დროშა მარტივი და კარგი საშუალებაა საერთო ნიშნის მქონე თემისა თუ ჯგუფის გამოსახატად და გასაერთიანებლად. გამონაკლისს არც LGBTQ+ თემი წარმოადგენს. მართალია, ქვიარ სიმბოლოებიდან ყველაზე ცნობილი „ცისარტყელას დროშაა“, თუმცა მის გარდა არსებობს კიდევ არაერთი სიმბოლო, რომელიც ადამიანის იდენტობების მრავალფეროვანი სპექტრის სხვადასხვა ასპექტს გამოხატავს. მათ შორისაა ტრანსგენდერების დროშაც, რომლის ისტორიასა და ფერების მნიშვნელობაზეც ამ სტატიაში ვისაუბრებთ.
► ტრანსგენდერი არის ადამიანი, რომლის გენდერული იდენტობაც განსხვავდება მისთვის დაბადებისას მინიჭებული სქესისგან.
ტრანსგენდერთა დროშის ისტორია
ტრანს-დროშა 1999 წელს შექმნა მონიკა ჰელმსმა — ტრანსგენდერმა ქალმა, აქტივისტმა და აშშ-ის საზღვაო ძალების ვეტერანმა, რომელიც ტრანსგენდერი ამერიკელი ვეტერანების ასოციაციის თანადამფუძნებელი იყო. ის პირველად 2000 წელს აღიმართა ფენიქსის ღირსების მარშზე.
ჰელმსმა 2017 წელს Daily Beast-თან ინტერვიუში აღნიშნა, რომ დროშის დიზაინი მას ერთ დილას „გამოეცხადა“, თითქოს ეს მოვლენა „ღვთიური ძალების ჩარევით“ მომხდარიყოს. როდესაც ის ამ დროშიც პირველდ მივიდა მარშზე, დროშამ ხალხი მაშინვე მიიზიდა, თუმცა ჰელმსმა აღნიშნა, რომ მან მხოლოდ წლების შემდეგ შეამჩნია, თუ რამდენად პოპულარული გახდა ტრანსგენდერების დროშა.
„ეს დროშა მხოლოდ ჩემთვის იყო და არავის რომ არ გამოეყენებინა, ჩემთვის მაინც არ იქნებოდა პრობლემა. მაგრამ მერე დაინახეს დროშა და ძალიან მოეწონათ დიზაინი, მოეწონათ ფერების მნიშვნელობაც და აიტაცეს“, — თქვა მან ინტერვიუში.
2014 წელს ჰელმსმა დროშის ორიგინალი სმითსონის ბუნების ისტორიის ეროვნულ მუზეუმს გადასცა. ეს ნიშნავს, რომ ტრანსგენდერების დროშა არა მხოლოდ LGBTQ+ ისტორიის, არამედ კაცობრიობის ისტორიისა და მისი ხალხის ნაწილია — განურჩევლად იმისა, თუ ვინ რომელი თემის წევრად მოიაზრებს თავს.
ტრანსგენდერთა დროშის ფერების მნიშვნელობა
ჰელმსის თქმით, მისი გამიზნულად მრავალფეროვანი დიზაინის გამო ტრანსგენდერების დროშა მხოლოდ ლამაზი კი არაა, არამედ ის საზოგადოებრივი ცნობიერების სიმბოლოა: „დროშის დიზაინი ისეთია, რომ, განურჩევლად იმისა, თუ რა მიმართულებით ააფრიალებ მას, ის ყოველთვის სწორია და ის ჩვენს ცხოვრებაში სისწორის პოვნას აღნიშნავს“.
ჰელმსმა თავის 2019 წლის მემუარში More Than Just A Flag აღნიშნა:
„ყოველთვის მაოცებს ის, თუ რამდენად სწრაფად გავრცელდა [ტრანსგენდერების] დროშა, და ყოველ ჯერზე, როცა მას ან მის ფოტოს ვხედავ, ისტორიულ შენობაზე აფრიალებულს, სიამაყით ვივსები“.
დროშა ხუთ ჰორიზონტალურ ზოლადაა დაყოფილი, რომლებშიც სამი სხვადასხვა ფერია გადანაწილებული:
- ვარდისფერი აღნიშნავს ფემინურობასა და ფემინურ იდენტობას;
- ლურჯი აღნიშნავს მასკულინობასა და მასკულინურ იდენტობას;
- თეთრი ფერი მათთვისაა, ვინც ტრანზიციის პროცესშია, ვისაც ნეიტრალური გენდერი აქვს ან საერთოდ არ აქვს გენდერი, ასევე ინტერსექსი ადამიანებისთვის.
► იხილეთ აგრეთვე:
- რა სერვისები აქვს ქვიარებისთვის თემიდას — საქართველოში მოქმედ ტრანს-ქვიარ ორგანიზაციას.
- რა არის ტრანსფობია? — მაგალითები და გავლენა ჯანმრთელობაზე
წყარო: Teen Vogue, Good Housekeeping