“რუსულმა ოცნებამ არჩევნები მოიპარა” — ეს ბანერი ოზურგეთში, თავისი ოფისის აივანზე ორგანიზაციამ სამოქალაქო მოძრაობა თავისუფლებისთვის გუშინ, 4 ნოემბერს გამოფინა. დღეს კი, მათ მუნიციპალური ინსპექცია ეწვია. ინსპექციამ მიიჩნია, რომ ბანერი “არასათანადო რეკლამა” იყო და ორგანიზაცია 1 500 ლარით დააჯარიმა.
“გვეუბნებიან, რომ ეს არის რეკლამა, როდესაც ვეკითხებით, რომ რისი რეკლამაა, ამაზე პასუხი არ აქვთ. ასევე გვეუბნებიან, რომ თუ ამ ბანერს არ ჩამოვხსნით, დავჯარიმდებით 3 000 ლარით და ეს გაგრძელდება მანამ, სანამ ამ ბანერს არ ჩამოვხსნით. ჩვენ არ ვემორჩილებით. იმიტომ რომ ეს არის არაკონსტიტუციური ქმედება, ისინი ასრულებენ არაკონსტიტუციურ დავალებას. ნათელია, ვისი დავალებითაც კეთდება. ჩვენ არ ვემორჩილებით და არ ჩამოვხსნით ბანერს” — გვეუბნება სამოქალაქო მოძრაობა თავისუფლებისთვის წევრი, თამარ მიქაძე.
თამარი აღნიშნავს, რომ მათი ორგანიზაციის გვერდით ქართული ოცნების ოფისია. მათ არჩევნებამდე ერთი კვირის განმავლობაშიც გამოფენილი ჰქონდა ბანერი მესიჯებით: “მოდი არჩევნებზე, არა რუსეთს, გავიმარჯვებთ სახელოვნად”. ამ პოსტერებზე მუნიციპალური ინსპექცია მათთან არ მისულა, თუმცა 26 ოქტომბერს, შედეგების გამოცხადების შემდეგ, უცხო პირმა ბანერი ჩამოხია. თამარის თქმით, ის ქართულ ოცნებასთან არის დაახლოებული.
“ჩვენ სამოქალაქო მოძრაობა თავისუფლებისთვის ასევე ვართ კოალიცია “ჩემი ხმის” წევრი. ორგანიზაციამ ქვეყნის მასშტაბით უამრავი ფაქტი დადო იმისა, რომ ეს არჩევნები გაყალბდა და არ გამოხატავს ქართველი ხალხის ნებას. შესაბამისად, ჩვენ არ ვაღიარებთ ამ არჩევნებს და ვთვლით, რომ რუსეთმა და რუსულმა ოცნებამ ეს არჩევნები ქართველ ხალხს მოჰპარა და აი, ამის სადემონსტრაციოდ ჩვენ ჩვენივე კუთვნილი ოფისის აივანზე გადმოვფინეთ ბანერი… ეს ბანერი არ აზიანებს არანაირად იერსახეს, ეს არის ნაჭერზე გაკეთებული წარწერა” — აღნიშნავს თამარ მიქაძე.
ხაზს უსვამს იმასაც, რომ მიუხედავად გენერალური ინსპექციის ვიზიტისა, ბანერი “რუსულმა ოცნებამ არჩევნები მოიპარა”ადგილზე, ოფისის აივანზე რჩება.