სამართლიანი არჩევნებისა და დემოკრატიის საზოგადოება (ISFED) ბლოგს აქვეყნებს, რომელიც რუსული კანონის მხარდამჭერ კოორდინირებულ კამპანიას ასახავს. ISFED ქრონოლოგიურად მიყვება 3 აპრილს გამართული ბრიფინგიდან და გვიჩვენებს, როგორ ცდილობს ქართული ოცნება პროსახელისუფლებო გვერდებისა და საჯარო მოხელეების პირადი გვერდების გამოყენებით ხელსაყრელი ინფორმაციისა თუ დეზინფორმაციის გავრცელებას.
ISFED-ის ცნობით, მამუკა მდინარაძის განცხადების შემდეგ მთავრობის, ქართული ოცნების, პროსახელისუფლებო მედიასაშუალებებისა და ანონიმურად მოქმედი გვერდების მხრიდან სოციალურ მედიაში კანონპროექტის შესახებ დარეკლამებული კამპანია დაიწყო. რეკლამები განთავსდა გვერდებზე:
- საქართველოს მთავრობა;
- ქართული ოცნება;
- ირაკლი კობახიძე;
- შალვა პაპუაშვილი;
- TV Imedi;
- POSTV – ანალიტიკა;
- POSTV – ახალი ამბები;
- Newshub.ge – ნიუსჰაბი;
- სინამდვილეში;
- ქართული ოცნება ჩემი არჩევანია;
- Bidzina Ivanishvili for Georgia;
- პოლიტიკური სატირა;
- პოლიტიკური აბსურდი;
- აგენტურა;
- ციტატა;
- PrimeNews.Ge.
ორგანიზაცია აცხადებს, რომ ფეისბუქის გვერდებსა და ინსტაგრამის ანგარიშებზე კანონპროექტთან დაკავშირებული 120-მდე რეკლამა გამოქვეყნდა. მათ შორის, საინფორმაციო ბარათები (“ქარდები”), რომლებშიც მანიპულაციურადაა ახსნილი, თუ რას გულისხმობს კანონპროექტი და მითითებულია, ვისზე გავრცელდება ის. გავრცელებული გზავნილებით აპელირება ხდება ფინანსური გამჭვირვალობის აუცილებლობაზე და მიჩქმალულია ზოგადი კონტექსტი.
პროსახელისუფლებო გვერდებზე დარეკლამებული პოსტების უმრავლესობა ქართული ოცნების წევრების განცხადებებია. მხოლოდ ერთ გვერდზე — POSTV – ახალი ამბები მამუკა მდინარაძის, შალვა პაპუაშვილის, ირაკლი კობახიძისა და საპარლამენტო უმრავლესობის განცხადებებიდან 40-ზე მეტი ციტატაა დარეკლამებული. განცხადებებში ქართული ოცნების წევრები სამოქალაქო და დონორ ორგანიზაციებს ფინანსების გასაჯაროებაზე უარის თქმაში ადანაშაულებენ.
3-4 აპრილს პროსახელისუფლებო აქტორებისა და ანონიმური გვერდების მიერ დარეკლამებული პოსტების ნაწილი ოპოზიციონერი პოლიტიკოსების, დონორი ორგანიზაციებისა და სამოქალაქო სექტორის მადისკრედიტირებელ გზავნილებს მოიცავს. პოსტების ნაწილი, ამავდროულად, სექსისტური და ჰომოფობიური შინაარსისაა.
ბლოგში ასევე განხილულია კონკრეტული დეზინფორმაციული შინაარსის პოსტის გავრცელების შემთხვევაც, რომელშიც საუბარი იყო საქართველოს არასამთავრობო სექტორის სარეიტინგო პოზიციის 50 ადგილით გაუარესებაზე.
აღნიშნული პოსტი გამოაქვეყნა POSTV – ახალი ამბების გვერდმა. ფაქტ–მეტრის დასკვნით, “V-DEM სამოქალაქო საზოგადოების ინდექსის გაზომვისას აფასებს ხელისუფლების მიერ სამოქალაქო საზოგადოების ფუნქციონირებისთვის შექმნილ გარემოს და არა საქართველოს არასამთავრობო სექტორის სარეიტინგო პოზიციას. შესაბამისად, საქართველოს გაუარესებული ინდექსი არა ქართული საზოგადოებრივი ორგანიზაციების საქმიანობას, არამედ საქართველოს ხელისუფლების მიერ სამოქალაქო საზოგადოების ფუნქციონირებისთვის გაუარესებულ გარემოს ასახავს”.
TV Imedi-ს გვერდზე აღნიშნული პოსტი აღარ იძებნება, Meta-ს რეკლამების ბიბლიოთეკაში კი POSTV-ის მიერ გაშვებული რეკლამა “კომპანიის რეკლამის სტანდარტების დამრღვევად” მოინიშნა და მისი მოქმედება შეჩერდა.
ბლოგში ასევე მოტანილია სამოქალაქო ორგანიზაციებისა და ხელისუფლების მიმართ კრიტიკული მედიასაშუალებების მადისკრედიტირებელი პოსტების განხილვასაც, რომელიც დაარეკლამა ქართული ოცნების ერთ-ერთმა პარტიულმა ფეისბუქგვერდმა — სინამდვილეში და POSTV – ახალი ამბები.
ამასთან, 3-4 აპრილს დარეკლამებული პოსტების ნაწილი კანონპროექტის მნიშვნელობას შეეხებოდა. ორგანიზაცია ხაზს უსვამს, რომ საინფორმაციო ბარათები (“ქარდები”), რომლებზეც კანონპროექტის დეტალები მანიპულაციურადაა განმარტებული, შალვა პაპუაშვილის, მედიასაშუალებებისა და ანონიმურად მოქმედი აქტორების ფეისბუქგვერდებსა და ინსტაგრამის ანგარიშებზე დარეკლამდა. “ქარდების” უმრავლესობა იდენტური შინაარსისაა და მხოლოდ დიზაინით განსხვავდება.
ბლოგში მოტანილი იმ საჯარო მოხელეების პოსტები, რომლებიც “ქარდებს”, სავარაუდოდ, კოორდინირებულად აზიარებდნენ და აღნიშნულია, რომ “უცხოური გავლენის გამჭვირვალობის შესახებ” კანონპროექტის მხარდამჭერ კამპანიაში, მმართველი პარტიის ეროვნულ და ადგილობრივ წარმომადგენლებთან ერთად, მუნიციპალიტეტების ორგანოებში დასაქმებული საჯარო მოხელეებიც ჩაერთნენ. მთელი ქვეყნის მასშტაბით ადგილობრივ თვითმმართველობაში ადმინისტრაციული და შრომითი ხელშეკრულებით დასაქმებულმა პირებმა ფეისბუქის პირად ანგარიშზე იდენტური საინფორმაციო ბარათები გამოაქვეყნეს. ISFED-მა 30 მუნიციპალიტეტის ორგანოში დასაქმებული 96 საჯარო მოსამსახურე გამოავლინა, რომლებმაც 3-4 აპრილის განმავლობაში ფეისბუქის პირად ანგარიშზე იდენტური “ქარდები” საჯარო პოსტის სახით გამოაქვეყნეს.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
მდინარაძეს არ დაუმალავს, რომ პროექტის შინაარსი იგივე იქნება, ოღონდ სიტყვა “აგენტს” არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის: