სპეციალურმა საგამოძიებო სამსახურმა, პირადი ცხოვრების ხელყოფის ბრალდებით, 1985 წელს დაბადებული კაცი დააკავა. უწყებაში ამბობენ, რომ ის პარტნიორ ქალს, რომელიც ვიდეოზარის მიმდინარეობისას შიშველი იყო, ფარულად უღებდა და ფოტოებს უკანონოდ ინახავდა.
უწყების ცნობით, ბრალდებულს 2021-2022 წლებში, ინტიმური ხასიათის ურთიერთობა ჰქონდა დაზარალებულ ქალთან, რა დროსაც ისინი ერთმანეთს სხვადასხვა გზით ეკონტაქტებოდნენ, მათ შორის, ინტერნეტაპლიკაციების მეშვეობით.
“ვიდეოზარის მიმდინარეობისას, ბრალდებული ფარულად, მობილური ტელეფონით შიშველ დაზარალებულს სურათებს (ე.წ. სქრინები) უღებდა. ბრალდებული, ასევე, მობილურ ტელეფონში უკანონოდ ინახავდა მათი სქესობრივი კავშირის ამსახველ ვიდეო-ჩანაწერს”, — აღნიშნულია განცხადებაში.
კაცს პირადი ცხოვრების საიდუმლოს ხელყოფისთვის ბრალდება წარედგინა და აღკვეთის ღონისძიების სახით პატიმრობა შეეფარდა.