მთავრობის ადმინისტრაციის ცნობით, საქართველოს პრემიერმინისტრი, ირაკლი კობახიძე საქართველოში აშშ-ის ელჩს, რობინ დანიგანს, ევროკავშირის ელჩს, პაველ ჰერჩინსკისა და დიდი ბრიტანეთისა და ჩრდილოეთ ირლანდიის გაერთიანებული სამეფოს ელჩს, მარკ კლეიტონს შეხვდა. განცხადებაში აღნიშნულია, რომ შეხვდრის მთავარი თემა რუსული კანონი იყო.
ადმინისტრაციის ცნობით, პრემიერმინისტრმა ელჩებთან განაცხადა, რომ კანონი “სრულად შეესაბამება ყველა ძირითად სამართლებრივ პრინციპს და ის ემსახურება ერთადერთ მიზანს − არასამთავრობო ორგანიზაციებისა და შესაბამისი მედიასაშუალებების ფინანსების ყოველწლიურ გასაჯაროებას”.
აღსანიშნავია, რომ არასამთავრო ორგანიზაციებისა და მედიების დაფინანსება უკვე გამჭვირვალეა; ინფორმაცია ორგანიზაციების დაფინანსების შესახებ, მათ ვებგვერდებზეა განთავსებული და ნებისმიერი ადამიანისთვისაა ხელმისაწვდომი. ამასთან, ორგანიზაციებს ვალდებულება აქვთ, დროის გარკვეულ პერიოდში, შეავსონ და წარადგინონ ფინანსური დეკლარაციები, რომლებზეც წვდომა ფინანსთა სამინისტროსა და სხვა შესაბამის უწყებებს აქვთ.
“ირაკლი კობახიძის თქმით, მაშინ, როდესაც ხელისუფლება თავად აჩვენებს გამჭვირვალობის მაგალითს და ქვეყნდება მთავრობის ყველა გადაწყვეტილება თუ სამართლებრივი აქტი, გაუგებარია, რატომ არის მიუღებელი არასამთავრობო ორგანიზაციებისთვის გამჭვირვალობის მინიმალური სტანდარტის დაკმაყოფილება. მთავრობის მეთაურმა კიდევ ერთხელ დაადასტურა ხელისუფლების სრული მზადყოფნა კანონთან დაკავშირებით ღია დისკუსიისთვის, რათა ქართულ საზოგადოებას და საქართველოს მეგობრებს არცერთი კითხვის ნიშანი არ დარჩეთ”, — აღნიშნულია განცხადებაში.
ელჩებს, კობახიძესთან შეხვედრის შემდგომ, ჯერჯერობით კომენტარი არ გაუკეთებიათ.
დღეს, დილის 10 საათიდან, საქართველოს პარლამენტის იურიდიულ საკითხთა კომიტეტში ქართული ოცნების მიერ 3 აპრილს ხელახლა ინიციირებული რუსული კანონი განიხილება. განხილვის პარალელურად, პარლამენტის შენობის უკან, რუსული კანონის საპროტესტო აქცია გაიმართა.
თუმცა, აკრედიტაციის ქონის მიუხედავად, ონლაინმედიების ჟურნალისტებს პარლამენტში შესვლის საშუალებას ისევ არ აძლევენ. შეგახსენებთ, რომ იგივე მოხდა 8 აპრილს, როდესაც რუსული კანონი პირველად განიხილებოდა პარლამენტის ბიუროს სხდომაზე.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
მდინარაძეს არ დაუმალავს, რომ პროექტის შინაარსი იგივე იქნება, ოღონდ სიტყვა “აგენტს” არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის:
- სიძულვილი, ცენზურა, გამოხატვის თავისუფლების შეზღუდვა — “ოცნების” ინიციატივა პარლამენტშია
- რის “დაცვასაც” წინასაარჩევნოდ ქართული ოცნება ცდილობს, რუსეთმა უკვე “დაიცვა” — ნახეთ როგორ
- რა წერია ხელახლა ინიცირებულ რუსულ კანონში — დეტალურად
