თბილისის სახელმწიფო უნივერსიტეტის პროფესორ-მასწავლებლები აცხადებენ, რომ ფიქრობენ ქვეყნის საუკეთესო ინტერესებზე, სტუდენტების გვერდით დგანან და უერთდებიან მათ აქციებზე.
“თუკი ისინი გადაწყვეტენ შეაჩერონ სასწავლო პროცესი, ჩვენც შევუერთდებით მათ ამ გადაწყვეტილებას. გაცდენილი ლექცია-სემინარები კი აღდგება მოგვიანებით, ისევ სტუდენტებთან შეთანხმებით. აქვე, მოვუწოდებთ უნივერსიტეტის რექტორს, აკადემიკოს ჯაბა სამუშიას, რომ ღიად და მკაფიოდ დააფიქსიროს პოზიცია „რუსული კანონის“, სტუდენტებისა და პროფესორ-მასწავლებლების მიმართ ძალადობისა და დაშინების მცდელობის შესახებ და უზრუნველყოს, რომ პრობლემები არ შეექმნათ პროტესტის მონაწილე სტუდენტებს, აკადემიურ და ადმინისტრაციულ პერსონალს”, — აღნიშნულია განცხადებაში, რომელსაც ამ დროისთვის 60-ზე მეტი პროფესორ-მასწავლებელი აწერს ხელს.
ხელმომწერნი მიიჩნევენ, რომ დაუშვებელია რუსული კანონის ნებისმიერი ფორმით მიღება და საჭიროა მისი განხილვა დაუყოვნებლივ შეწყდეს.
“[რუსული კანონი] ძირს უთხრის ქვეყნის ევროპულ და ევროატლანტიკურ კურსს და აბრუნებს ქვეყანას მძიმე წარსულში, რომელსაც ჩვენმა საზოგადოებამ არაერთხელ მკაფიოდ უთხრა უარი”.
სია განახლებადია. ხელმომწერების ჩამონათვალი შეგიძლიათ იხილოთ აქ.
რუსული კანონის მესამე საკომიტეტო მოსმენა ხვალ, 13 მაისს, დილის 09:00 საათზე ჩაინიშნა, ბოლო პლენარული მოსმენა კი 14 მაისს. საკომიტეტო განხილვამდე აქცია ჩაინიშნა პარლამენტთან. მოქალაქეები დღეს, ღამის 22:00 საათზე შეიკრიბებიან და ღამეს რუსთაველზე გაათევენ.