პრემიერ მინისტრმა, ირაკლი ღარიბაშვილმა ევროკომისიის მიერ საქართველოსთვის ევროკავშირის კანდიდატის სტატუსთან დაკავშირებით პოზიტიური რეკომენდაციის შესახებ ბრიფინგი გამართა. ღარიბაშვილმა არაერთი მადლობა გადაუხადა ქართული ოცნების გუნდს და არ გამორჩენია ბიძინა ივანიშვილიც, მხარდაჭერისთვის მადლიერება გამოხატა საერთაშორისო პარტნიორების მიმართ, ასევე აღნიშნა, რომ ეს გამარჯვება, აღიარება, ღირსეული გადაწყვეტილება ეკუთვნის ქართველ ხალხს.
“რა თქმა უნდა, ეს პერიოდი იყო ძალიან დატვირთული, საკმაოდ დატვირთული ემოციური თვალსაზრისთაც. ვინაიდან ჩვენ, მოგეხსენებათ, რომ უზარმაზარი სამუშაო გავწიეთ. მე მინდა ჩვენს ერთიან, ძლიერ გუნდს გადავუხადო მადლობა, საერთოდ პარლამენტს, ჩვენი გუნდის თითოეულ წევრს, პარლამენტის თავმჯდომარეს, ჩვენი პარტიის თავმჯდომარეს, ჩვენი გუნდის თითოეულ წევრს, ვინაიდან ეს იყო ჩვენი საერთო მუშაობის შედეგი. ჩვენ, მოგეხსენებათ, ბოლო ერთი წლის განმავლობაში, რომ იტყვიან 24 საათის განმავლობაში ვმუშაობდით, თორმეტი პუნქტის შესრულებაზე. ჩვენ დღეს ვიხილეთ ანგარიში, რომელიც არის ერთმნიშვნელოვნად და მკაფიოდ პოზიტიური, დადებითი და რომ ეს გადაწყვეტილება ეფუძნება მიღწეულ შედეგს”, — აღნიშნა ღარიბაშვილმა.
ღარიბაშვილმა აღნიშნა, რომ რეკომენდაცია მიღწეულ შედეგს ეფუძნება, რომელიც ხალხის მიერ არჩეულმა ხელისუფლებამ დადო და მცდარი უწოდა “სპეკულაციას”, რომ “ეს მხოლოდ, ასე ვთქვათ, ხალხის ნების გამოხატულების გამო იქნა მიღწეული”.
ღარიბაშვილის თქმით, ქართულ ოპოზიციასა და პრეზიდენტს არაფერი გაუკეთებიათ ევროინტეგრაციისთვის და ერთადერთი, ვინც რაიმე გააკეთა, ქართული ოცნების გუნდია.
“მიუხედავად უამრავი წინააღმდეგობისა, საბოტაჟისა თუ პროვოკაციებისა და არაერთი დესტრუქციული ქმედებისა, შიდა თუ გარე მტრების ერთობლივი, კოორდინირებული მოქმედებებისა, ჩვენ გავიმარჯვეთ, ჩვენმა ქვეყანამ გაიმარჯვა დღეს ჩვენმა ხალხმა გაიმარჯვა, გაიმარჯვა ჩვენმა სიმართლემ”, — განაცხადა ღარიბაშვილმა.
რაც შეეხება ევროკომისიის თავმჯდომარეს, ურსულა ფონ დერ ლაიენმა ევროკომისიის გადაწყვეტილების გამოცხადებისას მთავარი აქცენტი ხალხის მისწრაფებაზე გააკეთა და აღნიშნა ისიც, რომ “ეს მისწრაფება უკეთ უნდა იქნეს არეკლილი ოფიციალური უწყებების მიერ, თქვენი და სამოქალაქო პოზიციების მეტად გათვალისწინება უნდა მოხდეს ეროვნულ ინტერესებთან დაკავშირებით”.
გავლენიანი ორგანიზაციების კვლევებით, საქართველოს მოსახლეობის უმრავლესობა ევროკავშირში გაწევრიანებას უჭერს მხარს. ამის ფონზე ხელისუფლების მხრიდან რეკომენდაციების დიდი ნაწილი შეუსრულებელია ან ნაწილობრივ არის შესრულებული. გარდა ამისა, წევრობის განაცხადის შეტანის შემდეგ მათ არაერთი ნაბიჯი გადადგეს, რომელიც ეწინააღმდეგებოდა რეკომენდაციებს და ევროკავშირის ღირებულებებს — აქტივისტების ცარიელი ფურცლებისთვის დაკავება; რუსული კანონის ინიციირება, რასაც მრავალათასიანი პროტესტი და პოლიციის მიერ ძალადობრივი დარბევა მოჰყვა; რუსეთის მოქალაქეების და რუსული ფულის შემოდინების ზრდა; სანქცირებული პირების წინააღმდეგ უმოქმედობა; პოლიტიკური თანამდებობის პირების მხრიდან ადამიანის უფლებებისა და უფლებადამცველების წინააღმდეგ გაჟღერებული ფრაზები თუ ძალადობრივი, პრორუსული ჯგუფების წინააღმდეგ უმოქმედობა და მათი დაუსჯელობა.