ადგილობრივი სათემო ორგანიზაციები ქვიარ ადამიანებისთვის თანასწორი და უსაფრთხო სოციალური, პოლიტიკური და სამართლებრივი გარემოსა და ღირსეული ცხოვრების შექმნისთვის მუშაობენ. მიზნის მისაღწევად, სხვადასხვა აქტივობისა და პროექტის გარდა, რომლებიც გულისხმობს ქვიარ ადამიანების უფლებების ადვოკატირებას, საზოგადოების ცნობიერების ამაღლებას და სხვა, ორგანიზაციები ქვიარ ადამიანებს სერვისებსაც სთავაზობენ.
სერვისებს შორისაა ქვიარ ადამიანების ინფორმირება მათი უფლებების, შესაძლებლობებისა და არადისკრიმინაციული მიდგომების შესახებ; ასევე, იურიდიული და ფსიქოლოგიური მომსახურება, სოციალური მუშაკის მომსახურება, უფასო ტესტირებები სქესობრივი გზით გადამდებ დაავადებებზე და სხვა. სერვისები ხორციელდება, როგორც სხვადასხვა საინფორმაციო კამპანიის გზით, ასევე — შეხვედრებისა და ტრენინგების მეშვეობითაც.
ორგანიზაციებს შორის არიან თანასწორობის მოძრაობა, თემიდა, ქალთა ინიციატივების მხარდამჭერი ჯგუფი (WISG), თბილისი პრაიდი, პერიფერია.
ამ სტატიაში თბილისი პრაიდის პროექტებს განვიხილავთ.
თბილისი პრაიდი ლგბტქ+ მოძრაობაა, რომელსაც თანასწორობის იდეის სწამს და იბრძვის ჰომო/ტრანსფობიის წინააღმდეგ, მუდმივად ისწრაფვის უსაფრთხო და ინკლუზიური სივრცეებს შექმნისა და თვითგანვითარებისაკენ.
თბილისი პრაიდის მისიაა ლგბტქ+ ადამიანებისთვის თანასწორი და თავისუფალი გარემოს შექმნა, თემის გამოწვევების პოლიტიკურ დღის წესრიგში დაყენების, თემის გაძლიერებისა და საზოგადოებრივი აზრის ცვლილების გზით. დასახული მისიისა და მიზნების მისაღწევად თბილისი პრაიდი მთავარ ინსტრუმენტად ხილვადობის პოლიტიკას იყენებს.
ორგანიზაციის პროექტები
თბილისი პრაიდს არ აქვს იურისტის, ფსიქოლოგისა და სოციალური მუშაკის სერვისები, რომლებსაც სხვა სათემო ორგანიზაციები ქვიარებს სთვაზობენ, თუმცა ორგანიზაციის გუნდი თემის წევრების, მათი მშობლებისა და მხარდამჭერების ინფორმირებასა და გაძლიერებას სხვადასხვა პროექტითა თუ შეხვედრების სერიით ცდილობს.
პრაიდის კვირეული
თბილისი პრაიდი 2019 წლიდან ყოველწლიურად ღირსებისა და სიამაყის მსოფლიო თვეს უერთდება და პრაიდის კვირეულს ატარებს. პრაიდის კვირეული ლესბოსელი, გეი, ბისექსუალი, ტრანსგენდერი და ქვიარ ადამიანებისთვის ერთმანეთის დანახვის, გაერთიანების, თავისუფალი თვითგამოხატვისა და საკუთარი უფლებებისთვის ბრძოლის შესაძლებლობაა.
კვირეული მოიცავს პოლიტიკური, კულტურული და აკადემიური ხასიათის ღონისძიებებს, მათ შორის, საერთაშორისო ლგბტქი კონფერენციასა და პრაიდის ფესტივალს.
The Drag Ball
The Drag Ball, იგივე დრეგის მეჯლისი თბილისი პრაიდისა და საინიციატივო ჯგუფის მიერ ორგანიზებული ქვიარ ღამეების სერიაა, რომელიც 2022 წლის მარტში შეიქმნა და ქალაქის უმნიშვნელოვანეს კულტურულ და სოციალურ მოვლენად იქცა. The Drag Ball-ის მიზანი ლგბტქ+ ხელოვანების მხარდაჭერა, გაძლიერება და მათთვის უსაფრთხო სივრცის შეთავაზებაა, სადაც თვითგამოხატვას შეძლებენ. The Drag Ball ღამეები განსხვავებული თემატიკისაა, შემსრულებლები მაყურებელს მრავალფეროვან შოუს სთავაზობენ და ყოველთვის ეხმაურებიან მიმდინარე სოციალურ-პოლიტიკურ თემებს.
საერთო ენა
საერთო ენა თბილისი პრაიდის მედია პროექტია, რომელიც ამერიკული ონლაინ გადაცემა Middle Ground-დანაა შთაგონებული. მონაწილეები საზოგადოებისთვის აქტუალურ თემებზე კამათობენ, ყველა პოზიციას ისმენენ და საერთო ენის პოვნას ცდილობენ. გადაცემის მიზანია, დაპირისპირებული მხარეები ერთმანეთთან დიალოგში შეიყვანოს. ორგანიზაციის მოსაზრებით, საწინააღმდეგო აზრის და განსხვავებული გამოცდილების მქონე ადამიანებთან საუბარი უალტერნატივოა. მათი პოზიციაა, რომ საზოგადოებას სასიცოცხლოდ სჭირდება მშვიდი და არგუმენტირებული დიალოგით საერთო ენის გამონახვა, შესაბამისად საერთო ენა დემოკრატიული საზოგადოების შენების გზაზე წინ გადადგმული ნაბიჯია.
სერიების ნახვა სრულად ამ ბმულზე შეძლებთ.
ამაყი ოჯახები
ამაყი ოჯახები ორგანიზაციის ერთ-ერთი ყველაზე მნიშვნელოვანი პროექტია და მიზნად ისახავს ლგბტქ+ ადამიანების ოჯახების მხარდაჭერას. პროექტის ფარგლებში გამოცდილებისა და ცოდნის გაზიარების მიზნით შექმნილი ღონისძიებები უზრუნველყოფს ისეთი უსაფრთხო სივრცის შექმნას, სადაც ოჯახებს შეუძლიათ ცოდნა გაიღრმაონ და უკეთ გაიგონ თავიანთი საყვარელი ადამიანების გამოცდილება. გარდა ამისა, იქმნება მრავალფეროვანი საინფორმაციო მასალები LGBTQI+ საკითხების შესახებ, რათა შიშები ფაქტებზე, თანაგრძნობაზე და ურთიერთპატივისცემაზე დაფუძნებული მეთოდით დავძლიოთ.
აქტივისტური ბანაკები
ორგანიზაცია რეგულარულად ატარებს ისეთ საგანმანათლებლო აქტივობებს, როგორებიცაა ქვიარ ინფლუენსერების სკოლა, აქტივისტური სკოლები და ბანაკები.
ღონისძიებების მონაწილეები სწავლობენ და მსჯელობენ ისეთ თემებზე, როგორებიცაა გენდერი და სექსუალობა, ადამიანის უფლებები, დემოკრატია, ქვიარ ისტორია, სამოქალაქო აქტივიზმი, პროექტებისა და კამპანიების განხორციელება და სხვა.
ამასთან, ორგანიზაციის მიდგომა გამოირჩევა იმით, რომ ლგბტქია+ ადამიანებისთვის ცოდნის, ინფორმაციისა და უნარ-ჩვევების გადაცემის გარდა, ისინი ადამიანებს შესაძლებლობას აძლევენ, თავად განახორციელონ ლგბტქია+ თანასწორობის მხარდამჭერი ინიციატივები, პროექტები, რისთვისაც ხშირად ორგანიზაციის რესურსებსა და პლატფორმებსაც უზიარებენ.
რეგიონებში მუშაობა
თბილისი პრაიდი ლგბტქი საკითხებზე ცნობიერების ამაღლებისა და თანასწორობის ხელშეწყობის მიზნით საქართველოს რეგიონებშიც საქმიანობს. ამჟამად თბილისი პრაიდი საქართველოს ოთხ რეგიონშია: კახეთი, სამეგრელო, აჭარა და რაჭა, სადაც ისინი ხვდებიან და მუშაობენ ახალგაზრდებთან, სტუდენტებთან, სამოქალაქო საზოგადოებრივ ორგანიზაციებთან, მედიებსა და ლგბტქი ადამიანებთან. Შეხვედრები, ფილმის ჩვენებები, დისკუსიები, საჯარო ლექციები და ტრენინგები — ეს იმ ღონისძიებების ჩამონათვალია, რომლებსაც ორგანიზაცია პროექტის ფარგლებში ახორციელებს.
თბილისი პრაიდის მიმდინარე პროექტებისა და სხვა სიახლეების გასაგებად ეწვიეთ მათ Facebook გვერდს, ხოლო კითხვების შემთხვევაში გამოიყენეთ ელ-ფოსტა: [email protected]
წაიკითხეთ სხვა ორგანიზაციების სერვისების შესახებაც: