საქართველოს პრეზიდენტის განცხადებით, ქალთა მიმართ ძალადობისა და ფემიციდის მიმართულებით ქვეყანაში მძიმე სურათია, რაც “სირცხვილია”. მისი თქმით, ფემიციდთან ბრძოლა საზოგადოების თითოეული წევრის საქმეა და ისურვებდა, რომ ამ ბრძოლაში მეტი კაცი დაენახა.
“ქალთა მიმართ ძალადობა, ფემიციდი, ანუ ქალთა მკვლელობა, ეს ყველაფერი სირცხვილია ქვეყნისთვის და პირდაპირ ეწინააღმდეგება ჩვენს კულტურას, ჩვენს იდენტობასა და ყველა იმ ღირებულებებს, რაც გვაერთიანებს და ამდენად, ეს არის მთავარი გამოწვევა, რომ რაღაცნაირად ჩვენ შევძლოთ და დავძლიოთ ეს ძალიან მძიმე მდგომარეობა”, — ამბობს სალომე ზურაბიშვილი.
ქალების უფლებრივი მდგომარეობის შესახებ პრეზიდენტმა დღეს, 8 მარტს ისაუბრა, როცა ქალებს ქალთა საერთაშორისო დღე მიულოცა და იმ მნიშვნელოვან გამოწვევებზეც გაამახვილა ყურადღება, რომელთა დაძლევაც ქალებს უწევთ.
“მართალია, ქალებს დღეს საქართველოში ძალიან დიდი როლი აქვთ, პრაქტიკულად, არ არსებობას ეკონომიკური სექტორი, კულტურული დარგები, ან რომელიმე მიმართულება, სადაც ქალები ძლიერად არ არიან წარმოდგენილი და ხშირად ჩვენი სახე ქალების მეშვეობით გადის საზღვარგარეთ, შეგვიძლია ამ ქალებით ვიამაყოთ, მაგრამ უფრო ღრმად უნდა ჩავიხედოთ და ვნახოთ, კიდევ რისი გაკეთება შეიძლება იმ მიმართულებით, რომ მთავარ მიზანს — თანასწორობას მივაღწიოთ”, — აღნიშნავს ზურაბიშვილი.
პრეზიდენტის განცხადებით, პარლამენტში ჯერ კიდევ არ არის ქალებისა და კაცების თანაბარი რაოდენობა, ხოლო ევროპასა და აზიაში, ამ მიმართულებით, პრაქტიკულად, ბოლო რიგებში მდგარი ქვეყანა ვართ.
“რატომაა ძალიან ცოტა ქალი წარმოდგენილი ქართულ პოლიტიკაში, პარლამენტსა და მთავრობაში? ეს დღეს პოლიტიკაში არსებული ზოგადი მდგომარეობის შედეგია: მორალური ძალადობისა და სიძულვილის ენის, რაც ყველამ გამოვცადეთ. ყველამ ვიცით, რომ ეს აფერხებს ქალების შესვლას პოლიტიკაში. ხდება [პოლიტიკური აქტივობისაგან] თავშეკავება, რათა არ ჩადგნენ იმ მდგომარეობაში, რომელსაც ტელევიზიაში ვხედავთ, რაც ახალგაზრდა ქალებისათვის დიდად სასურველი ნამდვილად არ არის… და შედეგიც სახეზეა”, — აცხადებს ზურაბიშვილი.
პრეზიდენტმა ქალების მდგომარეობაზე ეკონომიკასთან მიმართებითაც ისაუბრა. მისი მოსაზრებით, ქალები, როგორც ძალა, ქვეყანაში არ არიან წარმოდგენილები და არც ის ხელფასები აქვთ, რომლებიც უნდა ჰქონდეთ. ზურაბიშვილი აღნიშნავს, რომ ეს მხოლოდ საქართველოს პრობლემა არ არის და ყველა თანამედროვე ქვეყანა სწორედ ხელფასების გათანაბრებისკენ მიისწრაფვის, თუმცა საქართველო ჯერ შორსაა ამ მიზნის მიღწევისგან.
ზურაბიშვილმა ისაუბრა სოფლად მცხოვრები ქალების მდგომარეობაზეც.
