მიზიდულობა ყოველთვის ვერ ეტევა იმ მკაცრ კატეგორიებში, რომლებსაც გვასწავლიან. პანსექსუალობა ერთ-ერთი ტერმინია, რომელიც სხვადასხვა გენდერის ადამიანების მიმართ შესაძლო მიზიდულობას აღწერს, თუმცა მას ხშირად არასწორად იგებენ ან მარტივ ლოზუნგამდე დაჰყავთ.
ეს სტატია განმარტავს, რას ნიშნავს პანსექსუალობა, როგორ იკვეთება ის სხვა ორიენტაციებთან და როგორ შეუძლიათ ადამიანებს სტერეოტიპების გარეშე გამოიკვლიონ ეს იდენტობა ან მხარი დაუჭირონ მას.
სტატიის მიზანი არ არის ისეთი ერთი განმარტების შექმნა, რომელიც ყველამ უცვლელად უნდა გაიმეოროს. იდენტობის აღმნიშვნელი ენა ყველაზე სასარგებლო მაშინაა, როდესაც ადგილს უთმობს განსხვავებულ გამოცდილებებს და, ამავე დროს, ადამიანებს საკუთარი გამოცდილების მკაფიოდ გადმოცემის საშუალებას აძლევს.
რას ნიშნავს პანსექსუალობა?
პანსექსუალობა სექსუალური ორიენტაციაა. პანსექსუალ ადამიანს შეიძლება სექსუალური მიზიდულობა ნებისმიერი გენდერის ადამიანის მიმართ ჰქონდეს, ან გრძნობდეს, რომ გენდერი არ განსაზღვრავს, ვის მიმართ შეიძლება გაუჩნდეს მიზიდულობა. ეს შეიძლება მოიცავდეს ქალებს, კაცებს, არაბინარულ ადამიანებსა და სხვა გენდერულ იდენტობებს.
აქ მნიშვნელოვანია სიტყვა „შეიძლება“. ორიენტაცია აღწერს, ვის მიმართ შეიძლება წარმოიშვას მიზიდულობა; ეს არ ნიშნავს, რომ მიზიდულობა ავტომატურად, მუდმივად ან ყველა კონკრეტული ადამიანის მიმართ წარმოიშობა. პანსექსუალ ადამიანებსაც აქვთ საკუთარი პრეფერენციები, საზღვრები და თავსებადობის კრიტერიუმები.
ზოგიერთმა ადამიანმა შეიძლება სიტყვა „პანსექსუალი“ სხვა სიტყვასთან ერთად გამოიყენოს, მაგალითად, „ქვიართან“, ან მხოლოდ გარკვეულ სიტუაციებში მიანიჭოს მას უპირატესობა.
► პანსექსუალობა ნიშნავს, რომ გენდერი მიზიდულობის აუცილებელი საზღვარი არ არის.
ნიშნავს ეს, რომ გენდერს საერთოდ არ აქვს მნიშვნელობა?
ზოგი პანსექსუალი ადამიანისთვის გენდერი თითქმის ან საერთოდ არ ასრულებს როლს იმაში, წარმოიქმნება თუ არა მიზიდულობა სხვა ადამიანის მიმართ. სხვები გენდერს მკაფიოდ აღიქვამენ და შეიძლება მას ადამიანის იდენტობის მნიშვნელოვან ნაწილადაც მიიჩნევდნენ, თუმცა მას არ აღიქვამენ საზღვრად, რომელიც გარკვეული ადამიანების მიმართ მიზიდულობას გამორიცხავს.
ამიტომ „გენდერისგან განურჩევლად“ არ ნიშნავს, რომ სხვა ადამიანის გენდერი უნდა უგულებელვყოთ. სახელები, ნაცვალსახელები და იდენტობები კვლავ პატივისცემას იმსახურებენ. მიზიდულობა არც ყველა გენდერის მიმართ უნდა წარმოიქმნას თანაბარი სიხშირით ან სიმძაფრით: გარკვეული კანონზომიერებები და პრეფერენციები პანსექსუალობას ავტომატურად არ აუქმებს.
ზოგის წარსულ ურთიერთობებში სხვადასხვა გენდერის ადამიანები შეიძლება არათანაბრად იყვნენ წარმოდგენილნი, მათ შორის გარემოცვის, შესაძლებლობის, უსაფრთხოების ან შემთხვევითობის გამო. მხოლოდ ურთიერთობების ისტორია ვერ გვეტყვის, როგორ განიცდის ადამიანი მიზიდულობას ან ვის მიმართ შეიძლება გაუჩნდეს მიზიდულობა მომავალში.
► სხვადასხვა გენდერის ადამიანების მიმართ მიზიდულობის განცდა ავტომატურად არ ათავისუფლებს ადამიანს სექსიზმისგან, ტრანსფობიისგან ან სხვა წინასწარგანწყობებისგან. პატივისცემა ქცევითაც გამოიხატება.
სექსუალური, რომანტიკული და მიზიდულობის სხვა ფორმები
სექსუალური მიზიდულობა კონკრეტული ადამიანის მიმართ სექსუალურ ინტერესს ნიშნავს. ის განსხვავდება ლიბიდოსგან, რომელიც ზოგადი სექსუალური სურვილია. არც მიზიდულობა და არც ლიბიდო არ ავალდებულებს ადამიანს, მის მიხედვით იმოქმედოს.
რომანტიკული მიზიდულობა, ჩვეულებრივ, გულისხმობს სიახლოვის ან ისეთი ურთიერთობის სურვილს, რომელსაც ადამიანი რომანტიკულად აღიქვამს. „პანსექსუალი“ ძირითადად სექსუალურ ორიენტაციას აღწერს, ხოლო „პანრომანტიკული“ — ნებისმიერი გენდერის ადამიანის მიმართ შესაძლო რომანტიკულ მიზიდულობას. ადამიანმა შეიძლება ორივე ტერმინი გამოიყენოს, მხოლოდ ერთი ან არცერთი. ზოგიერთმა ადამიანმა და ორგანიზაციამ ტერმინში „პანსექსუალი“ სექსუალურთან ერთად რომანტიკული ან ემოციური მიზიდულობაც შეიძლება მოიაზროს; სხვები სექსუალურ და რომანტიკულ ორიენტაციებს ცალკე ტერმინებით აღწერენ.
ფსიქოლოგიაში მიზიდულობის დაყოფის მოდელი (ინგლ. Split Attraction Model) სექსუალურ და რომანტიკულ ორიენტაციებს ერთმანეთთან დაკავშირებულ, თუმცა განსხვავებულ ცნებებად განიხილავს. ის განსაკუთრებით სასარგებლოა ზოგიერთი ასექსუალური და არომანტიკული სპექტრის ადამიანისთვის, თუმცა საკუთარი გრძნობების ამგვარად გაანალიზება არავის ევალება.
ადამიანებმა შეიძლება ასევე განიცადონ ესთეტიკური მიზიდულობა, მოსიყვარულე შეხების სურვილი ან ემოციური სიახლოვე სექსუალური თუ რომანტიკული სურვილის გარეშე. ეს განსხვავებები ზოგს საკუთარი გამოცდილების აღწერაში ეხმარება, თუმცა ისინი დამხმარე საშუალებებია და არა სისტემა, რომელიც ყველამ უნდა მიიღოს.
შესაბამისად, ადამიანის ორიენტაციის ცოდნა არ გვეუბნება, სურს თუ არა მას სექსი, რომანტიკული ურთიერთობა, ქორწინება, შვილები, ერთი პარტნიორი, რამდენიმე პარტნიორი ან საერთოდ არანაირი ურთიერთობა. ამ სურვილებზე ცალკე საუბარია საჭირო.
პანსექსუალობა და ბისექსუალობა — მსგავსებები და განსხვავებები
ბისექსუალობა ხშირად განიმარტება, როგორც ერთზე მეტი გენდერის ადამიანის მიმართ მიზიდულობა, ან საკუთარი და სხვა გენდერების ადამიანების მიმართ მიზიდულობა. მიუხედავად იმისა, რომ წინსართი „ბი-“ სიტყვასიტყვით „ორს“ ნიშნავს, თანამედროვე განმარტებებში ეს „ორი“ ხშირად გულისხმობს საკუთარი და საკუთარი გენდერისგან განსხვავებული გენდერების მიმართ მიზიდულობას და არა — მხოლოდ ქალებისა და კაცების მიმართ მიზიდულობას. ზოგი ბისექსუალი ადამიანი ამ ტერმინით მართლაც სწორედ ქალებისა და კაცების მიმართ მიზიდულობას აღწერს, სხვებისთვის კი ის არაბინარული ადამიანების მიმართ შესაძლო მიზიდულობასაც მოიცავს. ამიტომ ბისექსუალობა თავისთავად მხოლოდ ბინარული გენდერებით არ შემოიფარგლება.
პანსექსუალობა ხშირად გაგებულია, როგორც ნებისმიერი გენდერის ადამიანის მიმართ მიზიდულობა ან ისეთი მიზიდულობა, რომელსაც გენდერი არ ზღუდავს. ეს განმარტებები ერთმანეთს კვეთს: ბისექსუალმა ადამიანმა შეიძლება იგრძნოს, რომ გენდერი მის მიზიდულობაზე გავლენას არ ახდენს, ხოლო პანსექსუალმა ადამიანმა შეიძლება გენდერი შეამჩნიოს, მაგრამ საზღვრად არ აღიქვას.
საკუთარი სექსუალობის აღსაწერი ტერმინის არჩევანი შეიძლება ასახავდეს პირად ისტორიას, თემთან კავშირს, პოლიტიკურ შეხედულებებს, ტერმინის ნაცნობობას ან, უბრალოდ, იმას, რომელი სიტყვა ეჩვენება ადამიანს ყველაზე ზუსტად. ზოგი ორივე ტერმინს იყენებს ან თავს უფრო ფართო bi+ თემის ნაწილად მიიჩნევს.
ერთი ადამიანისთვის „პანსექსუალი“ შეიძლება ხაზს უსვამდეს, რომ გენდერი საზღვარი არ არის; მეორისთვის „ბისექსუალი“ შეიძლება ხანგრძლივ იდენტობასა და მოძრაობასთან კავშირს გამოხატავდეს. სხვებს ამ ორ ტერმინს შორის ზუსტი საზღვრის დადგენა არ სჭირდებათ, რათა ორივეს პატივი სცენ. არც ერთი იდენტობა არ არის მეორეზე უფრო ინკლუზიური ან პროგრესული. ერთი ტერმინის პატივისცემა არ მოითხოვს მეორის მოძველებულად ან გამომრიცხველად გამოცხადებას.
► თანაკვეთის არსებობა არცერთ ტერმინს ზედმეტს არ ხდის; ის ადამიანებს მიზიდულობის აღსაწერად ერთზე მეტ სასარგებლო საშუალებას აძლევს.
როგორ გავიგო, ვარ თუ არა პანსექსუალი?
პანსექსუალობის დასადგენი ტესტი არ არსებობს. ამის ნაცვლად, ადამიანს შეუძლია დროთა განმავლობაში დააკვირდეს საკუთარ მიზიდულობას და იმას, რომელი სიტყვები შეესაბამება მის გამოცდილებას. საკუთარი თავისთვის დასასმელი სასარგებლო კითხვები შეიძლება იყოს:
- შემიძლია თუ არა წარმოვიდგინო, რომ სხვადასხვა გენდერის ადამიანების მიმართ მიზიდულობას ვიგრძნობ?
- არის თუ არა გენდერი ჩემი მიზიდულობისთვის საზღვარი, ერთ-ერთი ფაქტორი თუ მას საერთოდ არ აქვს მნიშვნელობა?
- მეხმარება თუ არა სიტყვა „პანსექსუალი“ საკუთარი თავის გაგებაში ან სხვებთან კომუნიკაციაში?
- ექნება თუ არა ამ იარლიყს ჩემთვის მნიშვნელობა, მიუხედავად იმისა, ვისთან მექნება ურთიერთობა?
ეს კითხვები დასაფიქრებელი მინიშნებებია და არა — ქულების დასაგროვებელი კრიტერიუმები. ორიენტაციის დასასაბუთებლად არავის სჭირდება სხვადასხვა გენდერის ადამიანებთან ურთიერთობის გამოცდილება.
ოჯახისგან, რელიგიისგან, მედიისგან ან თანატოლებისგან მიღებული მოლოდინების პირადი გრძნობებისგან გამიჯვნას შეიძლება დრო დასჭირდეს. დღიურის წარმოება, სხვების პირადი გამოცდილებების კითხვა ან მხარდამჭერ თერაპევტთან საუბარი შეიძლება სასარგებლო იყოს, თუ მიზანი საკუთარი თავის კვლევაა და არა — კონკრეტული პასუხისკენ ზეწოლა.
თქვენი ორიენტაციის აღსაწერი ტერმინი შეიძლება უცვლელი დარჩეს, საკუთარი თავის უკეთ გაცნობასთან ერთად შეიცვალოს ან საერთოდ არასდროს გახდეს საჭირო. მოგვიანებით ცვლილება არ ნიშნავს, რომ წინა იდენტობა არაგულწრფელი იყო; ადამიანს უფლება აქვს, გამოიყენოს ის ენა, რომელიც ახლა მისთვის ყველაზე შესაფერისია.
