შერიგებისა და სამოქალაქო თანასწორობის საკითხებში სახელმწიფო მინისტრის მრჩეველმა, ივლიანე ხაინდრავამ თანამდებობა დატოვა. ინფორმაცია ამის შესახებ მან მედია აპრილს დაუდასტურა.
ივლიანე ხაინდრავას თქმით, თანამდებობის დატოვების მიზეზი გახდა ის ვითარება, რომლამდეც მივიდა ქვეყანა.
“მე საკმაოდ ბევრი ვიცხოვრე და ვიცი, დაუშვებლად მიმაჩნია ის დაპირისპირება, რომელიც შეიქმნა საზოგადოებაში და რომლის თავიდან აცილება შესაძლებელი და საჭირო იყო”, — აცხადებს ხაინდრავა.
მას ასევე ვკითხეთ, რას ფიქრობს რუსულ კანონზე, რაზეც გვიპასუხა:
“მე მაგას რუსულ კანონს არ ვუძახი, ეს არის კანონი, რომელიც არის. თუმცა ამ კანონმა გამოიწვია ის, რაც გამოიწვია. შეიძლებოდა ამის თავიდან არიდება და აუცილებელიც იყო. მე ვფიქრობ, რომ მეორედ ეს კანონი შემოსატანი არ იყო, რადგანაც პირველად ჩვენ ვნახეთ საზოგადოების რეაქცია”.
- რუსულ კანონთან დაკავშირებული ყველა სიახლე ერთ გვერდზე — თვალი ადევნეთ მედია აპრილის განახლებად ინფორმაციას: ხალხი რუსული კანონის წინააღმდეგ.
12 მაისს მოქალაქეები პარლამენტთან შეიკრიბნენ აქციაზე “გავათენოთ საქართველოსთვის”. მშვიდობიანი შეკრება მთელი ღამის განმავლობაში გრძელდებოდა და აქციის მონაწილეები მღეროდნენ, ცეკვავდნენ, თამაშობდნენ. დაახლოებით 06:00 საათისთვის შინაგან საქმეთა პარლამენტთან მივიდა შინაგან საქმეთა სამინისტროს სხვადასხვა დანაყოფი და მიუხედავად იმისა, რომ მოქალაქეები პარლამენტის შესასვლელებს არ ბლოკავდნენ, აქციის მონაწილეები ტერიტორიიდან ძალის გამოყენებით გაიყვანა. პარალელურად, პარლამენტის ეზოში სახანძროს მანქანა დააყენეს, რის გამოც მედია და მოქალაქეები საკანონმდებლო ორგანოში მისულ დეპუტატებს ვერ ხედავდნენ. სანამ რუსული კანონის მხარდამჭერები პარლამენტში შედიოდნენ, შსს-ის სხვადასხვა დეპარტამენტის წარმომადგენლებმა აქციის მონაწილეებზე იძალადეს: არსებობს არაერთი კადრი, სადაც ჩანს, როგორ უსწორდებიან ფიზიკურად მოქალაქეებს. შინაგან საქმეთა სამინისტროს განცხადებით, დაკავებულია 20 ადამიანი, მათ შორის 2 ამერიკის მოქალაქე, ხოლო 1 — რუსეთის. ადვოკატების ინფორმაციით, დაკავებულთა უმრავლესობა ნაცემია, ზოგიერთ დაკავებულს კი ამ დრომდე ეძებენ.
კომიტეტის სხდომა კი, რომელზე შესვლაც ქართული ოცნების დეპუტატებს პოლიციის დახმარებით მოუწიათ, ერთი წუთისა და 7 წამის განმავლობაში გრძელდებოდა. კადრებში ჩანს, რომ კენჭისყრის დროს დეპუტატების ნაწილი ჯერ კიდევ შემოდის დარბაზში, ნაწილი კი მაგიდამდეც არ არის მისული. ოხანაშვილის კომიტეტმა რუსულ კანონს მესამე მოსმენით მხარი დაუჭირა. სხდომას არ ესწრებოდა ოპოზიცია, რადგან საპოლიციო ძალები, რომლებიც “ოცნების” დეპუტატებს პარლამენტში შესვლაში დაეხმარნენ, ხელისუფლებამ ოპოზიციის დეპუტატების შეფერხებისთვისაც გამოიყენა. აღსანიშნავია, რომ კანონის მისაღებად საჭიროა პლენარულ სხდომაზე სამი მოსმენით მხარდაჭერა. კენჭისყრა, სავარაუდოდ, 14 მაისს გაიმართება.
შეგახსენებთ, რომ მას შემდეგ, რაც ქართულმა ოცნებამ მოსახლეობისთვის მიცემული პირობა დაარღვია და რუსული კანონი ხელახლა დააინიცირა, პარლამენტთან აქციები, ფაქტობრივად, უწყვეტად მიმდინარეობს. წინა წლისგან პროექტს მხოლოდ ის განასხვავებს, რომ “უცხოური გავლენის აგენტის” ცნება შეცვლილია “უცხოური ძალის ინტერესების გამტარებელი ორგანიზაციის” ცნებით. მოქალაქეები უკვე ერთი თვეა ითხოვენ ხელისუფლებისგან, გაიწვიოს კანონი, რომელიც აზიანებს ქვეყანას და პროდასავლურ კურსს. ხელისუფლებამ მათ წინააღმდეგ არაერთხელ გამოიყენა როგორც უხეში ფიზიკური ძალა, ასევე, ცრემლსადენი გაზი, წიწაკის სპრეი თუ წყლის ჭავლი. ფაქტობრივად, არ დარჩენილა სფერო, რომლის წარმომადგენლებმაც კანონპროექტის საწინააღმდეგო პოზიცია არ გამოთქვეს. კრიტიკულია ქვეყნის სტრატეგიული პარტნიორების განცხადებებიც. მიუხედავად ამისა, ქართული ოცნება აცხადებს, რომ კანონს მაინც მიიღებს. სწორედ კანონპროექტთან დაკავშირებით და არამხოლოდ, დეზინფორმაციული, ანტიდასავლური და პროპაგანდისტული ნარატივები გაავრცელა პარტიის საპატიო თავმჯდომარემ, ბიძინა ივანიშვილმა, რომელიც სიტყვით გამოვიდა ხელისუფლების მიერ გამართულ კონტრაქციაზე.
აღსანიშნავია, რომ ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის: