12 ქვეყნის საგარეო საქმეთა მინისტრებმა საქართველოს შესახებ წერილით ევროკავშირის უმაღლეს წარმომადგენელს საგარეო პოლიტიკისა და უსაფრთხოების საკითხებში, ჯოზეფ ბორელსა და სამეზობლო პოლიტიკისა და გაფართოების საკითხებში, ევროკომისარ ოლივერ ვარჰეის მიმართეს.
ღია წერილში, რომელიც 10 მაისით თარიღდება, მინისტრები შეშფოთებას გამოთქვამენ საქართველოში არსებული ვითარების გაუარესების გამო და აცხადებენ, რომ მთელი გულით უჭერენ მხარს ქვეყნის ევროპულ მისწრაფებებს;
12 ქვეყნის მინისტრების განცხადების თანახმად, რუსული კანონი საქართველოს დემოკრატიული ტრაექტორიის ცვლილების შემაშფოთებელი ნიშანია;
საგარეო საქმეთა მინისტრები აცხადებენ, რომ საქართველოს ხელისუფლებას უნდა მიეთითოს იმ შედეგებზე, რომელიც რუსული კანონის მიღებას მოჰყვება და უგზავნიან ბორელსა და ვარჰეის “პირდაპირ და ნათელი გზავნილს, რადგან საქართველოს ევროპული მომავლის დაცვა მნიშვნელოვანია”.
"დიდი შეშფოთებით მოგმართავთ საქართველოში ვითარების სწრაფი გაუარესების გამო. ჩვენ წლების განმავლობაში მთელი გულით ვუჭერთ მხარს საქართველოს რეფორმების დღის წესრიგს და ევროპულ მისწრაფებებს. დღესაც ვაგრძელებთ ქართველ ხალხის და მის ევროპული არჩევანის – დემოკრატიის, კანონის უზენაესობის, ადამიანის უფლებებისა და ფუნდამენტური თავისუფლებების მხარდაჭერას.
გასული წლის დეკემბერში საქართველოს ევროკავშირის წევრობის კანდიდატის სტატუსი მიენიჭა შემდგომი რეფორმების გატარების გააზრებით, განსაკუთრებით 9 პუნქტთან დაკავშირებით. ღრმად ვწუხვართ, რომ როგორც ჩანს, საქართველოს მთავრობა საფრთხეს უქმნის საქართველოს წინსვლას ევროპულ და ევროატლანტიკურ სტრუქტურებში ინტეგრაციას.
საქართველოს პარლამენტი წინ მიიწევს ე.წ. “უცხოური გავლენის” კანონის მიღების გზაზე. იმის ფონზე, რომ ბევრი შეშფოთების სიგნალია ადგილობრივი სამოქალაქო საზოგადოების თუ საქართველოს პარტნიორების მხრიდან, მათ შორის, თქვენ მიერ 17 აპრილს გამოქვეყნებული განცხადებაც, რომელშიც მკაფიოდ არის ნათქვამი, რომ ეს ევროკავშირის ძირითად ნორმებთან და ღირებულებებთან შეუთავსებელია. უნდა მოვძებნოთ სხვა გზებიც, რათა თბილისს ჰქონდეს არაორაზროვანი გზავნილი, რომ ეს კანონმდებლობა საქართველოს ევროპულ გზაზე პროგრესთან შეუთავსებელია
შემოთავაზებული კანონპროექტი საქართველოს დემოკრატიული ტრაექტორიის ცვლილების კიდევ ერთი შემაშფოთებელი ნიშანია. ძალის გამოყენება მშვიდობიანი დემონსტრანტების და ჟურნალისტების მიმართ, რომლებიც აშუქებდნენ პროტესტს, დათრგუნვა ფუნდამენტური უფლებებისა და თავისუფლების, შეუთავსებელია დემოკრატიასთან და ევროპულ ღირებულებებთან. მთავრობის შებრუნება დემოკრატიული დასავლეთიდან საკუთარ გამოსვლაში “ქართული ოცნების” საპატიო თავმჯდომარემაც გააძლიერა.
გიგზავნით პირდაპირ და ნათელი გზავნილს, რადგან საქართველოს ევროპული მომავლის დაცვა მნიშვნელოვანია. კონკრეტული შედეგები უნდა იყოს მითითებული, თუ საქართველოს მთავრობა მიიღებს კანონს, რომელიც არ შეესაბამება ევროკავშირის ძირითად ნორმებსა და ღირებულებებს. ჩვენი პრინციპული პოზიცია და მტკიცე ქმედებები არის ის, რასაც ელოდება ჩვენგან ქართველი ხალხი, რომელიც თავისი ქვეყნის ევროპული მომავლისკენ ისწრაფვის.
ამ კონტექსტში, გთხოვთ უზრუნველყოთ ზეპირი განცხადება ევროკომისიის იმაზე, თუ რა გავლენა ექნება შეთავაზებულ კანონმდებლობას ცხრა ნაბიჯის შესრულებაზე. ასევე გთხოვთ ამ საკითხს მიენიჭოს პრიორიტეტი, რათა დავრწმუნდეთ, რომ ეს კანონის საბოლოო მიღებამდე მოხდება", – აღნიშნულია 12 ქვეყნის საგარეო საქმეთა მინისტრის ერთობლივ წერილში.
წერილის ხელმომწერნი არიან შემდეგი ქვეყნის საგარეო საქმეთა მინისტრები:
- ჩეხეთი
- ესტონეთი
- საფრანგეთი
- ირლანდია
- ლიეტუვა
- პოლონეთი
- დანია
- ფინეთი
- გერმანია
- ლატვია
- ნიდერლანდები
- შვედეთი