21, 22 და 23 ივნისს Tbilisi Open Air ბრუნდება. სამხრეთ კავკასიის რეგიონში ყველაზე დიდი მუსიკალური ფესტივალი “თავისუფლების, მრავალფეროვნებისა და მუსიკალური თავგადასავლის 15 წლის იუბილეს აღნიშნავს”. წელს ფესტივალის მედია პარტნიორებს შორის მედია აპრილიც არის.
“პირველივე წლიდან ჩვენი მისია იყო შეგვექმნა სივრცე, სადაც ერთმანეთის მსგავსი თუ ერთმანეთისგან განსხვავებული ადამიანები შეიკრიბებოდნენ მუსიკის, მრავალფეროვნებისა და თავისუფლების აღსანიშნავად. დიდ მადლიერებას გამოვხატავთ ფესტივალის ერთგული მსმენელების მიმართ, მადლობლები ვართ ჩვენი გუნდის, პარტნიორების და არტისტების”, — აღნიშნულია Tbilisi Open Air-ის ანონსში.
ფესტივალმა გასულ 15 წელში ათასზე მეტ არტისტს უმასპინძლა და წელსაც არაერთ კარგ მუსიკოსს მოუსმენთ — სხვადასხვა სცენაზე ნებისმიერი მსმენელისთვის მოსაწონი მუსიკა გაჟღერდება. როკ ბენდების, არტ პოპის, ჰიპჰოპისა და ჯაზის გარდა, ღამის სცენაზე შეძლებთ ელექტრონული მუსიკის მოსმენას, რომლის წარმდგენები კლუბი Khidi და Zion Garden არიან.
ამ სტატიაში კი გაგიზიარებთ იმ 5 მუსიკოსისა და ბენდის ვინაობას, ვისი Tbilisi Open Air-ის შემსრულებელთა შორის ნახვა ყველაზე მეტად გაგვიხარდა.
M.I.A.
Open Air-ის მსმენელის წინაშე M.I.A. წარდგება. შრი-ლანკელი მშობლების ოჯახში, ლონდონში დაბადებული არტისტი მუსიკალური ჟანრებისა და ჟღერადობების მრავალფეროვნებით გამოირჩევა. M.I.A. საკუთარ ნამუშევრებში აზავებს ჰიპჰოპს, R&B-ის, ელექტრონული მუსიკის ელემენტებს, პოპ და სხვადასხვა კულტურის ფოლკლორის გავლენებს და ამგვარად ტრანსგლობალურ გამოცდილებას ქმნის.
M.I.A.-ის მუსიკალური თუ სხვა სახელოვნებო (თავდაპირველად ცნობილი ვიზუალური ხელოვნებით გახდა) ძიებები მისმა ბიოგრაფიამ განსაზღვრა. 6 თვის იყო, როცა ოჯახთან ერთად შრი-ლანკაში გადავიდა, თუმცა 11 წლის ასაკში ლტოლვილად იქცა — შრი-ლანკის სამოქალაქო ომმა ოჯახს ქვეყნის დატოვება აიძულა.
მისი მუსიკალური კარიერა დაახლოებით 2004 წლიდან იწყება, როცა მისი პირველი სინგლები ლონდონის ანდერგრაუნდ სცენაზე პოპულარული გახდა — “Sunshowers” და “Galang” შესანიშნავი ნამუშევრებია, რომელშიც მრავალფეროვანი გამოცდილების მქონე, სხვადასხვა კულტურით შთაგონებული ხელოვანის ხმა ისმის.
დღეისთვის უკვე 6 ალბომი აქვს ჩაწერილი, განსაკუთრებით მისი სადებიუტო ალბომის — Arular-ის ან რიგით მეორე ალბომის — Kala-ს მოსმენას გირჩევთ.
Lebanon Hanover
ბერლინში მცხოვრებმა ლარისა აისგლასმა და ნიუკასლში მცხოვრებმა უილიამ მეიბილინმა ერთმანეთი მუსიკალურ სოციალურ ქსელში გაიცნეს, სადაც 80-იანი წლების მუსიკალურ რეკომენდაციებს უზიარებდნენ და საერთო გემოვნებამ გააერთიანა. 2010-ში სოციალურ ქსელში დამეგობრებული არტისტები ერთმანეთს შეხვდნენ, ასე დაიბადა Lebanon Hanover. იქიდან მოყოლებული, ათწლეულზე მეტია წარმატებული ტანდემი აქვთ და პოსტ-პანკ, გოთ და დარქვეივ სცენის ერთ-ერთ გამორჩეულ პროექტს ქმნიან.
ლარისა ვოკალისტი და გიტარისტია, უილიამი ვოკალისტი, ბასისტი და სინთეზისტი. 80-იანების გოთური მუსიკითა და პოსტ-პანკით შთაგონებულ დუეტს 6 ალბომი, რამდენიმე EP და სინგლი აქვს ჩაწერილი.
AURORA
ნორვეგიელი მუსიკოსის, AURORA-ს წარმატებული კარიერა და ცნობადობა 2015 წელს გამოსული EP ნამუშევრით — Running with the Wolves-ით იწყება, რასაც 2016 წელს სადებიუტო სტუდიური ალბომი — All My Demons Greeting Me as a Friend მოჰყვა.
მუსიკოსის შემოქმედება ელექტრო-პოპით, ფოლკლორითა და არტ პოპით არის შთაგონებული, მისი გამორჩეული, სულში ჩამწვდომი ხმა კი ყველასგან განსხვავებულია. ამასთან, თვითონვე უკრავს კლავიშზე და პერკუსიაზე, ჩართულია მუსიკალურ პროდიუსინგში.
La Femme
La Femme ფრანგული ფსიქო-პანკ ჯგუფია, რომელიც 2010 წელს, მუსიკოსებმა საშა გოთმა და მარლონ მანიემ დააფუძნეს, მოგვიანებით კი ბენდის დანარჩენი წევრებიც შემოიერთეს.
მათი ნამუშევრები შთაგონებულია ევროპული მუსიკალური ჟანრებით, ქოლდ ვეივით, ევროპული პოპ მიმდინარეობით, იეიე და, რა თქმა უნდა, პანკით.
ამ დროისთვის, ბენდს 5 ალბომი და 4 EP აქვს ჩაწერილი.
Mechanical Rainbow
მექანიკური ცისარტყელა ქართული როკ ბენდია, რომელიც პროგრესივ ინდი, სინთ პოპ და ფსიქოდელიური როკის მიმართულებით ქმნის მუსიკას. ბენდში 5 წევრია — დადუ დონაძე, დავით შავდათუაშვილი, ცოტნე ბაღდავაძე, ნინი ბენდიანიშვილი და დიმა დიასამიძე.
ბენდის ნარნარა, სევდა’ნარევი და ნოსტალგიური მუსიკა აუცილებლად გაგაბედნიერებთ, აგიყოლიებთ და ხელახლა მოსმენის სურვილსაც გაგიჩენთ. Mechanical Rainbow მუსიკალურ ფესტივალზე პირველად არ არის, ამჯერად ბენდი მთავარ სცენაზე ელის მსმენელს.