სალომე ზურაბიშვილმა ლაზარე გრიგორიადისის შეწყალება გადაწყვიტა. ამის შესახებ პრეზიდენტმა ინგა გრიგოლიასთან ინტერვიუს დროს განაცხადა და ხაზი გაუსვა, რომ შეწყალების თემაზე ხელისუფლების მუქარა მიუღებელია.
“ეს გადაწყვეტილება მე მივიღე დღეს, ამ დილით, 10 საათზე. არ დაველოდე არც არავის მოწოდებას, ასე რომ ქულებს ვერავინ ჩაითვლის, არც მუქარებს, იმიტომ რომ მე ჩემი სინდისის წინაშე ჩავთვალე, რომ არ შეიძლება ეს ახალგაზრდა 9 წლით დაისაჯოს. ხელი ჯერ არ მომიწერია პროცედურების გამო, მაგრამ გადაწყვეტილება იყო მიღებული, ყველანაირი გამოთქმული აზრის გარეშე”, – განაცხადა ზურაბიშვილმა.
პრეზიდენტმა თქვა ისიც, რომ იქნება მცდელობა, რომ, როგორც მთავარსარდალი, პოლიციასთან დააპირისპირონ.
“მე მინდა, პოლიციას ვუთხრა, რომ ეს არანაირი წაქეზება არ არის, აქ არ არის ის მტკიცებულებები, ეს არის ჩემი აზრი, რომ ასე მოხდა. მინდა ყველას მოვუწოდო, ამ ქვეყანაში პოლიცია არათუ საპატივცემულოა და ძალიან მნიშვნელოვანი, არამედ იმ პროცესში, რომელშიც ახლა შევდივართ, პოლიციის როლი იქნება ძალიან მნიშვნელოვანი. ისინი იქნებიან ჩვენი ქვეყნის სტაბილურობის სადარაჯოზე. მიდის მცდელობა, რომ საზოგადოება გაყონ, დააჯახონ, გაიმეორონ წარსულიდან რაღაც ძალიან ცუდი ფურცლები და ამ ყველაფერში ჩვენი დამცველი არის და იქნება პოლიცია და წინასწარ მინდა, გამოვუცხადო ჩემი პატივისცემა, იმედი და რწმენა, რომ ისინი იქნებიან, სადაც სახელმწიფოს და ქვეყანას სჭირდება”.
მარტის აქციების საქმეზე დაკავებულ ლაზარე გრიგორიადისს სასამართლომ დღეს 9-წლიანი პატიმრობა მიუსაჯა.