საქართველოში ამერიკის ელჩის, რობინ დანიგანის თქმით, “ბოლო კვირების განმავლობაში საქართველოს მთავრობის არჩევანმა ქვეყანა დააშორა ევროატლანტიკურ მომავალს, მიზანს, რომლის მიღწევაც ქართველების უდიდეს უმრავლესობას სურს”.
ელჩი წერს იმასაც, რომ მმართველი პარტიის ზოგიერთმა წევრმა არჩია თავდასხმა საქართველოს სუვერენიტეტის უდიდეს მხარდამჭერებზე: შეერთებულ შტატებსა და ევროკავშირზე.
“სამწუხაროდ, მმართველ პარტიას, როგორც ჩანს, მტკიცედ აქვს გადაწყვეტილი მიიღოს კანონი, რომლის შესახებაც ევროკავშირმა ნათლად განაცხადა, რომ შეუთავსებელია საქართველოს ევროკავშირის მისწრაფებებთან. ამასთანავე, მმართველი პარტიის ზოგიერთმა წარმომადგენელმა არჩია თავდასხმა საქართველოს სუვერენიტეტის უდიდეს მხარდამჭერებზე: შეერთებულ შტატებსა და ევროკავშირზე. ჩვენ საქართველოს გვერდით ვიდექით და ვდგავართ მოლაპარაკებებზე იმ ქვეყანასთან, რომელსაც საქართველოს ტერიტორიის ოცი პროცენტი აქვს ოკუპირებული. ჩვენ მხარს ვუჭერდით და ვუჭერთ ქართული ენის, კულტურული და ისტორიული მემკვიდრეობის შენარჩუნებას”, — აღნიშნულია კრიტიკულ წერილში.
დანიგანი ასევე საუბრობს, საქართველოს დამოუკიდებლობის აღდგენიდან არსებულ პარტნიორობაზე და, აშშ-ს სახელით, უარს ამბობს, შეცვალონ მტკიცე ერთგულება ქართველი ხალხისა და საქართველოს მიმართ.
“ბოლო ოცდათორმეტი წლის განმავლობაში ჩვენ ჩამოვაყალიბეთ პარტნიორობა, რომელიც ეფუძნება საერთო ღირებულებებს და საერთო სურვილს, რომ საქართველო ვიხილოთ დასავლური დემოკრატიების ოჯახის წევრად. ჩვენ უარს ვამბობთ, შევცვალოთ ჩვენი მტკიცე ერთგულება ქართველი ხალხისა და საქართველოს მომავლის მიმართ – ევროპული მომავლის მიმართ, რასაც მეტი მშვიდობა და კეთილდღეობა მოაქვს; ის რაც ყველა ქართველმა იცის, ვინც კი იხილა ჩვენი ინვესტიციებისა და პროგრამების სარგებელი”.
ელჩი წერს, რომ საქართველოს მთავრობის მაღალი თანამდებობის პირები შეერთებული შტატების მაღალი თანამდებობის პირებთან სტრატეგიული პარტნიორობისა და აშშ-ის დახმარების შესახებ ნებისმიერი შეკითხვის განსახილველვად მიიწვიეს, თუმცა, სამწუხაროდ, ქართულმა მხარემ უარი თქვა ამ მიწვევაზე.
“ჩვენ მოვუწოდებთ საქართველოს მთავრობას, კვლავ დაადასტუროს ერთგულება საქართველოს ევროატლანტიკური მომავლის მიმართ, როგორც ეს საქართველოს კონსტიტუციაში წერია. შეერთებული შტატები ჩვენი მტკიცე ურთიერთობის ერთგული რჩება და ქართველი ხალხისთვის მხოლოდ მშვიდობა, სტაბილურობა და კეთილდღეობა სურს”.
პირველ მაისს პარლამენტმა რუსულ კანონს მეორე მოსმენით დაუჭირა მხარი. საკანონმდებლო ორგანოსთან მოქალაქეები ისევ შეიკრიბნენ. აქცია დაახლოებით 12 საათის განმავლობაში გრძელდებოდა. მოქალაქეების წინააღმდეგ ხელისუფლებამ გამოიყვანა სპეცრაზმი, რომელმაც გაუფრთხილებლად გამოიყენა წყლის ჭავლი, ცრემლსადენი გაზი და წიწაკის სპრეი, ასევე, რეზინის ტყვიები, რასაც შსს უარყოფს, თუმცა ჟურნალისტებმა ადგილზე ნახეს და გადაიღეს რეზინის ტყვიები, ასევე, დაშავებულ ადამიანებს სხეულზე ჰქონდათ ჭრილობები და ისინი ამბობდნენ, რომ რეზინის ტყვიები მოხვდათ.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა. წინა წლისგან მას მხოლოდ ის განასხვავებს, რომ “უცხოური გავლენის აგენტის” ცნება შეცვლილია “უცხოური ძალის ინტერესების გამტარებელი ორგანიზაციის” ცნებით. მოქალაქეები რუსულ კანონს ინიცირების შემდეგ აქტიურად აპროტესტებენ და ხელისუფლებამ მათ წინააღმდეგ არაერთხელ გამოიყენა ცრემლსადენი გაზი, წიწაკის სპრეი თუ წყლის ჭავლი. ფაქტობრივად, არ დარჩენილა სფერო, რომლის წარმომადგენლებმაც კანონპროექტის საწინააღმდეგო პოზიცია არ გამოთქვეს. კრიტიკულია ქვეყნის სტრატეგიული პარტნიორების განცხადებებიც. მიუხედავად ამისა, ქართული ოცნება აცხადებს, რომ კანონს მიიღებს. სწორედ კანონპროექტთან დაკავშირებით და არამხოლოდ დეზინფორმაციული, ანტიდასავლური და პროპაგანდისტული ნარატივები გაავრცელა პარტიის საპატიო თავმჯდომარემ, ბიძინა ივანიშვილმა, რომელიც სიტყვით გამოვიდა ხელისუფლების მიერ გამართულ კონტრაქციაზე.
აღსანიშნავია, რომ ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის: