დღეს, 16 აპრილს, 21:00 საათზე პარლამენტის პლენარული სხდომა, რომელზეც რუსულ კანონს განიხილავდნენ, დაიხურა. კანონპროექტზე მსჯელობას პარლამენტი 17 აპრილს, 12:00 საათიდან განაგრძობს.
პარლამენტის თავმჯდომარემ, შალვა პაპუაშვილმა განაცხადა, რომ საკითხი ამოწურული არ არის და ხვალინდელ დღეზე გადადის.
სხდომა ხვალ მომხსენებელთა სიტყვით გამოსვლებით განახლდება, რის შემდეგაც კანონპროექტი პირველი მოსმენით კენჭისყრაზე გავა. იმისთვის, რომ კანონპროექტი კანონად იქცეს, პროცედურულად, მას დეპუტატებმა სამი მოსმენით უნდა დაუჭირონ მხარი.
სხდომის პარალელურად, 12:00-დან პარლამენტის უკან საპროტესტო აქცია მიმდინარეობდა. მშვიდობიანმა აქციამ “კი — ევროპას! არა — რუსულ კანონს!” 19:00-დან პარლამენტის წინ გადაინაცვლა. აქციის მონაწილეები ქართულ ოცნებას მოუწოდებენ რუსული კანონი პარლამენტიდან გაიტანოს.
შეგახსენებთ, რომ იურიდიულ საკითხთა კომიტეტმა რუსულ კანონს პირველი მოსმენით მხარი გუშინ, 15 აპრილს დაუჭირა. სწორედ ამ განხილვის პარალელურად მიმდინარეობდა მოქალაქეების საპროტესტო აქცია.
მშვიდობიანი პროტესტისას აქციაზე მობილიზებულნი იყვნენ სპეცდანიშნულების რაზმები, შსს-მ კი ორგანიზატორებსა და მონაწილეებს მოუწოდა, არ გამცდარიყვნენ გამოხატვის თავისუფლებისა და მშვიდობიანი შეკრების კანონით დადგენილ ნორმებს, წინააღმდეგ შემთხვევაში „სამართალდარღვევის ნებისმიერი ფაქტი პოლიციის მხრიდან, კანონის ფარგლებში, დაუყოვნებლივ იქნება აღკვეთილი“.
საპროტესტო აქციაზე სპეცრაზმის გამოჩენის შემდეგ, ომბუდსმენმა განცხადება გაავრცელა, რომელშიც მან აღნიშნა, რომ “არ იკვეთება შეკრების კანონსაწინააღმდეგო ხასიათი, შესაბამისად არ არსებობს შეკრების მონაწილეთა კონსტიტუციურ უფლებაში ჩარევის საფუძველი”.
არაერთი კრიტიკული განცხადებისა და საზოგადოების პროტესტის ფონზე, დღეს, 16 აპრილს, პარლამენტის პლენარულ სხდომაზე რუსული კანონი პირველი მოსმენით განიხილება. სესიის პარალელურად, პარლამენტის უკან, 12:00-ზე პირველი საპროტესტო აქცია დაიწყება, ხოლო მეორე აქცია 19:00-ზე, პარლამენტის წინ გაიმართება.
დღეს, ისევე როგორც 15 აპრილს, პარლამენტში არ უშვებენ ონლაინ მედიის ჟურნალისტებს. პაპუაშვილმა ეს იმით ახსნა, რომ ისინი საკანონმდებლო ორგანოში პროტესტის გამოსახატად იკრიბებიან. მისივე თქმით, “ეს არ არის სივრცე აქციების ჩასატარებლად”. დღესვე პარლამენტში უსაფრთხოების ყვითელი დონე მოქმედებს, რის შედეგადაც, ვიზიტორებს საკანონმდებლო ორგანოში შესვლა ეზღუდებათ.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
პროექტის შინაარსი იგივე იქნება, ოღონდ სიტყვა „აგენტს“ არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის:
- სიძულვილი, ცენზურა, გამოხატვის თავისუფლების შეზღუდვა — “ოცნების” ინიციატივა პარლამენტშია
- რის “დაცვასაც” წინასაარჩევნოდ ქართული ოცნება ცდილობს, რუსეთმა უკვე “დაიცვა” — ნახეთ როგორ
- რა წერია ხელახლა ინიცირებულ რუსულ კანონში — დეტალურად
