პარლამენტის თავმჯდომარე შალვა პაპუაშვილმა რუსული კანონის მეორე მოსმენით განხილვისას პლენარულ სხდომათა დარბაზიდან კიდევ ორი დეპუტატი, „ერთიანი ნაციონალური მოძრაობის“ წევრები გიორგი ბოტკოველი და თინა ბოკუჩავაც გააძევა.
პარლამენტის თავმჯდომარემ გიორგი ბოტკოველს მიკროფონის გარეშე საუბრის გამო მისცა გაფრთხილება, შემდეგ კი მალევე დაატოვებინა დარბაზი.
მსგავსი გაფრთხილება მისცა მან თინა ბოკუჩავასაც, როდესაც ანრი ოხანაშვილი ამბობდა, რომ მშდივობის მხარეს 29 აპრილს „ქართული ოცნების“ აქციაზე გამომსვლელი ხალხი დგას: „ჩვენმა საზოგადოებამ გაგცათ პასუხი, ვინ დგას მშვიდობის მხარეს, ვინ ატარებს მშვიდობიან აქციას, ვინ გამოხატავს მშვიდობიანად კონკრეტულ პოზიციას, ვინ არიან მოძალადეები და ვინ ახალისებს ძალადობას“. გაფრთხილების შემდეგ პაპუაშვილმა ბოკუჩავაც გააძევა დარბაზიდან მიკროფონის გარეშე საუბრის და დეპუტატების შეურაცხყოფის გამო.
მანამდე პაპუაშვილმა სხდომათა დარბაზი დაატოვებინა ასევე ორ ოპოზიციონერ დეპუტატს, თაკო ჩარკვიანსა და სალომე სამადაშვილს. შალვა პაპუაშვილი ასევე მიკროფონს უთიშავს ყველა დეპუტატს, რომელიც, მისი თქმით, „არათემატურ“ საკითხებზე საუბრობს.
„შალვა პაპუაშვილი პაპუაშვილი კი არ არის სინამდვილეში, ის არის სერგო ორჯონიკიძე, ფილიპე მახარაძე და საერთოდ ამ ქვეყნის ყველა მოღალატის ინკარნაცია. ამ ქვეყანაში ახლა სახელმწიფო ღალატი მიმდინარეობს, რომელსაც საქართველოს პარლამენტში აფორმებს რუსული უმრავლესობა“, — განაცხადა სალომე სამადაშვილმა მას შემდეგ, რაც ის დარბაზიდან გააძევეს.
გუშინ, 30 აპრილს რუსული კანონის საპროტესტო აქცია პარლამენტში მიმდინარე პლენარული სხდომის პარალელურად დაიწყო და პირველი აპრილის დილამდე გაგრძელდა. სხდომაზე რუსულ კანონს მეორე მოსმენით მუხლობრივად განიხილავდნენ. აქციის მონაწილეებმა პარლამენტის სხვადასხვა შესასვლელისკენ გადაინაცვლეს, საიდანაც ქართული ოცნების დეპუტატები უნდა გამოსულიყვნენ, თუმცა პოლიციამ ჩიტაძის ქუჩა ჩაკეტა. შსს-მ მოქალაქეებს მოუწოდა, დაეტოვებინათ პარლამენტის შენობის შესასვლელი და გამოსასვლელი სივრცეები, შემდეგ კი იძულებით სცადა გათავისუფლება.
მოგვიანებით, გავრცელდა კადრები, რომლებშიც მკაფიოდ ჩანდა, როგორ ძალადობდა სპეცრაზმი მოქალაქეებზე და გაფრთხილების გარეშე, სხვადასხვა სპეციალურ საშუალებას იყენებდა. ტერიტორიაზე გაუშვეს წყლის ჭავლიც. ამ შემთხვევაში იმ განსხვავებით, რომ რამდენიმე წამით ადრე ადგილზე შეკრებილები გააფრთხილეს. დაშავებულები არიან აქციის მონაწილეები, ჟურნალისტები და დეპუტატები. მთელი ღამის განმავლობაში აქციის მონაწილეების მიმართ პერიოდულად იყენებდნენ წყლის ჭავლსა და ცრემლსადენ გაზს, თუმცა მოქალაქეები ტერიტორიზე რჩებოდნენ.
შსს-მ დაკავებულების შესახებ ინფორმაცია მხოლოდ პირველი მაისის დილით გაავრცელა და თქვა, რომ 63 ადამიანს წვრილმან ხულიგნობისა და პოლიციის მოთხოვნისადმი დაუმორჩილებლობას ედავებიან. უწყება ამტკიცებს, რომ რუსული კანონის წინააღმდეგ აქციაზე შეკრებილი მშვიდობიანი მოქალაქეები სამართალდამცველებს სიტყვიერად და ფიზიკურად დაუპირისპირდნენ და მათი მიმართულებით სხვადასხვა საგანი ისროლეს. დღესვე ცნობილი გახდა, რომ სპეციალურ საგამოძიებო სამსახურში აქციის მონაწილეებზე ძალადობის საქმეზე გამოძიება დაიწყო.