„ქალთა ფონდი საქართველოში“ არასამთავრობო ორგანიზაციაა, რომლის მიზანიცაა ქალებისა და ქალთა ორგანიზაციების, საინიციატივო ჯგუფებისა და აქტივისტების გაძლიერება საქართველოში ქალთა უფლებების განხორციელების, საზოგადოებრივ ცხოვრებაში მათი სრულფასოვანი მონაწილეობისა და თვითრეალიზაციისათვის, ფინანსური და ტექნიკური დახმარების, უნარების განვითარებისა და ფემინისტური ფილანთროპიის ჩამოყალიბების გზით.
წარმოგიდგენთ ქალთა ფონდის 2024 წლის იანვრის მიმოხილვას:
- „ფემინსტრიმის“ ახალი სეზონისთვის ორგანიზაციამ უკვე შეარჩია 5 ავტორი, რომლებიც მარტიდან დაიწყებენ პოდკასტების ახალი სერიის მომზადებას. „ფემინსტრიმი“ ფემინისტური პოდკასტია, რომელიც გამოქვეყნდება Facebook და YouTube გვერდებზე, ასევე Soundcloud-ზე, Spotify-სა და სხვა პლატფორმებზე. გარდაა ამისა, პოდკასტების ტექსტური ვერსია განთავსდება როგორც ქალთა ფონდის, ისე საზოგადოებრივ-პოლიტიკური ონლაინგამოცემა პუბლიკისა და მედია აპრილის ვებგვერდებზე.
- იანვარში „ქალთა ფონდმა“ Zinc Network-თან კოლაბორაციით დაიწყო გენდერულ დეზინფორმაციაზე მუშაობა, რომელსაც კამპანიის სახე ექნება და რომლის ფარგლებშიც ორგანიზაცია ითანამშრომლებს სხვა ადგილობრივ და საერთაშორისო ქალთა ორგანიზაციებთან.
- 1 და 7 თებერვალს ორგანიზაციამ გამართა ორი ონლაინ ვებინარი და დისკუსია, რომლებიც შეეხებოდა სექსუალური და რეპროდუქციული ჯანმრთელობისა და უფლებების (SRHR) კავშირს გარემოსდაცვით სამართლიანობასთან.
- „ქალთა ფონდმა“ მოამზადა ახალი პოდკასტი სოციალური მუშაკების პროტესტზე, ზრუნვის შრომაზე და მათ როლზე ფემინისტურ ჭრილში. პოდკასტში ქეთი ხუციშვილი, სოციალური მუშაკი და გენდერის მკვლევარი, საუბრობს სოციალური მუშაკების უპრეცედენტო პროტესტზე საქართველოში და მოგვითხრობს სოციალური დაცვის სისტემის გაუმჯობესებისთვის ხანგრძლივ ბრძოლაზე.