საზოგადოებაში, რომელშიც სექსი ჯერ კიდევ ტაბუა და ხშირად ის მხოლოდ გამრავლების საშუალებად მიიჩნევა და არა სიამოვნების წყაროდ, ორგაზმზე ნაკლებად ლაპარაკობენ. შესაბამისად, ცნობიერება საკმაოდ დაბალია, რაც იწვევს არაერთი მითის გავრცელებას. განსაკუთრებით ეს ეხება ქალების ორგაზმს, რადგან პატრიარქალურ სისტემებში ქალის სიამოვნება დღის წესრიგში არ დგას.
ალბათ, არაერთხელ გსმენიათ, რომ ქალებს ორგაზმი თითქმის არ აქვთ ან სექსი არ მოსწონთ. არა მხოლოდ ეს, მაგრამ ნაწილობრივ ესეც იწვევს იმას, რომ ჰეტეროსექსუალი წყვილების შემთხვევაში, სქესობრივი აქტი კაცის ორგაზმის შემდეგ სრულდება. ეს პრობლემა ახალი არ არის, მაგრამ სიახლეა ის, რომ ბოლო წლებში ქალებმა ამაზე საუბარი დაიწყეს — პარტნიორებთან, სპეციალისტებთან და დახურულ ჯგუფებშიც კი, სადაც ერთმანეთის გამოცდილებას უზიარებენ და რჩევებს, მხარდაჭერას იღებენ.
საზოგადოება, რომელიც ქალის სიამოვნებას უმნიშვნელოდ მიიჩნევს, ცხადია, რომ ჯანმრთელობისთვის ორგაზმის დადებით მნიშვნელობაზეც ნაკლებად ფიქრობს ან იკვლევს მას. თუმცა, მეცნიერების ნაწილი ამ საკითხს აქტიურად სწავლობს და საინტერესო შედეგებიც აქვთ. იმისთვის, რომ ორგაზმის დადებით გავლენაზე ქართულ ენაზეც ყოფილიყო ხელმისაწვდომი ინფორმაცია, სამეცნიერო ჟურნალისტმა, ცირა გვასალიამ და ილუსტრატორმა, ეკატერინე ლოლუამ შექმნეს პროექტი ორგაზმი.
ეს არის Facebook გვერდი, სადაც კვლევებსა და მონაცემებზე დაყრდნობით, ორგაზმის შესახებ სამეცნიერო-ტექნიკური ინფორმაცია ქვეყნდება. მასალები ასევე ქვეყნდება ვებ-გვერდზე Cactus Journalism – ორგაზმი.
“ვიწყებთ ახსნით, რა არის და რა მნიშვნელობა აქვს ორგაზმს. ასევე, რატომ შეიძლება იყოს სასარგებლო ჯანმრთელობისთვის, გარდა იმისა, რომ სასიამოვნოა და ეხმარება ადამიანებს, რომ ინტიმურობას მიაღწიონ პარტნიორებთან. ერთი მხრივ, ეს არის სამედიცინო და მეორე მხრივ, უფრო გრაფიკული და საინტერესო — ეკას ინტერპრეტაცია ტექსტების ნახატებად ქცევის შედეგად”, — გვიყვება ცირა გვასალია.
ცირა იხსენებს, რომ ჯერ კიდევ 2017 წელს გამოიწერა ამერიკული წიგნი “ორგაზმის მეცნიერება”, თუმცა მაშინ ზედაპირულად გაეცნო და თაროზე შემოდო. გეგმავდა, მოგვიანებით საფუძვლიანად მიჰბრუნებოდა და სიღრმისეულად გასცნობოდა. მეგობარ ილუსტრატორთან, ეკატერინე ლოლუასთან სტუმრობისას კი პირველად დაფიქრდა, რომ ორგაზმის სიკეთეებზე საუბარი პროექტად გადაექცია.
“3 წლის წინ ჩემს მეგობარს, ეკას, რომელსაც მოგვიანებით კიდევ უფრო დავუახლოვდი, სახლში ვეწვიე. თვალში მომხვდა მისი ნახატები, რომლებიც ადამიანის სხეულის ახლო ხედებს აღწერდა. უცებ დავაკავშირე ამ წიგნში განხილული თემები და ეკას ნახატები ერთმანეთთან და ვიფიქრე, რომ საინტერესო იქნებოდა ჩვენი ინტერესების გაერთიანება. ყოველთვის ვფიქრობდი, როგორ გამომეყენებინა ჟურნალისტურად წმინდა სამეცნიერო ლიტერატურა, რომელშიც ყველა სტანდარტია დაცული და რომელიც მონაცემების მოგროვებასთან არის დაკავშირებული მედიცინასა და მეცნიერებაში”, — გვიყვება ცირა.
