ქალთა უფლებადამცველი ორგანიზაციის, საფარის ინფორმაციით, წელს თბილისის საკლუბო სცენა და ფესტივალები გაერთიანდნენ და ერთობლივად უჭერენ მხარს ქალების მოთხოვნას სქესობრივი დანაშაულის რეფორმის შესახებ. ორგანიზაციის განცხადებით, კლუბები, საფართან ერთად, ხელს უწყობენ გასართობ სივრცეებში თანხმობის კულტურის აქტიურ გავრცელებას
საფარი ავრცელებს კლუბებისა და ფესტივალების განცხადებასაც, რომელსაც ხელს აწერენ: Khidi, Tbilisi Open Air / AlterVision, eZo Festival, Left Bank , TES და Tbili Orgia და რომელშიც საუბარია საკლუბო სივრცის ქალებისთვის მეტად დაცულ და კომფორტულ ადგილად ქცევის აუცილებლობაზე.
“ჩვენთვის მნიშვნელოვანია, ყველა ადამიანს, რომელიც დროს ჩვენს სივრცეებში ატარებს, ესმოდეს ნამდვილი, ინფორმირებული და განგრძობადი თანხმობის მნიშვნელობა, ითვალისწინებდეს სხვა ადამიანების სურვილებს და პატივს სცემდეს მათ პირად სივრცეს. იმისთვის, რომ ქალებმა კიდევ უფრო კომფორტულად და დაცულად იგრძნონ თავი, ქალთა ორგანიზაცია “საფართან” ერთად, ჩვენ გავიღრმავეთ ცოდნა და დავხვეწეთ შიდა რეგულაციები, რათა უზრუნველვყოთ ქალებისთვის მეგობრული გარემო და დაცულობა. ამისთვის, ჩვენს სტუმრებს მოვუწოდებთ, ქალებისგან პირველ რიგში მიიღონ თანხმობა, რათა ნებისმიერი სახის კომუნიკაცია იყოს სასურველი”, — აღნიშნულია განცხადებაში და ნათქვამია, რომ იმ სივრცეების მიზანი, რომლებიც ადამიანებს ცეკვისთვის და თავისუფლების იდეის გარშემო აერთიანებს, ნებისმიერი განსხვავების მიუხედავად, ყველა ადამიანის თანასწორობისა და უფლებების დაცვაა.
აღსანიშნავია, სოციალურ ქსელებში ქალების მხრიდან არაერთხელ გავრცელდა ინფორმაცია სხვადასხვა კლუბში დამაზიანებელ მოპყრობაზე, მათ შორის, სექსუალურ ძალადობაზეც.