“სოფლად მცხოვრები ქალებისთვის კიდევ უფრო მძიმე მდგომარეობაა, მათთვის ფინანსურ რესურსთან წვდომაც ბევრად გართულებულია. ეს ვიცით, თუმცა კანონმდებლობით ეს მდგომარეობა არ იცვლება, არ არის მიღებული ზომები, რათა მათ მიეცეთ თუნდაც კრედიტთან ხელმისაწვდომობის საშუალება, რაც მათ მისცემს შესაძლებლობას, საკუთარი ინიციატივებიც და წამოწყების უნარიც ქვეყნის სასიკეთოდ გამოიყენონ”, — აცხადებს პრეზიდენტი.
ზურაბიშვილი ყურადღებას ამახვილებს ქალების უფლებების მიმართულებით ბრძოლის ეტაპობრიობასა და თანმიმდევრულობაზე და ამბობს, რომ სწორედ აქედან უნდა დავიწყოთ პრობლემის მოგვარება. მისი თქმით, ეს საზოგადოებისა და მედიის პასუხისმგებლობაა.
“ჩვენ ხშირად გვიყვარს თქმა, რომ სახელმწიფოსა და ხელისუფლების გასაკეთებელია ყველაფერი. მართლაც მათი საკეთებელი ბევრია, მაგრამ მთავარი — ადამიანების მოქალაქეობრივი აღზრდა, ჩვენი ინდივიდუალურად საკეთებელი საქმეა, საზოგადოებისა და თითოეული ჩვენგანის პასუხისმგებლობაა და ეს არის ის, რაც ქართველმა დედებმა კარგად იცოდნენ და რასაც ჩვენც ხელახლა უნდა დავეუფლოთ და ისევ ვისწავლოთ, თუკი ეს რაღაცნაირად, დროთა განმავლობაში შენელდა”, — აღნიშნავს ზურაბიშვილი.
ზურაბიშვილმა გაიხსენა ხანუმ ჯეირანოვას საქმეც, რომელიც 10 წლის წინ, ბავშვების თვალწინ სასტიკად მოკლეს. აღნიშნულ საქმეს საფარი უძღვებოდა. პრეზიდენტმა საზოგადოებას ქალთა მიმართ დისკრიმინაციის გაეროს კომიტეტის რეკომენდაციები შეახსენა, რომლებიც, საქმის განხილვის შედეგად, 2021 წელს გამოიცა.
“3 რეკომენდაციიდან ერთ-ერთი და მთავარი, ქალის მიმართ გენდერის ნიშნით ჩადენილ დანაშაულზე დამნაშავეების დასჯა იყო და 2023 წელს, სასამართლომ განაჩენი თითქმის 10 წლის თავზე გამოიტანა, მაგრამ, ძალიან მისასალმებელია, რომ სახელმწიფომ შეძლო ეს დანაშაული გამოევლინა და დაესაჯა; მეორე რეკომენდაცია კომპენსაციას ეხებოდა და კომპენსაციის ოდენობაც განისაზღვრა; მესამე რეკომენდაცია, რომელზეც განსაკუთრებული აქცენტის გაკეთება მინდა, ამ დანაშაულის გამო სახელმწიფო უწყებების მხრიდან ბავშვების წინაშე ბოდიში მოხდაა. მე ამის კომპეტენცია არ გამაჩნია, რომ ამ ბავშვებს ბოდიში მოვუხადო, ეს არ შედის ჩემს კონსტიტუციურ უფლებებში, მაგრამ მე, თქვენთან ერთად, შემიძლია ვისურვო და მჯეროდეს, ეს ბოლო ნაბიჯიც გადაიდგმება. მართალია, ეს სიმბოლურია, მაგრამ ეს სიმბოლური ნაბიჯი ძალიან სერიოზული გზავნილია ყველასთვის, ვინც შესაძლოა, ამ მდგომარეობაში აღმოჩნდეს. ძალიან მნიშვნელოვანია მათ იცოდნენ, რომ ღირსების შელახვა და ასეთი სასტიკი დანაშაულები ყურადღების გარეშე არ დარჩება. ეს ჩვენი საზოგადოების შეურაცხყოფაა და ამდენად, ჩვენი საზოგადოება ამაზე უნდა რეაგირებდეს”, — აცხადებს ზურაბიშვილი.
დღესვე, ქალთა საერთაშორისო დღესთან დაკავშირებით, სალომე ზურაბიშვილმა სხვადასხვა ორგანიზაციის წარმომადგენელი 5 უფლებადამცველი ქალი ღირსების მედლით დააჯილდოვა.