მედია აპრილი 2023 წლის 25 აპრილს ხუთმა ადამიანმა დააფუძნა: ნანა გობეჯიშვილი, შოთა ფუტკარაძე, ხატია ღოღობერიძე, გიორგი ბასხაჯაური, მარიამ (გაბი) გაბელაია.

ჩვენი პრინციპები და ღირებულებები დამყარებულია ადამიანის უფლებების პატივისცემაზე. ვიბრძვით თანასწორობისა და მრავალფეროვნებისთვის, ვართ კონსტიტუციით გარანტირებული უფლებების სადარაჯოზე და ვეწინააღმდეგებით დისკრიმინაციას. გვჯერა, რომ ყველა ადამიანი თანასწორია, მიუხედავად სექსუალური ორიენტაციისა, გენდერული იდენტობისა, ეთნიკური თუ რელიგიური კუთვნილებისა და ა.შ. 

მედია აპრილის ჟურნალისტური პროდუქტები სწორედ ამისკენ იქნება მიმართული. მკითხველს ვებგვერდზე შეუძლია, ნახოს ანალიტიკური და შემეცნებითი მასალები, წაიკითხოს ბლოგები, გაიცნოს ადამიანები, რომლებმაც აქტივიზმში (და არა ამხოლოდ) დიდი წვლილი შეიტანეს, გაიგოს თემატური ახალი ამბები და განიტვირთოს ჩვენი ხელოვნებისა და გართობის რუბრიკის საშუალებით, სადაც მიმოვიხილავთ წიგნებს, ფილმებს, სერიალებს და ა.შ.

ჩვენი ორგანიზაციის მიზანია, შევამციროთ დისკრიმინაცია, გავზარდოთ ცნობიერება და მივცეთ ტრიბუნა ადამიანებს, რომლებიც მეინსტრიმული მედიისთვის ნაკლებად ხილვადები არიან. თავდაპირველად, ვიმუშავებთ ლგბტქია+ ადამიანებისა და ქალების უფლებრივი მდგომარეობის გაუმჯობესებისთვის, სამომავლოდ კი, ვაპირებთ, უფრო ფართოდ ავსახოთ ყველა არადომინანტური ჯგუფისთვის მნიშვნელოვანი საკითხები საქართველოსა და რეგიონში.

მედია აპრილს შეგიძლიათ თვალი მიადევნოთ საქართველოში პოპულარული ყველა სოციალური ქსელის საშუალებით: Facebook, Instagram, TikTok, Twitter.

ჩვენი გუნდი

39 სტატია
მედია აპრილის ერთ-ერთი დამფუძნებელი და მთავარი რედაქტორი. 2009 წლიდან აქტიურ ჟურნალისტიკაშია, გაუშუქებია პარლამენტისა და მთავრობის სხდომები, სასამართლო პროცესები, აქციები და დარბევები — მოკლედ, ყველაფერი, რაც ქვეყანაში ამ წლების განმავლობაში ხდებოდა. პოლიტიკური ახალი ამბები ბოლომდე არ ეთმობა, მაგრამ ყველაზე მეტად მაინც ადამიანის უფლებების მიმართულებით მუშაობა მოსწონს. ბოლო წლებში აქტიურად მუშაობს ქალებისა და ლგბტქია+ თემის რეპრეზენტაციაზე.
193 სტატია
შოთა ფემინისტი აქტივისტი, მედია აპრილის თანადამფუძნებელი და ჟურნალისტია. ის უკვე 10 წელზე მეტია, ქართული ინტერნეტ-სივრცის გამდიდრებისა და ონლაინ-განათლების მიმართულებით მუშაობს, არის მთარგმნელი და რედაქტორი. მისი ინტერესების სფეროებია გენდერი, სექსუალობა და სექსუალურ-რეპროდუქციული ჯანმრთელობა, ქალთა და ქვიარ თემის უფლებები. უყვარს სახლიდან მუშაობა და შემწვარი კარტოფილი.
128 სტატია
გიორგი მედია აპრილის ერთ-ერთი დამფუძნებელი და ჟურნალისტია. უყვარს ლიტერატურა, თეატრი, კინო და წერა ამ ყველაფერზე. თუმცა მისი ინტერესები მხოლოდ ამით არ შემოიფარგლება — ბოლო 2 წელია, ძირითადად, ლგბტქია+ და ქალთა უფლებების მიმართულებით ქმნის ჟურნალისტურ პროდუქტებს.
Social Media Manager 4 სტატია
მედია აპრილის დამფუძნებლებს შორისაა გაბიც, რომელიც, პარალელურად, ჩვენი სოციალური მედიის მენეჯერია. დაინტერესებულია ყველაფერ იმით, რაც Gen Z-ის აწუხებს და აღელვებს. უყვარს გართობა, სულ ონლაინაა და ახალ-ახალი ტრენდებით გვამარაგებს.
234 სტატია
ნანა მედიის მკვლევარი, ჟურნალისტი და მედია აპრილის ერთ-ერთი დამფუძნებელია. მის ინტერესებს შორისაა ქვიარ-ფემინისტური აქტივიზმი და არადომინანტური ჯგუფების რეპრეზენტაცია საზოგადოების თითოეული წევრისთვის თანასწორი სოციალური და პოლიტიკური გარემოს შესაქმნელად. ნანა ჩვენი გუნდის ის წევრია, რომელიც ბევრს ფიქრობს და ნაკლებს ლაპარაკობს.
90 სტატია
თამუნა ჩვენი გუნდის რედაქტორია. 7 წელია აქტიურ ჟურნალისტიკაშია და სრულად იყო ჩართული პოლიტიკური ამბების ქაოსში. გაუშუქებია არაერთი აქცია, ხშირად მოხვედრილა ცრემლსადენ გაზსა და წყლის ჭავლში და დღემდე არ ეთმობა ახალი ამბების დაძაბული გარემო. დიდ ენერგიას ხარჯავს რუსულ დეზინფორმაციასა და პროპაგანდასთან ბრძოლაში. უყვარს მუსიკა, ცეკვა და ყველა-ფერი. დატვირთული გრაფიკის მიუხედავად, სულ ცდილობს, იპოვოს დრო მოგზაურობისთვის და აბედნიერებს ახალი აღმოჩენები.

სარედაქციო კოდექსი

მედია აპრილის გუნდი მუშაობს საქართველოს ჟურნალისტური ეთიკის ქარტიის პრინციპების შესაბამისად. ამა თუ იმ თემაზე მუშაობისას ჩვენ ვხელმძღვანელობთ „არ ავნო“ პრინციპით. ამასთან, ჩვენ გვაქვს სარედაქციო კოდექსი, რომლის დაცვის ვალდებულება აქვს მედია აპრილის ყველა თანამშრომელს.

სიზუსტე — ფაქტებს ვაშუქებთ წყაროებზე, ზუსტ მონაცემებზე დაყრდნობით. ჩვენ მიერ მომზადებული ჟურნალისტური პროდუქტები იქნება დადასტურებული, დაბალანსებული და გადამოწმებული. ჩვენ წინააღმდეგი ვართ ფაქტების მიზანმიმართული დამახინჯებისა და ინტერპრეტაციის. მკითხველთან ვართ გულახდილი, როცა არ გვაქვს სრული სურათის საჩვენებლად საკმარისი ინფორმაცია.

კეთილსინდისიერება — ინფორმაციის მოპოვებისას ვიყენებთ მხოლოდ კეთილსინდისიერ მეთოდებს. პატივს ვცემთ ადამიანის კონფიდენციალურობას და არ ვამხელთ წყაროს ვინაობას. თანხმობის გარეშე არ ვასაჯაროებთ ამა თუ იმ პირის მიერ მოწოდებულ ინფორმაციას და არ ვიყენებთ ფარულ ჩანაწერებს, თუ არ არსებობს განსაკუთრებული საზოგადოებრივი ინტერესი. ჩვენ არ ვიღებთ ქრთამს და არ ვამზადებთ „შეკვეთილ“ სარედაქციო მასალებს ამა თუ იმ პირის დადებითად ან უარყოფითად წარმოჩენის მიზნით.

გამჭვირვალობა — ჩვენ ვიქნებით გამჭვირვალე როგორც ჩვენი დაფინანსების წყაროების, ასევე, სარეკლამო მასალების შემთხვევაში. ყველა ტიპის სარეკლამო მასალას ექნება შესაბამისი მითითება, რათა აუდიტორიამ მარტივად შეძლოს სარედაქციო და დაფინანსებული მასალების ერთმანეთისგან გამიჯვნა და მიიღოს ინფორმირებული გადაწყვეტილება.

სარედაქციო დამოუკიდებლობა — ჩვენ არ ვეკუთვნით არცერთ პოლიტიკურ პარტიას და თავისუფალი ვართ როგორც პოლიტიკური, ისე კომერციული გავლენისგან. ფაქტებს ვაშუქებთ მიუკერძოებლად, აზრთა მრავალფეროვნების გათვალისწინებით. რედაქციის გადაწყვეტილებებზე გავლენას არ ახდენს გარე ან პირადი ინტერესები.

