შინაგან საქმეთა სამინისტროს ინფორმაციით, 15 აპრილს პარლამენტთან რუსული კანონის საპროტესტო აქციაზე დაკავებულ პირებს შეუზღუდავად აქვთ წვდომა საკუთარი ინტერესების დამცველ ადვოკატებთან, სახალხო დამცველის აპარატისა და სპეციალური საგამოძიებო სამსახურის წარმომადგენელთან.
უწყების განცხადებით, შესაბამისი სამართლებრივი პროცედურების შემდეგ, პოლიციამ ხელწერილის საფუძველზე გაათავისუფლა 4 პირი, ხოლო რაც შეეხება 10 დაკავებულს, საქართველოს კანონმდებლობით დადგენილი წესით, ისინი გადაყვანილები არიან დროებითი მოთავსების იზოლატორში.
შსს ამტკიცებს, რომ დაკავებულებს დროებითი მოთავსების იზოლატორში ყოფნის პირობებში საშუალება ჰქონდათ, კონფიდენციალურ გარემოში შეხვედროდნენ და გასაუბრებოდნენ სახალხო დამცველის რწმუნებულს.
ამასთან, დროებითი მოთავსების იზოლატორში დაკავებული პირების შეყვანისთანავე ექიმების მიერ კონფიდენციალურ გარემოში მოხდა მათი სამედიცინო შემოწმება და შედგა შესაბამისი დოკუმენტაცია.
შსს ასევე ირწმუნება, რომ იზოლატორში ყოფნის პერიოდში დაკავებული პირებისთვის დამატებითი სამედიცინო დახმარების გაწევის საჭიროება არ დამდგარა.
მიუხედავად შსს-ს განცხადებისა, წინასწარი მოთავსების იზოლატორში შესულ ადვოკატები ამბობენ, რომ რუსული კანონის წინააღმდეგ საპროტესტო აქციაზე დაკავებული პირები სასტიკად ნაცემი დახვდათ. მათი თქმით, დაკავებულებს დაზიანებები ყელზე, ხელებზე, ფეხებზე და მთელს სხეულზე აღენიშნებათ, რაც ციხის ექიმმა ოქმშიც ასახა.
დაკავებულებზე ფიზიკურ ძალადობას საქართველოს ახალგაზრდა იურისტთა ასოციაციაც საუბრობს. გარდა ამისა, ორგანიზაციაში ამბობდნენ, რომ 15 აპრილს რუსული კანონის საწინააღმდეგო აქციაზე დაკავებულთა ნაწილის ადგილსამყოფელი ადვოკატებმა არ იცოდნენ.
შშს-ს ცნობით, რუსული კანონის საწინააღმდეგო მშვიდობიან აქციაზე 14 ადამიანი დააკავეს. უწყების მტკიცებით, გაფრთხილების მიუხედავად, მათ “არ გაითვალისწინეს კანონიერი მოთხოვნა, დაარღვიეს საზოგადოებრივი წესრიგი, სამართალდამცველებს გაუწიეს წინააღმდეგობა და მიაყენეს სიტყვიერი შეურაცხყოფა”.
შეგახსენებთ, რომ იურიდიულ საკითხთა კომიტეტმა რუსულ კანონს პირველი მოსმენით მხარი გუშინ, 15 აპრილს დაუჭირა. სწორედ ამ განხილვის პარალელურად მიმდინარეობდა მოქალაქეების საპროტესტო აქცია „კი ევროპას! არა რუსულ კანონს!“.
მშვიდობიანი პროტესტისას აქციაზე მობილიზებულნი იყვნენ სპეცდანიშნულების რაზმები, შსს-მ კი ორგანიზატორებსა და მონაწილეებს მოუწოდა, არ გამცდარიყვნენ გამოხატვის თავისუფლებისა და მშვიდობიანი შეკრების კანონით დადგენილ ნორმებს, წინააღმდეგ შემთხვევაში „სამართალდარღვევის ნებისმიერი ფაქტი პოლიციის მხრიდან, კანონის ფარგლებში, დაუყოვნებლივ იქნება აღკვეთილი“.
საპროტესტო აქციაზე სპეცრაზმის გამოჩენის შემდეგ, ომბუდსმენმა განცხადება გაავრცელა, რომელშიც მან აღნიშნა, რომ “არ იკვეთება შეკრების კანონსაწინააღმდეგო ხასიათი, შესაბამისად არ არსებობს შეკრების მონაწილეთა კონსტიტუციურ უფლებაში ჩარევის საფუძველი”.
არაერთი კრიტიკული განცხადებისა და საზოგადოების პროტესტის ფონზე, დღეს, 16 აპრილს, პარლამენტის პლენარულ სხდომაზე რუსული კანონი პირველი მოსმენით განიხილება. სესიის პარალელურად, პარლამენტის უკან, 12:00-ზე პირველი საპროტესტო აქცია დაიწყება, ხოლო მეორე აქცია 19:00-ზე, პარლამენტის წინ გაიმართება.
დღეს, ისევე როგორც 15 აპრილს, პარლამენტში არ უშვებენ ონლაინ მედიის ჟურნალისტებს. პაპუაშვილმა ეს იმით ახსნა, რომ ისინი საკანონმდებლო ორგანოში პროტესტის გამოსახატად იკრიბებიან. მისივე თქმით, “ეს არ არის სივრცე აქციების ჩასატარებლად”. დღესვე პარლამენტში უსაფრთხოების ყვითელი დონე მოქმედებს, რის შედეგადაც, ვიზიტორებს საკანონმდებლო ორგანოში შესვლა ეზღუდებათ.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
პროექტის შინაარსი იგივე იქნება, ოღონდ სიტყვა „აგენტს“ არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის:
- სიძულვილი, ცენზურა, გამოხატვის თავისუფლების შეზღუდვა — “ოცნების” ინიციატივა პარლამენტშია
- რის “დაცვასაც” წინასაარჩევნოდ ქართული ოცნება ცდილობს, რუსეთმა უკვე “დაიცვა” — ნახეთ როგორ
- რა წერია ხელახლა ინიცირებულ რუსულ კანონში — დეტალურად
