„თანასწორობის მოძრაობა“ ქვიარ-ორგანიზაციაა, რომლის მიზანიცაა, ხელი შეუწყობს LGBTQ+ თემისა და ქალების სრულფასოვან ინტეგრაციას საზოგადოებაში, ამავდროულად კი იმუშაოს საზოგადოებაში არსებული ჰომოფობიისა და სექსიზმის აღმოსაფხვრელად. ორგანიზაცია უზრუნველყოფს საჭიროებებზე დაფუძნებულ სოციალური თუ სამართლებრივი სერვისების მიწოდებასა და თემის მობილიზაციას, ასევე მუშაობს საზოგადოების ცნობიერების შეცვლისა და პოლიტიკის ადვოკატირებისთვის.
წარმოგიდგენთ „თანასწორობის მოძრაობის“ 2023 წლის ნოემბრის მიმოხილვას:
1. აივის უფასო თვითტესტის შეკვეთა სოციალურ ქსელ Grindr-ში გახდა ხელმისწვდომი
გაცნობის აპლიკაცია Grindr-ისა და „თანასწორობის მოძრაობის“ პარტნიორობით აივ-ინფექციის თვითტესტისა და პრევენციული საშუალებების ნაკრების მიღება კიდევ უფრო მარტივი გახდა.
„Grindr for Equality“ არის პროგრამა, რომელიც მრავალი წელია აქტიურად მიმდინარეობს და მისი მთავარი მიზანი LGBTQ+ თემის უსაფრთხოების, ჯანმრთელობისა და უფლებების დაცვაზე ზრუნვაა. პროგრამა აქტიურად მუშაობს აივ-ინფექციის ტესტირების პოპულარიზებასა და ხელმისაწვდომობის ზრდაზე.
Grindr-სა და „თანასწორობის მოძრაობას“ მრავალხნიანი თანამშრომლობის გამოცდილება აქვთ. თუკი ადრე აპლიკაციის მომხმარებლებს ბანერის სახით ეცნობებოდათ აივ-ინფექციის ტესტის, კონდომებისა და ლუბრიკანტების უფასოდ და ანონიმურად მიღების შესაძლებლობის შესახებ, ამჯერად მომხმარებლებს აპლიკაციიდან გაუსვლელად, სულ რაღაც 1 წუთში შეუძლიათ, შეუკვეთონ ზემოაღნიშნული პროდუქტი და სასურველ მისამართზე მიიღონ. ამისათვის საჭიროა აპლიკაციის მენიუდან აირჩიოთ „Free HIV Home Test“, მიუთითოთ თქვენი ტელეფონის ნომერი, სასურველი მისამართი და დაელოდოთ ზარს ორგანიზაციიდან.
ორგანიზაციის ცნობით, ამჟამად მომატებული შეკვეთებიდან გამომდინარე გაზრდილია მიწოდების დრო, აგრეთვე მარაგში არ არის პროდუქტი „ქისა“, თუმცა მომხმარებლები ჩვეულებრივ მიიღებენ სხვა შეკვეთილ პროდუქტებს (აივ-ის ტესტს, კონდომებსა და ლუბრიკანტებს) გაუმჭვირვალე, თეთრ კონვერტებში.
2. „თანასწორობის მოძრაობამ“ ჩაატარა სტრესმედეგობის ტრენინგი LGBTQ+ აქტივისტებისთვის
ჰომოფობიის პოლიტიკური ინსტრუმენტალიზება LGBTQ+ თემის მოწყვლადობისა და დაუცველობის ერთ-ერთი მნიშვნელოვანი მიზეზია. LGBTQ+ თემის წევრები და აქტივისტები არამხოლოდ პირადად აწყდებიან ცრურწმენებსა და სტერეოტიპებზე დაფუძნებულ უარყოფით, ხშირად მტრულ განწყობებს, არამედ მათ ასევე უწევთ ქვიარ თემის სხვა წევრების მხარდაჭერა და გაძლიერება, მათი საჭიროებებისა და წუხილების გაზიარება.
ასეთ პირობებში ცხოვრებისა და მუშაობის სტრესულ ფაქტორებთან დაკავშირებით „თანასწორობის მოძრაობის“ ინიციატივით გაიმართა LGBTQ+ აქტივისტების გასვლითი შეხვედრა, სადაც მოწვეულ სპეციალისტთან ერთად იმსჯელეს არსებულ გამოწვევებზე და განიხილეს სტრესმედეგობის განვითარების სტრატეგიები.