პარლამენტის თავმჯდომარე შალვა პაპუაშვილმა რუსული კანონის მეორე მოსმენით განხილვისას პლენარულ სხდომათა დარბაზიდან ოპოზიციონერი დეპუტატები თაკო ჩარკვიანი და სალომე სამადაშვილი გააძევა. შალვა პაპუაშვილი ასევე მიკროფონს უთიშავს ყველა დეპუტატს, რომელიც, მისი თქმით, „არათემატურ“ საკითხებზე საუბრობს.
„გუშინ ინსტიტუციურად, სახელმწიფო ინსტიტუცია განადგურდა კიდევ ერთხელ ხაბეიშვილის დასახიჩრებით, ინსტიტუციას დაუკარგეთ ძალა“, — ამბობდა თაკო ჩარკვიანი, როდესაც პაპუაშვილმა მას მიკროფონი გაუთიშა იმ საბაბით, რომ მას კითხვა არ დაუსვამს, შემდეგ კი მიკროფონის გარეშე საუბრის გამო გაფრთხილება მისცა.
„არ მოგცემთ აქ მე მიტინგის ჩატარების საშუალებას. თქვენს ლაპარაკში ჩანს, რომ კითხვა არ გაქვთ“, — განაცხადა პაპუაშვილმა, რის შემდეგაც მიკროფონის გარეშე საუბრის გამო თაკო ჩარკვიანი სხდომათა დარბაზიდან გააგდო.
რამდენიმე წუთის შემდეგ პაპუაშვილმა ასევე მიკროფონი გაუთიშა სალომე სამადაშვილს, როდესაც მან კრემლის იდეოლოგი, ალექსანდრე დუგინი, ახსენა, შემდეგ კი მასაც მიკროფონის გარეშე საუბრის გამო მისცა გაფრთხილება და მალევე საუბრის გაგრძელებისთვის ისიც გააძევა დარბაზიდან.
„შალვა პაპუაშვილი პაპუაშვილი კი არ არის სინამდვილეში, ის არის სერგო ორჯონიკიძე, ფილიპე მახარაძე და საერთოდ ამ ქვეყნის ყველა მოღალატის ინკარნაცია. ამ ქვეყანაში ახლა სახელმწიფო ღალატი მიმდინარეობს, რომელსაც საქართველოს პარლამენტში აფორმებს რუსული უმრავლესობა. ჩემი შეკითხვა შეეხებოდა იმას, რომ გუშინ პუტინის მთავარი იდეოლოგი დუგინი მიესალმა საქართველოს ხელისუფლებას და თქვა, რომ საქართველოს პარლამენტის კედლებს ახლა ასკდებიან უცხოელი აგენტები და, რა თქმა უნდა, მთავრობამ ახლა მათ არაფერი არ უნდა დაუთმოს. ამის პარალელურად ჩვენ ევროკავშირის მკაფიო პოზიცია მოვისმინეთ — მიიღება ეს კანონი და შეწყდება საქართველოსთან ყოველგვარ ევროპულ მომავალზე საუბარი და გაუქმდება უვიზო მიმოსვლა, სავარაუდოდ. ჩემი ინფორმაციით, ბრიუსელში ამაზე უკვე სერიოზული საუბარ მიდის, რომ უვიზო რეჟიმი უნდა შეჩერდეს“, — განაცხადა სამადაშვილმა მას შემდეგ, რაც ის დარბაზიდან გააძევეს.
მანამდე სალომე სამადაშვილს Facebook-ის პირად გვერდზე ჩართული ჰქონდა ლაივი, სადაც განაცხადა, რომ პლენარული სხდომა ძალადობით დაიწყო და მას „რუსეთის აგენტები“ ბოთლებს ესვრიან.
„პარლამენტში დაიწყო სხდომა ძალადობით და რუსების აგენტები, ესენი არიან რუსების აგენტები, უკან სხედან კაგებეს წარმომადგენლები და გვესვრიან თავში ბოთლებს, რომ აქ პარლამენტში დღეს განხილვა არ შედგეს. რუსები ახდენენ ჩვენი ქვეყნის უზურპაციას. ჩვენ გვინდოდა, რომ სხდომა დაწყებულიყო და დაწყებულიყო განხილვა, რადგან ხალხმა დღეს უნდა მოისმინოს აქ სიმართლე. ესენი გადმოვიდნენ თავდასხმაზე, დაიწყეს უკნიდან სროლა“, — თქვა სამადაშვილმა.
კადრებში ასევე ჩანს დეპუტატების ფიზიკური დაპირისპირება და ერთმანეთისთვის სხვადასხვა საგნის სროლა.
გუშინ, 30 აპრილს რუსული კანონის საპროტესტო აქცია პარლამენტში მიმდინარე პლენარული სხდომის პარალელურად დაიწყო და პირველი აპრილის დილამდე გაგრძელდა. სხდომაზე რუსულ კანონს მეორე მოსმენით მუხლობრივად განიხილავდნენ. აქციის მონაწილეებმა პარლამენტის სხვადასხვა შესასვლელისკენ გადაინაცვლეს, საიდანაც ქართული ოცნების დეპუტატები უნდა გამოსულიყვნენ, თუმცა პოლიციამ ჩიტაძის ქუჩა ჩაკეტა. შსს-მ მოქალაქეებს მოუწოდა, დაეტოვებინათ პარლამენტის შენობის შესასვლელი და გამოსასვლელი სივრცეები, შემდეგ კი იძულებით სცადა გათავისუფლება.
მოგვიანებით, გავრცელდა კადრები, რომლებშიც მკაფიოდ ჩანდა, როგორ ძალადობდა სპეცრაზმი მოქალაქეებზე და გაფრთხილების გარეშე, სხვადასხვა სპეციალურ საშუალებას იყენებდა. ტერიტორიაზე გაუშვეს წყლის ჭავლიც. ამ შემთხვევაში იმ განსხვავებით, რომ რამდენიმე წამით ადრე ადგილზე შეკრებილები გააფრთხილეს. დაშავებულები არიან აქციის მონაწილეები, ჟურნალისტები და დეპუტატები. მთელი ღამის განმავლობაში აქციის მონაწილეების მიმართ პერიოდულად იყენებდნენ წყლის ჭავლსა და ცრემლსადენ გაზს, თუმცა მოქალაქეები ტერიტორიზე რჩებოდნენ.
შსს-მ დაკავებულების შესახებ ინფორმაცია მხოლოდ პირველი მაისის დილით გაავრცელა და თქვა, რომ 63 ადამიანს წვრილმან ხულიგნობისა და პოლიციის მოთხოვნისადმი დაუმორჩილებლობას ედავებიან. უწყება ამტკიცებს, რომ რუსული კანონის წინააღმდეგ აქციაზე შეკრებილი მშვიდობიანი მოქალაქეები სამართალდამცველებს სიტყვიერად და ფიზიკურად დაუპირისპირდნენ და მათი მიმართულებით სხვადასხვა საგანი ისროლეს. დღესვე ცნობილი გახდა, რომ სპეციალურ საგამოძიებო სამსახურში აქციის მონაწილეებზე ძალადობის საქმეზე გამოძიება დაიწყო.