გავრცელებული მითები პანსექსუალობის შესახებ
მითები ხშირად ურევს ერთმანეთში შესაძლო მიზიდულობის დიაპაზონს და პიროვნულ თვისებებს, ქცევას ან ურთიერთობის არჩევანს. ამ ცნებების გამიჯვნა მრავალ გავრცელებულ გაუგებრობას აგვარიდებს.
მითებს პრაქტიკული უარყოფითი შედეგებიც შეიძლება ჰქონდეს: ადამიანებმა შეიძლება პანსექსუალ პარტნიორს არ ენდონ, მისი გულწრფელი საუბარი უგულებელყონ ან მის პირად საზღვრებს ნაკლებად სერიოზულად მოეკიდონ.
- მითი #1: პანსექსუალ ადამიანებს ყველა იზიდავთ — რეალობა: ნებისმიერი გენდერის ადამიანის მიმართ შესაძლო მიზიდულობა არ აუქმებს შერჩევითობას. ურთიერთმიზიდულობა, პრეფერენციები, საზღვრები და შეუთავსებლობა კვლავ მნიშვნელოვანია;
- მითი #2: პანსექსუალი ადამიანები სექსუალურად თავაშვებულები ან არაერთგულები არიან — რეალობა: ორიენტაცია არ განსაზღვრავს, რამდენი პარტნიორი სურს ადამიანს. ერთგულება ურთიერთობის შეთანხმებების პატივისცემაზეა დამოკიდებული და არა იმაზე, პოტენციურად რამდენი გენდერის ადამიანი შეიძლება იზიდავდეს ვინმეს;
- მითი #3: პანსექსუალობა ფაზა ან დროებითი მოდაა — რეალობა: გაზრდილმა ხილვადობამ შეიძლება სიტყვას სიახლის შთაბეჭდილება შეუქმნას. ზოგი ადამიანი საკუთარი თავის აღსაწერ ტერმინს იცვლის, თუმცა ცვლილება არ ამტკიცებს, რომ ყველა იდენტობა დროებითი ან არაგულწრფელია;
- მითი #4: ყველა პანსექსუალი ადამიანი „გენდერს ვერ ხედავს“ — რეალობა: ზოგი საკუთარ გამოცდილებას ასე აღწერს, სხვებისთვის კი გენდერი მნიშვნელოვანია. ვერცერთი ფრაზა ვერ ასახავს ყველა პანსექსუალი ადამიანის გამოცდილებას;
- მითი #5: ტრანს და არაბინარულ ადამიანებს მხოლოდ პანსექსუალობა მოიცავს — რეალობა: მრავალი ორიენტაცია შეიძლება მოიცავდეს ტრანს და არაბინარული ადამიანების მიმართ მიზიდულობას. მაგალითად, ბისექსუალობა ავტომატურად არც მხოლოდ ბინარული გენდერებით შემოიფარგლება და არც ტრანს ადამიანებს გამორიცხავს; ტრანს ადამიანები არ არიან ცალკე კატეგორია, რომლის მოცვაც მხოლოდ პანსექსუალობას შეუძლია;
- მითი #6: პანსექსუალი ადამიანის პარტნიორი მის რეალურ ორიენტაციას ამჟღავნებს — რეალობა: ურთიერთობა ერთ არჩეულ პარტნიორს გვიჩვენებს და არა — შესაძლო მიზიდულობის სრულ დიაპაზონს. პანსექსუალი ადამიანი პანსექსუალად რჩება, ვისთანაც არ უნდა ჰქონდეს ურთიერთობა.
ქამინგაუთი და უსაფრთხოება
ე.წ. „ქამინგაუთი“ (ინგლ. Coming out; პირდაპირი მნიშვნელობით „გამოსვლა“) ნიშნავს გადაწყვეტილებას, სხვებს გაუზიარო საკუთარი გენდერული თუ სექსუალური იდენტობა, რომლის შესახებაც მათ შეიძლება არ იცოდნენ. ეს შეიძლება მოხდეს ოჯახის წევრებთან, მეგობრებთან, პარტნიორებთან, კოლეგებთან ან სპეციალისტებთან, და ადამიანი შეიძლება ამ კუთხით ცხოვრების ერთ სფეროში ღია იყოს, მეორეში კი — ამაზე ღიად არ ისაუბროს.
ქამინგაუთი არავის ევალება. საკუთარი იდენტობის გამჟღავნებამდე გონივრულია იმაზე დაფიქრება, შეიძლება თუ არა სხვების რეაქციამ გავლენა მოახდინოს თქვენს საცხოვრებელზე, ფინანსებზე, განათლებაზე, სამსახურზე, ჯანდაცვაზე, პირადი ცხოვრების ხელშეუხებლობასა თუ ფიზიკურ უსაფრთხოებაზე. მოცდა შეიძლება საკუთარი თავის დაცვა იყოს და არა — სირცხვილი.
ქამინგაუთისას თქვენი იდენტობის განმარტება შეიძლება მოკლე იყოს, მაგალითად: „მე პანსექსუალი ვარ. ჩემთვის ეს ნიშნავს, რომ გენდერი არ ზღუდავს, ვინ შეიძლება მიზიდავდეს“. ადამიანს ასევე შეუძლია კონფიდენციალურობა მოითხოვოს ან უარი თქვას კითხვებზე სექსის, სხეულებისა და ურთიერთობების შესახებ.
► ქამინგაუთი ადამიანს სექსუალური ორიენტაციის მთელი თემის სხვისთვის სწავლების ვალდებულებას არ აკისრებს. მას შეუძლია, მხოლოდ ის გააზიაროს, რაც საჭიროდ მიაჩნია, და სხვებს ინფორმაციის დამოუკიდებლად მოძიებისკენ მოუწოდოს.
შესაძლოა, პარტნიორთან ქამინგაუთისას მან ეს ქმედება შეცდომით უკმაყოფილების ნიშნად ან ურთიერთობის შეცვლის მოთხოვნად აღიქვას. გახსოვდეთ, რომ ორიენტაცია პარტნიორებს შორის არსებულ შეთანხმებებს არ ცვლის; მისი გაზიარება შეიძლება, უბრალოდ, იმას ნიშნავდეს, რომ ადამიანს სურს, მას უფრო ზუსტად იცნობდნენ.
ციფრულ სივრცეში ქამინგაუთიც იმავე სიფრთხილეს მოითხოვს. შეტყობინება შეიძლება სხვას გადაუგზავნონ, შეტყობინების ტექსტი საერთო მოწყობილობაზე გამოჩნდეს, პოსტი კი გაუთვალისწინებელ აუდიტორიამდე მივიდეს. თუ მტრული რეაქცია მოსალოდნელია, შესაძლოა, უმჯობესი იყოს სანდო ადამიანის, უსაფრთხო ადგილისა და პრაქტიკული მხარდაჭერის წინასწარ განსაზღვრა.
► ქამინგაუთი პირადი არჩევანია და არა — გამოცდა, რომლის გავლაც საკუთარი იდენტობით სიამაყის დასამტკიცებლად გჭირდებათ.
როგორ დავუჭიროთ მხარი პანსექსუალ ადამიანს?
პირველ ყოვლისა, მხარდაჭერა იწყება ადამიანის ნათქვამის დაჯერებით. მარტივი პასუხი — „მადლობა, რომ მენდე“ — ხშირად უფრო სასარგებლოა, ვიდრე დეტალური ახსნა-განმარტების მოთხოვნა.
არჩეული ტერმინის პატივისცემა არ მოითხოვს ყველა დეტალის შეთანხმებას იმის შესახებ, თუ სად მთავრდება პანსექსუალობა და სად იწყება ბისექსუალობა. თუ ეს სიტყვა ადამიანისთვის მნიშვნელოვანია, მისი თქვენთვის სასურველი ტერმინით ჩანაცვლება მხარდაჭერას შესწორებად აქცევს. ამიტომ:
- გამოიყენეთ ის ტერმინოლოგია, რომელსაც ადამიანი თავად ირჩევს საკუთარი თავის აღსაწერად;
- შეინახეთ მისი იდენტობა კონფიდენციალურად, თუკი მას გამჟღავნების ნებართვა არ მოუცია;
- მოერიდეთ შემაწუხებელ პირად კითხვებსა და სექსუალიზებულ სტერეოტიპებს;
- შეეწინააღმდეგეთ დეზინფორმაციას და სიძულვილის ენას მაშინაც, როცა პანსექსუალი ადამიანი იქ არ იმყოფება;
- ინფორმაცია თავად მოიძიეთ და მიეცით ადამიანს კითხვებზე უარის თქმის შესაძლებლობა.
