დღეს, 9 აპრილს, რესპუბლიკის მოედნიდან პარლამენტის მიმართულებით გაიმართა მარში, რომლის მიზანიც რუსული კანონის ხელახლა ინიცირების გაპროტესტება იყო.
“ჩვენ ვირჩევთ ევროპას, საქართველო არასდროს იქნება რუსეთი! ერთად დავიცვათ 9 აპრილის მონაპოვარი! კი ევროპას! არა რუსულ კანონს!”, — აცხადებდნენ ორგანიზატორები აქციის ანონსზე.
მარში მას შემდეგ დაიგეგმა, რაც რუსული კანონის ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
მდინარაძეს არ დაუმალავს, რომ პროექტის შინაარსი იგივე იქნება, ოღონდ სიტყვა “აგენტს” არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ფოტოებით მოგიყვებით, რა ხდებოდა აქციაზე.
პირველ რიგში გეტყვით, რომ საქართველოსა და ევროკავშირის დროშებთან ერთად, გასული წლის მსგავსად, დღევანდელ აქციაზეც შეხვდებოდით ბევრ საინტერესო პლაკატს. გთავაზობთ რამდენიმე მათგანს:
აქციაზე ნახავდით სხვადასხვა ასაკის ადამიანს, რომლებსაც ევროპისკენ სწრაფვა აერთიანებთ.
რუსთაველის გამზირზე შეკრებილთა ნაწილი ბავშვებთან ერთად იყო გამოსული და ასე მათთვის უკეთეს მომავალს ითხოვდა.
ქართული ოცნება რუსულ კანონზე მსჯელობას მომდევნო კვირაში აპირებს, მიუხედავად იმისა, რომ ამ ინიციატივას აკრიტიკებენ არამხოლოდ საქართველოში, არამედ, განცხადებები კეთდება ჩვენი დასავლელი პარტნიორების მხრიდანაც. საქართველოში კი ძნელად მოიძებნება სფერო, რომლის წარმომადგენლებმაც განცხადება ან პირადი პოზიცია არ გაავრცელეს.
ამავე თემაზე მეტი ინფორმაციისთვის: