოლცი რუსულ კანონს აკრიტიკებს და იმედს გამოთქვამს, რომ კანონს ამ სახით არ მიიღებენ. საელჩო კიდევ ერთხელ განმარტავს, რა განაცხადა მან საქართველოს პრემიერმინისტრთან, ირაკლი კობახიძესთან ბრიფინგისას.
“მინდა, კიდევ ერთხელ ვთქვა: ჩვენ, ისევე როგორც მთელი ევროკავშირი, კრიტიკულები ვიყავით უცხოური გავლენის ორგანიზაციებთან დაკავშირებულ კანონთან მიმართებაში და როდესაც იგი შეაჩერეს, დიდი იმედი გვქონდა, რომ აღარ განიხილებოდა. ამჯერად ახალი საკანონმდებლო ინიციატივაა, რომელიც იმავე მიმართულებით მიდის. ჩვენი კრიტიკა, წინა პერიოდის მსგავსად, იგივე რჩება და ვიმედოვნებთ, რომ ამ კანონს ასეთი სახით არ მიიღებენ და ახლაც გათვალისწინებული იქნება კრიტიკული განცხადებები […]
აღსანიშნავია, რომ არასამთავრო ორგანიზაციებისა და მედიების დაფინანსება უკვე გამჭვირვალეა; ინფორმაცია ორგანიზაციების დაფინანსების შესახებ, მათ ვებგვერდებზეა განთავსებული და ნებისმიერი ადამიანისთვისაა ხელმისაწვდომი. ამასთან, ორგანიზაციებს ვალდებულება აქვთ, დროის გარკვეულ პერიოდში, შეავსონ და წარადგინონ ფინანსური დეკლარაციები, რომლებზეც წვდომა ფინანსთა სამინისტროსა და სხვა შესაბამის უწყებებს აქვთ.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
მდინარაძეს არ დაუმალავს, რომ პროექტის შინაარსი იგივე იქნება, ოღონდ სიტყვა “აგენტს” არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის:
- სიძულვილი, ცენზურა, გამოხატვის თავისუფლების შეზღუდვა — “ოცნების” ინიციატივა პარლამენტშია
- რის “დაცვასაც” წინასაარჩევნოდ ქართული ოცნება ცდილობს, რუსეთმა უკვე “დაიცვა” — ნახეთ როგორ
- რა წერია ხელახლა ინიცირებულ რუსულ კანონში — დეტალურად
