გენერალური პროკურატურის ცნობით, ქუთაისის სააპელაციო სასამართლომ ბათუმის საქალაქო სასამართლოს გადაწყვეტილება შეცვალა და აღკვეთის ღონისძიება გირაო პატიმრობით შეუცვალა 80 წლამდე კაცს, რომელიც შშმ პირის გაუპატიურების ფაქტზეა ბრალდებული.
10 თებერვალს ბათუმის საქალაქო სასამართლომ ბრალდებულის მიმართ აღკვეთის ღონისძიების სახით 50 000-ლარიანი გირაო პატიმრობის უზრუნველყოფით გამოიყენა, თუმცა, საგამოძიებო უწყებამ ეს გადაწყვეტილება გაასაჩივრა.
პროკურატურის ცნობით, შსს-ს მიერ ჩატარებული გამოძიებით დადგინდა, რომ ბრალდებულმა შშმ პირი გააუპატიურა.
“სამართალდამცავებმა ბრალდებული 7 თებერვალს დააკავეს. მას ბრალდება საქართველოს სისხლის სამართლის კოდექსის 137-ე მუხლის მესამე ნაწილის “დ” და 138-ე მუხლის მეორე ნაწილის “დ” ქვეპუნქტებით (წინასწარი შეცნობით შეზღუდული შესაძლებლობის მქონე პირის გაუპატიურება და სექსუალური ხასიათის სხვაგვარი ქმედება) წარედგინა”, — აღნიშნულია განცხადებაში.