იდეის მეგობართან გაზიარების შემდეგ, ცირამ და ეკატერინემ პროექტზე მუშაობა დაიწყეს. მათ პირველი ეტაპისთვის 14 პოსტის იდეა შეაგროვეს, რომელიც პროექტის დაწყების შემდეგ გამოქვეყნდებოდა და დონორ ორგანიზაციას წარუდგინეს. პროექტმა ქალთა ფონდის დაფინანსება მოიპოვა. ცირას თქმით, ორგაზმი ბევრ ადამიანს დაეხმარება სექსუალურ ემანსიპაციაში, თუმცა ის თავის თავში იმდენ თემას მოიცავს, რომ მისი ერთი პატარა პროექტით ამოწურვა შეუძლებელია.
გვიყვება მუშაობის პროცესზეც, რომელიც შემდეგნაირი იყო — ცირა და ეკა თანხმდებოდნენ, რომელ თემებზე სურდათ საუბარი. მათი მოსაზრებით, ინფორმაციის გაზიარება ჯერ ახსნა-განმარტებითი მასალებით უნდა დაწყებულიყო, რადგან ეს თემა საზოგადოებაში ტაბუირებულია. ცირა ორგაზმზე მეცნიერული ნაშრომებს თარგმნიდა და ეკას უზიარებდა, ხოლო ეკა — ტექსტების მიხედვით ნახატებს ამზადებდა.
ორგაზმის ავტორებმა საუბარი საბაზისო ინფორმაციის გაზიარებით დაიწყეს, რაც მოიცავს ქალის ორგაზმის ევოლუციური საფუძვლებს, ანორგაზმიას, ორგაზმის როლს ტკივილის რეგულირებაში, ძილისა და ორგაზმის ურთიერთქმედებას, კლიტორის დისფუნქციას დაზიანების შედეგად და ა.შ. ცირა ამბობს იმასაც, რომ მათთვის მნიშვნელოვანია ინკლუზიურობა და ქვიარ სხეულების ასახვა, რაც მათ პოსტებში ნახატების სახითაც ჩანს.
“გვერდი ირიბად ეხება ბევრს სხვადასხვა თემას. მაგალითად, ესაა სქესობრივი გზით გადამდები ინფექციებისგან დაცვა და პაპილომავირუსის საწინააღმდეგო ვაქცინაცია, რომელიც ჩვენს ქვეყანაში 45 წლამდე ქალებისთვის უფასოა. გარდა იმისა, რომ სიამოვნებაზე ვკონცენტრირდეთ, უნდა გავითვალისწინოთ უსაფრთხოებაც.
ჩვენთვის მნიშვნელოვანი იყო ამის გაცხადებაც, რომ სექსს არ მივიჩნევთ მაინცდამაინც ქალსა და კაცს შორის ურთიერთობის ფორმად და რომ მგრძნობიარეები ვართ გენდერულად. ეს გავითვალისწინეთ ნახატებშიც. მიუხედავად იმისა, რომ გენდერი არ იყო ჩვენი მთავარი თემა, გვინდოდა, რომ ეს კომპონენტიც გვქონდა, თუნდაც მცირე დოზებით”, — გვიყვება ცირა.
ცირას თქმით, იმას, რომ ორგაზმზე ხმამაღლა საუბარი ადამიანებისთვის სირცხვილისმომგვრელია, გვერდის მომხმარებელთა სტატისტიკაც მოწმობს — ჩართულობა და ინტერესი დიდია, თუმცა ისინი გვერდის მოწონებისგან ან კომენტარების დატოვებისგან თავს იკავებენ.
“ორგაზმის შეგრძნება ერთ-ერთი ყველაზე მნიშვნელოვანი და სასარგებლო რამეა, რომლის წარმოქმნაც ადამიანის ორგანიზმს შეუძლია, თავისი ნევროლოგიური საფუძვლებიდან გამომდინარე. ტექნიკურად, ორგაზმი პერიფერიული გაღიზიანების შედეგად, თავის ტვინში წარმოქმნილი იმპულსების შედეგია, რომლებიც კუნთების შეკუმშვას იწვევს. ეს არის შეგრძნება, რომელსაც თავის ტვინი მართავს, ძალიან მრავალფეროვანი და მრავალმხრივ დამაჯილდოებელია,” — ცირა გვასალია.
