საქართველოს პრეზიდენტის, სალომე ზურაბიშვილის განცხადებით, ქართული ოცნების დეპუტატების, ალუდა ღუდუშაურისა და ირაკლი ბერაიას მიერ ქალი დეპუტატების მიმართ დღეს გაკეთებული განცხადებები შეურაცხყოფს მთლიანად საქართველოს პარლამენტს.
“მინდა სრული სოლიდარობა გამოვუცხადო იმ ქალებს, რომლებიც დღეს გამოვიდნენ და პროტესტი გამოაცხადეს. მიმაჩნია, რომ ეს სრულიად მიუღებელია, სიტყვებიც არ არის, რომ ეს მიუღებელია, ეს ნამდვილად სირცხვილია: ქართველობისთვის, საქართველოსთვის, საქართველოს პარლამენტისთვის. მე არ ვიცი რა კანონი ვინ უნდა მიიღოს უხამსობაზე, როცა თუ ეს არ არის უხამსი სიტყვები, მე არ ვიცი რა არის”, — განაცხადა ზურაბიშვილმა.
პრეზიდენტი მოუწოდებს პარლამენტის თავმჯდომარეს, მიიღოს უმკაცრესი ზომები იმ ადამიანების მიმართ, რომლებმაც “დღეს თავს უფლება მისცეს, ასე მოქცეულიყვნენ”. “თუ ეს არ გააკეთა, მაშინ თვითონ აკარგვინებს სახეს საქართველოს პარლამენტს. მე მგონი, უნდა იმოქმედოს სწრაფად და მოახდინოს რეაგირება!”, — აცხადებს ზურაბიშვილი.
დღეს, 31 ოქტომბერს, პარლამენტის პლენარულ სხდომაზე, ქართული ოცნების დეპუტატებმა ალუდა ღუდუშაურმა და ირაკლი ბერაიამ ქალ პარლამენტარებს, ანი წითლიძესა და თეონა აქუბარდიას სიტყვიერი შეურაცხყოფა მიაყენეს და სექსისტური, დამამცირებელი, ღირსების შემლახავი კომენტარები გააჟღერეს. პარლამენტის თავმჯდომარეს, შალვა პაპუაშვილს დეპუტატებისთვის არც სიტყვა გაუწყვეტინებია და არც მითითება ყოფილა, რომ შეურაცხმყოფელი კომენტარებისგან თავი შეეკავებინათ.
საქართველოს სახალხო დამცველი, ლევან იოსელიანი მომხდარს Facebook-ზე გამოეხმაურა და დაწერა, რომ სახალხო დამცველის აპარატი დისკრიმინაციის გამაძლიერებელ და შეურაცხმყოფელ განცხადებებს შეაფასებს და აუცილებლად აისახება ანგარიშში.
განახლება: ირაკლი ბერაიამ საკუთარი განცხადების გამო ბოდიში მოიხადა. მისი თქმით, მმართველი გუნდის მიმართ “უსამართლო” ბრალდებები მისთვის მტკივნეულია. ქალი დეპუტატის შეურაცხყოფა ბერაიამ “ემოციებით” ახსნა:
“რა თქმა უნდა, გულწრფელად ვაღიარებ ამას, რომ ეს იყო ემოციურად გადაჭარბებული თვითონ იმ განცხადების სიმძიმიდან გამომდინარე, რასაც ჩვენ ვისმენთ მუდმივად და რა თქმა უნდა, გულწრფელად ამის გამო მინდა ბოდიში მოვიხადო”.