რუსეთის საგარეო საქმეთა მინისტრმა, სერგეი ლავროვმა პუტინის სატელიტ მედიებთან ინტერვიუში ქართული ოცნების მიერ ხელახლა ინიციირებული რუსული კანონიც ახსენა და თქვა, რომ დემონსტრაციებმა სალომე ზურაბიშვილი სიტყვის თავისუფლებისთვის მებრძოლად კი აქცია, მაგრამ კანონი ლმობიერია და აშშ-ს, საფრანგეთს, პოლონეთსა თუ სხვა ქვეყნებს უფრო მკაცრი კანონები აქვთ.
“კანონები ითვალისწინებს ჯარიმასა და სისხლის სამართლის პასუხისმგებლობას, თუ ფულს იღებ, ამაზე არაფერს ამბობ და ამ ფულით რაიმე ცუდს სჩადიხარ. ქართული კანონპროექტი უცხოელი აგენტების შესახებ მხოლოდ დეკლარაციის შევსებას ითვალისწინებს [ფაქტობრივად მცდარი ინფორმაცია. გაიგეთ მეტი: რა წერია ხელახლა ინიცირებულ რუსულ კანონში — დეტალურად], თუ ორგანიზაციის დაფინანსების 20%-ზე მეტი უცხოეთიდან არის”, — განაცხადა ლავროვმა, რითაც ერთი-ერთში გაიმეორა “ქართული ოცნების” დეპუტატების გზავნილები, რომლებიც აქტიურად აცხადებენ, რომ კანონი უბრალოდ დეკლარაციის შევსებას გულისხმობს და ლმობიერია სხვა ქვეყნებთან შედარებით.
მაგალითად, მამუკა მდინარაძე აღნიშნავდა, რომ “კანონში ერთადერთი მოთხოვნაა, რომ თუ უცხოური დაფინანსება 20%-ზე მეტია (მედიასაშუალებას, „ენჯეოს“), ამ შემთხვევაში მას მომდევნო წლის იანვარში დეკლარაციის შევსება უწევს და საკუთარი ანგარიშების შეტანა, რა მიიღო და რაში დახარჯა. მეტი ამ კანონში არაფერი წერია”.
რუსულ კანონს იწონებენ კრემლის პროპაგანდისტებიც: დუგინმა კანონის ხელახალი ინიციირება “საქართველოს სწორ გზაზე” სვლად შეაფასა. პუტინის პრესმდივანმა, პესკოვმა კი განაცხადა, რომ საქართველოს “სურვილი, რომ სუვერენტეტი დაიცვას, ნორმალური პრაქტიკაა“.
შეგახსენებთ რუსული კანონის ხელახლა ინციირებას პარლამენტთან მრავალათასიანი საპროტესტო შეკრებები მოჰყვა, რომლის დროსაც შეკრების თავისუფლებაში არამართლზომიერი ჩარევა მოხდა და დემონსტრანტებს, ჟურნალისტებსა და პოლიტიკოსებს ფიზიკურად გაუსწორდნენ, დააკავეს 40-ზე მეტი ადამიანი. რუსული კანონი საპარლამენტო უმრავლესობამ პირველი მოსმენით 17 აპრილს მიიღო, წინ მეორე და მესამე განხილვა და საკომიტეტო მოსმენაა.