ცირას თქმით, ორგაზმი ჩვენი ორგანიზმის დიდ შესაძლებლობად უნდა მივიჩნიოთ, რომელიც არამხოლოდ სასიამოვნო, არამედ სასარგებლოცაა. ამბობს იმასაც, რომ უკეთესი ორგაზმისთვის საჭიროა ჯანმრთელობაზე ზრუნვა. მაგალითად, 7-8 საათის განმავლობაში უწყვეტი ძილი, წყლის ხშირად დალევა, სწორი კვება და ფიზიკური აქტივოვა, ასევე, ალკოჰოლისა და ნარკოტიკების მოხმარებისგან თავის შეკავება.
“ორგაზმის სასარგებლოობაზე მისი სხვა დანიშნულებით გამოყენებაც მიანიშნებს — მაგალითად, შაკიკის შემთხვევაში, ორგაზმის მეშვეობით, შესაძლებელია ტკივილის შემსუბუქება. შესაბამისი წამლისგან განსხვავებით, რომლებიც ნევროლოგიური დეპრესანტებია და სხვა ძლიერი გვერდითი მოვლენები ახლავს, ორგაზმს არ აქვს გვერდითი მოვლენები.
ერთ-ერთი ჰიპოთეზის თანახმად, ძუძუს თავების სტიმულირება სიმსივნის რისკს ამცირებს — კერტის რეგულარული სტიმულაციის დროს ოქსიტოცინი გამოიყოფა, რომელიც დაჭიმულ მიოეპითელურ ქსოვილებს კუმშავს და ამოძრავებს, რის შემდეგად დაჭიმული ჯირკვალი მოეშვება, თავისუფლდება და ძუძუდან კანცეროგენური სითხე გამოიდევნება. ასევე, კვლევები მოწმობს, რომ წლების განმავლობაში ხშირი ეაკულაცია პროსტატის სიმსივნის რისკებს ამცირებს”, — ამბობს ცირა.
ცირა საუბრობს ურთიერთობებსა და კომუნიკაციის მნიშვნელობაზეც, რომელიც უნდა გვქონდეს როგორც პარტნიორ(ებ)თან, ასევე ჩვენს ექიმებთან.
“ერთმანეთთან გახსნილები უნდა ვიყოთ და კომუნიკაცია გვქონდეს. მოვუსმინოთ ერთმანეთს, გავუზიაროთ და ვენდოთ — სურვილის შემთხვევაში ყველაფერი შესაძლებელია. მნიშვნელოვანია წყვილებს შორის თერაპიაც, რაც ჩვენს კულტურაში, სამწუხაროდ, არ არის დანერგილი”, — ამბობს ცირა.
“ორგაზმი ჩემთვის არის ეიფორია, ადრენალინი, ფრიქცია და სიახლოვე. Საბოლოო ჯამში უდიდესი სიამოვნება. ანორგაზმიის დროს ერთ-ერთი გამოსავალია, რომ უბრალოდ არ კონცენტრირდე ორგაზმზე და პროცესით მიიღო სიამოვნება. ამ დროს, თუ საკმარისად მოდუნდები, შესაძლოა ორგამზი სრულიად მოულოდნელად განიცადო, რადგან ორგაზმის მაპროვოცირებელი მეტწილად თავის ტვინია და არა ფრიქცია. ძალიან მინდა, ვინც ჩვენს სტატიებსა და ილუსტრაციებს გაეცნობა, სამედიცინო დონეზე გაიგოს ორგაზმის როლი. ორგაზმი და სექსი თითქოს არ არის დემონიზებული, თითქოს არ ადევს ტაბუ, მაგრამ რეალურად არის და ბევრი მითი არსებობს”, — ეკატერინე ლოლუა.
ორგაზმი ქოლგა პროექტის, კაქტუსის, ნაწილია, რომელიც, თავის მხრივ, საერთაშორისო წყაროებზე დაყრდნობით, სანდო, სამეცნიერო ინფორმაციას აგროვებს ჯანმრთელობისა და გარემოს დაბინძურების შესახებ და ქართულ ენაზე თარგმნის, რათა მკითხველისთვის ეს ინფორმაცია მეტად ხელმისაწვდომი იყოს.
“კაქტუსი არის ძირითადი პროექტი, რომლის ქოლგის ქვეშ არის ორგაზმი. კაქტუსის მიზანია, რომ საქართველოში სწორი ინფორმაციისა და სანდო წყაროების მოძიების კულტურა ჩამოვაყალიბოთ”, — განმარტავს ცირა.