„ქალთა ფონდი საქართველოში“ არასამთავრობო ორგანიზაციაა, რომლის მიზანიცაა ქალებისა და ქალთა ორგანიზაციების, საინიციატივო ჯგუფებისა და აქტივისტების გაძლიერება საქართველოში ქალთა უფლებების განხორციელების, საზოგადოებრივ ცხოვრებაში მათი სრულფასოვანი მონაწილეობისა და თვითრეალიზაციისათვის, ფინანსური და ტექნიკური დახმარების, უნარების განვითარებისა და ფემინისტური ფილანთროპიის ჩამოყალიბების გზით.
წარმოგიდგენთ ქალთა ფონდის 2023 წლის დეკემბრის მიმოხილვას:
- 19 დეკემბერს გაიმართა ალექსანდრა აროშვილის კვლევის, „მსხვერპლშეწირვის ზონების“, პრეზენტაცია, რომელიც ფონდის მხარდაჭერით მომზადდა. პრეზენტაციის და დისკუსიის ფოკუსი იყო „ქართველი ქალები ექსტრაქტივისტული ეკონომიკის პირისპირ: მოპოვება და ენერგეტიკა“. კვლევა მომზადდა პროექტის „ქალთა ყოფა ექსტრაქტივისტული პრაქტიკების პირობებში“ ფარგლებში, რომელიც ქალთა ფონდმა განახორციელა მონღოლეთის (Mones) და ნეპალის (Tewa) ქალთა ფონდებთან თანამშრომლობით.
- 22 დეკემბერს ორგანიზაციამ კატო მიქელაძის პრემიის რიგით მეათე დაჯილდოება გამართა. წელს პრემიაზე ნომინანტების უპრეცედენტოდ დიდი რაოდენობა იყო წარდგენილი, რომელთაგან 17 კანდიდატი ქალთა ფონდმა მოწვეულ ჟიურის წარუდგინა. ჟიურის წევრებად მოწვეული იყო კატოს პრემიის ყველა მფლობელი. კატოს პრემია 2023 გადაეცა ქვიარ და ფემინისტ აქტივისტ ალა პარუნოვას. ღონისძიებას წინ უძღოდა ერთწლიანი შესვენება, რომელიც ქალთა ფონდმა პრემიის დახვეწის, გაუმჯობესებისა და მხარდამჭერებისგან მიღებული რჩევების გათვალისწინებისთვის აიღო.
► ალა პარუნოვას უკეთ გასაცნობად წაიკითხე მედია აპრილის სტატია — ალა პარუნოვა: ქვიარები არ ვართ ამ საზოგადოებისგან ამოგლეჯილი ჯგუფი, საზოგადოების ნაწილი ვართ
-
29 დეკემბერს ქალთა ფონდმა გამოაცხადა ახალი საგრანტო პროგრამა „ქალთა უფლებები და გარემოსდაცვითი სამართლიანობა“. საგრანტო პროგრამის მიზანია სოციალურ და გარემოსდაცვით სამართლიანობაზე მომუშავე ქალთა არასამთავრობო ორგანიზაციებისა და ქალთა არაფორმალური ჯგუფების წახალისება, რათა თავიანთი ძალისხმევა მიმართონ ქალების მიერ ბუნებრივი რესურსების მართვაზე, უპასუხონ სოციალურ და გარემოსდაცვით გამოწვევებს, იქნება ეს კლიმატის ცვლილება, ბიომრავალფეროვნება, გარემოს დაბინძურება, ქიმიური უსაფრთხოება, ნარჩენების მართვა, ქალთა უფლება უსაფრთხო, სუფთა და ჯანმრთელ გარემოზე და სხვა. განსახილველი პროექტების წარდგენის ბოლო ვადაა 2024 წლის 22 იანვარი.