პირადი ცხოვრების ხელშეუხებლობა — ჩვენ არ ვასაჯაროებთ ინფორმაციას სხვების პირადი ცხოვრების შესახებ, თუ არ არსებობს თავად იმ ადამიანის თანხმობა და სურვილი, ასევე, მაღალი საზოგადოებრივი ინტერესი. ჩვენ ვაფიქსირებთ, რომ საჯარო ინტერესი განსხვავდება ადამიანების ცნობისმოყვარეობისგან და ჩვენი მიზანია, გავავრცელოთ ინფორმაცია, რომელიც დააკმაყოფილებს საჯარო ინტერესს.

დისკრიმინაციის მიუღებლობა — ჩვენ ვიღებთ ვალდებულებას, რომ ჩვენ მიერ მომზადებულ მასალებში არ დავუშვათ ადამიანების დისკრიმინაცია სექსუალური ორიენტაციის, გენდერული იდენტობის, რელიგიური, ეთნიკური თუ სხვა ნიშნით. მეტიც, ჩვენი გაცხადებული მიზანია დისკრიმინაციასთან ბრძოლა.

გამოხატვის თავისუფლება — ჩვენ პატივს ვცემთ გამოხატვის თავისუფლებას და მიგვაჩნია, რომ ყველას აქვს უფლება, გამოხატოს აზრი თავისუფლად. ეს არ ეზღუდებათ არც ჩვენთან დასაქმებულ ადამიანებს, თუმცა გამონაკლისია დისკრიმინაციული გამონათქვამები. ჩვენ არ ვთანამშრომლობთ ადამიანებთან, რომლებიც ამა თუ იმ ფორმით ახდენენ ადამიანების დისკრიმინაციას.

მრავალფეროვნება — ავსახავთ საზოგადოებაში არსებულ მრავალფეროვნებას და ვეცდებით, გავზარდოთ ცნობიერება იმის შესახებ, რომ ადამიანები ერთმანეთისგან განსხვავდებიან, მაგრამ ყველა თანასწორია.

ბავშვების გაშუქება — განსაკუთრებული სიფრთხილით მოვეკიდებით ბავშვების გაშუქებას, სადაც ამოსავალი იქნება „არ ავნო“ პრინციპი. ვიმუშავებთ იმაზე, რომ ბავშვთა ფიზიკური და ემოციური კეთილდღეობა იყოს უზრუნველყოფილი. 

პლაგიატის მიუღებლობა — ჩვენთვის მიუღებელია პლაგიატი. სხვა მედიის ფოტოს, ვიდეოს, ტექსტის გამოყენება შეიძლება მხოლოდ იმ შემთხვევაში, თუ ამ ინფორმაციის მიღების ყველა სხვა გზა ამოწურულია. ასეთ დროს, გარკვევით ვუთითებთ წყაროს და იმავეს მოლოდინი გვაქვს კოლეგების მხრიდანაც.

ანგარიშვალდებულება — მიუხედავად ეთიკური პრინციპებისადმი ერთგულებისა, ჟურნალისტებმა შეიძლება დაუშვან შეცდომები. ჩვენ ღია ვართ სამართლიანი კრიტიკის მიმართ და ვიღებთ პასუხისმგებლობას ჩვენ მიერ დაშვებულ შეცდომებზე. ვაღიარებთ შეცდომას, თუ ის დაშვებულია, და ვიღებთ ვალდებულებას, რომ არაზუსტი ინფორმაციის გავრცელების შემთხვევაში, გავასწორებთ სათანადო წესით და არ დავმალავთ ინფორმაციას დაშვებული შეცდომის შესახებ. ნებისმიერი პრეტენზიის შესახებ მკითხველს შეუძლია მოგვმართოს ელექტრონულ ფოსტაზე: [email protected], რის შემდეგაც ჩვენ განვიხილავთ განცხადებას 7 სამუშაო დღის ვადაში.

 

სარედაქციო კოდექსი მომზადებულია საქართველოს ჟურნალისტური ეთიკის ქარტიის პრინციპებზე, BBC-სა და Reuters-ის სარედაქციო კოდექსებსა და მედია აპრილის გუნდის პირად გამოცდილებაზე დაყრდნობით.

 

მედია აპრილის ფინანსური მხარდამჭერები არიან:

The European Endowment for Democracy
Women's Fund in Georgia
Open Society Georgia Foundation