თუ შეცდომას დაუშვებთ, მალევე გამოასწორეთ და შემდგომში გაითვალისწინეთ. კარგი მოკავშირეობა თანმიმდევრული პატივისცემით, კონფიდენციალურობითა და სწავლის სურვილით ვლინდება და არა — უნაკლო ტერმინოლოგიით.
სკოლებს, სამუშაო ადგილებს, ჯანდაცვის დაწესებულებებსა და სათემო ჯგუფებს შეუძლიათ უფრო ინკლუზიური გარემო შექმნან, თანმიმდევრულად აღასრულონ შევიწროების საწინააღმდეგო წესები და არ ივარაუდონ, რომ ყველა LGBTQ+ ადამიანი გეი ან ლესბოსელია. ხილვადობა ყოველთვის ნებაყოფლობითი უნდა დარჩეს.
პანსექსუალების დროშა და ტერმინის მოკლე ისტორია
ბერძნულიდან მომდინარე წინსართი „პან-“ ნიშნავს „ყველას“ ან „ყოველს“. სიტყვა „პანსექსუალის“ სხვადასხვა ფორმა ინგლისურ ენაში მეოცე საუკუნის დასაწყისში გამოჩნდა, თუმცა ყველაზე ადრეული დაფიქსირებული მნიშვნელობა სექსუალური ინსტინქტის შესახებ ფსიქოლოგიურ თეორიებს ეხებოდა და არა — ორიენტაციის თანამედროვე განმარტებას.
- იხილეთ აგრეთვე პანსექსუალების დროშა — ფერები და მათი მნიშვნელობა
ამ ტერმინის იდენტობასთან დაკავშირებული მნიშვნელობა მოგვიანებით, ენის ცვლილებისა და LGBTQ+ თემში გამოყენების შედეგად განვითარდა. ეს ისტორია მნიშვნელოვანია, რადგან ძველ ლექსიკონში მოცემული მაგალითი შეიძლება არ აღწერდეს იმას, რასაც დღეს „პანსექსუალი“ გულისხმობს.
პანსექსუალების დროშას სამი ჰორიზონტალური ზოლი აქვს და ინტერნეტში 2010-იანი წლების დასაწყისში გავრცელდა; მის შექმნას ხშირად Tumblr-ის მომხმარებელ Jasper V-ს მიაწერენ. ფერები, როგორც წესი, ასე აიხსნება:
- ვარდისფერი — ქალების მიმართ მიზიდულობა;
- ყვითელი — არაბინარული და ბინარული სისტემის მიღმა მყოფი სხვა ადამიანების მიმართ მიზიდულობა;
- ლურჯი — კაცების მიმართ მიზიდულობა.
დროშა საერთო სიმბოლოს გვთავაზობს, თუმცა მისი გამოყენება თემთან კუთვნილების აუცილებელი პირობა არ არის. ეს ფერები ფართო სათემო სიმბოლოებია და არა — გენდერის სრული კლასიფიკაცია. პრაიდის დროშები, ჩვეულებრივ, ფართო აღიარებას განმეორებითი გამოყენებით იძენენ და არა — რომელიმე ცენტრალური ორგანოს თანხმობით, ამიტომ მათი ზუსტი წარმოშობის შესახებ ვერსიები შეიძლება განსხვავდებოდეს.
ზოგი პანსექსუალი ადამიანი ამ დროშას პრაიდის ღონისძიებებზე, ინტერნეტში ან პირად სივრცეში იყენებს; სხვები ცისარტყელას დროშას ან საერთოდ არანაირ სიმბოლოს ამჯობინებენ. დროშის გამოყენება არჩევანია და არა — იდენტობის დამადასტურებელი მტკიცებულება.
► პანსექსუალობა გენდერით შეუზღუდავი მიზიდულობის დასახელების ერთ-ერთი გზაა. ის არ განსაზღვრავს ადამიანის ქცევას, ურთიერთობებსა თუ ხასიათს.
ტერმინები საკუთარი თავის გასაგებად შექმნილი ინსტრუმენტებია და არა — გარედან თავს მოხვეული ჩარჩოები. ადამიანებს თავად უნდა შეეძლოთ საკუთარი გამოცდილების აღწერა.
პანსექსუალობის გაგება არ მოითხოვს არც სრულყოფილ ტერმინოლოგიას და არც ყველა განმარტებაზე შეთანხმებას. ის მოითხოვს ცნობისმოყვარეობას პირად სივრცეში შეჭრის გარეშე და პატივისცემას მტკიცებულებების მოთხოვნის გარეშე.
წყაროები: